Hesekiele 13:1-23
13 Yehova a dovha a amba na nṋe, a ri:
2 “Murwa muthu, porofita nga ha vhaporofita vha Isiraele,+ u ambe na vhane vha ḓiitela vhuporofita havho*+ u ri, ‘Ipfani zwine Yehova a amba.
3 Yehova Murena Muvhusahoṱhe u ri: “Khombo kha vhaporofita vha matsilu, vhane vha tevhela mbilu dzavho, ngeno vha songo vhona tshithu!+
4 Iwe Isiraele, vhaporofita vhau vha vho nga phunguwe dzi mashubini.
5 Ni nga si ye fhethu ho kwashiwaho kha mutsheṱo uri ni hu fhaṱulule ni tshi itela vha nnḓu ya Isiraele,+ uri Isiraele ḽi dzule ḽo ima nndwani nga ḓuvha ḽa Yehova.”+
6 “Vho vhona mabono a mazwifhi na u amba mazwifhi, ndi vhane vha ri, ‘Yehova o amba a ri,’ ngeno Yehova a songo vha ruma, vho lindela uri zwe vha amba zwi itee.+
7 Naa a no ngo vhona mabono a mazwifhi na u amba mazwifhi musi ni tshi ri, ‘Yehova o amba a ri,’ ngeno nṋe ndi songo amba tshithu?”’
8 “‘Ndi ngazwo Yehova Murena Muvhusahoṱhe a tshi ri: “‘Ngauri no zwifha na mabono aṋu ndi a mazwifhi, ndi lwa na inwi,’ u ralo Yehova Murena Muvhusahoṱhe.”+
9 Tshanḓa tshanga tshi ḓo rwa vhaporofita vhane vha amba mabono a mazwifhi na u amba mazwifhi.+ A vha nga ḓo vha vhukati ha vhathu vhane nda vha vhudza tshiphiri; kana u ṅwaliwa kha mutevhe wa vha nnḓu ya Isiraele; kana u humela kha shango ḽa Isiraele; ndi hone ni tshi ḓo ḓivha uri ndi nṋe Yehova Murena Muvhusahoṱhe.+
10 Zwoṱhe hezwi zwi ḓo itea nga nṱhani ha uri vho xedza vhathu vhanga nga u vha vhudza u ri, “Hu na mulalo!”+ ngeno u siho. Ndi musi hu tshi fhaṱiwa luvhondo lu songo khwaṱhaho, lwa penndwa nga pennde tshena.’*+
11 “Vhudza vhane vha khou pennda luvhondo nga pennde tshena uri lu ḓo wa. Hu ḓo ḓa mvula ya mukumbela, ha wa na tshifhango na ḓumbu ḽihulu ḽine ḽa ḓo lu wisa.+
12 Musi luvhondo lu tshi wa ni ḓo vhudziswa uri, ‘I ngafhi pennde ye na i pennda?’+
13 “Nga zwenezwo, Yehova Murena Muvhusahoṱhe u ri: ‘Ndi ḓo ḓisa ḓumbu ḽihulu ḽa vhudzula na mvula ya mukumbela ngauri ndo sinyuwa. Ndi ḓo ḓisa tshifhango tshine tsha ḓo tshinyadza ngauri ndo sinyuwa.
14 Ndi ḓo wisa luvhondo lwo penndwaho nga pennde tshena nda lu wisela fhasi, ha vhonala mutheo walwo. Musi muḓi u tshi fheliswa, ni ḓo fheliswa nawo; ndi hone ni tshi ḓo ḓivha uri ndi nṋe Yehova.’
15 “‘Musi ndi tshi sinyutshela luvhondo na vhane vha khou lu pennda nga pennde tshena, ndi ḓo amba na inwi nda ri: “Luvhondo a lu tsheeho na vhane vha khou lu pennda a vha tsheeho.+
16 Vhaporofita vha Isiraele a vha tsheeho, vhe vha porofita nga ha Yerusalema vha tshi vhona mabono a mulalo nga hawo, ngeno u siho,”’+ u ralo Yehova Murena Muvhusahoṱhe.
17 “Iwe murwa muthu, furalela vhananyana vha vhathu vhau vhane vha ḓiitela vhuporofita havho, u porofite nga havho.
18 U vha vhudze u ri, ‘Yehova Murena Muvhusahoṱhe u ri: “Khombo kha vhafumakadzi vhane vha runga malabi a u vhofha zwanḓani* na malabi a u thivha ṱhoho ane a lingana vhoṱhe uri vha kone u zwima vhathu! Naa ni khou zwima vhathu vhanga ni tshi khou lingedza u tshidza vhutshilo haṋu?
19 Naa ni ḓo ntshikafhadza vhukati ha vhathu vhanga ni tshi itela u wana baḽi i ḓadzaho tshanḓa na matshaka-tshaka a vhurotho,+ ni tshi vhulaya vhane vha si fanele u fa na u tshidza vhane vha fanela u fa, ni tshi zwi ita nga u zwifhela vhathu vhanga, vhane vha thetshelesa mazwifhi aṋu?”’+
20 “Nga zwenezwo, Yehova Murena Muvhusahoṱhe u ri: ‘Inwi vhafumakadzi, ndi lwa na malabi aṋu ane na a shumisa u zwima vhathu sa zwiṋoni, ndi ḓo a kherukanya zwanḓani zwaṋu, nda vhofholola vhane na vha zwima sa zwiṋoni.
21 Ndi ḓo kherukanya malabi aṋu a u thivha ṱhoho nda tshidza vhathu vhanga zwanḓani zwaṋu, a vha tsha ḓo vha tshithu tshine na tshi zwima; ndi hone ni tshi ḓo ḓivha uri ndi nṋe Yehova.+
22 Ngauri no kula muvhuya nungo nga mazwifhi aṋu+ musi nṋe ndi sa khou mu tsikeledza,* na khwaṱhisa zwanḓa zwa muvhi,+ uri a si rembuluwe kha nḓila dzawe mmbi uri a kone u tshila.+
23 Nga zwenezwo, inwi vhafumakadzi a ni tsha ḓo dovha na vhona mabono a mazwifhi kana na ita zwa u bvumba;+ ndi ḓo tshidza vhathu vhanga zwanḓani zwaṋu, ndi hone ni tshi ḓo ḓivha uri ndi nṋe Yehova.’”
Ṱhaluso dzi re magumoni a siaṱari
^ Kana “vhane vha porofita zwi tshi bva mbiluni dzavho.”
^ Ndi u fhaṱa luvhondo lu songo khwaṱhaho na u lingedza u lu pennda nga pennde tshena uri lu vhonale lu tshi nga lwo khwaṱha.
^ Ndi malabi a manditi ane a vhofhelelwa kha zwanḓa.
^ Kana “pfisa vhuṱungu.”
