Hesekiele 14:1-23
14 Ha ḓa vhaṅwe vhahulwane vha Isiraele vha ḓa vha dzula phanḓa hanga.+
2 Yehova a amba na nṋe, a ri:
3 “Murwa muthu, havha vhathu vho ḓiimisela u tevhela midzimu yavho ya zwifanyiso i nengisaho,* vho vhea tshikhukhulisi tshine tsha ita uri vhathu vha ite tshivhi. Naa ndi fanela u vha tendela vha tshi mmbudzisa?+
4 Zwino amba navho u vha vhudze uri, ‘Yehova Murena Muvhusahoṱhe u ri: “Arali Muisiraele o ḓiimisela u tevhela midzimu yawe ya zwifanyiso i nengisaho na u vhea tshikhukhulisi tshine tsha ita uri vhathu vha ite tshivhi, a ḓa a vhudzisa muporofita, nṋe Yehova ndi ḓo mu fhindula zwo mu fanelaho u ya nga midzimu yawe minzhi ya zwifanyiso i nengisaho.
5 Ngauri ndi ḓo ita uri vha nnḓu ya Isiraele vha ofhe nga nṱhani ha uri vhoṱhe vho ṱutshela kule na nṋe, vha tevhela midzimu yavho ya zwifanyiso i nengisaho.”’+
6 “Ngauralo, vhudza vha nnḓu ya Isiraele uri, ‘Yehova Murena Muvhusahoṱhe u ri: “Vhuyelelani ha nṋe, ni ṱutshele kule na midzimu yaṋu ya zwifanyiso i nengisaho, ni ṱutshele kule na mishumo yaṋu yoṱhe i nengisaho.+
7 Arali Muisiraele kana mutsinda ane a dzula Isiraele a ḓisendedza kule na nṋe, a ḓiimisela u tevhela midzimu yawe ya zwifanyiso i nengisaho na u vhea tshikhukhulisi tshine tsha ita uri vhathu vha ite tshivhi, a ḓa a vhudzisa kha muporofita wanga,+ nṋe Yehova ndi ḓo mu fhindula.
8 Ndi ḓo furalela onoyo muthu nda mu ita tsumbo na u ita uri a goḓiwe, ndi ḓo mu bvisa vhukati ha vhathu vhanga;+ ndi hone ni tshi ḓo ḓivha uri ndi nṋe Yehova.”’
9 “‘Arali muporofita a fhuriwa, a tenda, hu ḓo vha hu nṋe Yehova we a fhura onoyo muporofita.+ Ndi ḓo imisa tshanḓa tshanga nda mu rwa, nda mu fhelisa kha vhathu vhanga vha Isiraele.
10 Vha ḓo hwala mulandu wavho; a vhudzisaho u ḓo hwala mulandu une wa fana na wa muporofita,
11 uri vha nnḓu ya Isiraele vha litshe u ṱutshela kule na nṋe na u ḓitshikafhadza nga vhuvhi havho hoṱhe. Ndi hone vha tshi ḓo vha vhathu vhanga, nṋe nda vha Mudzimu wavho,’+ u ralo Yehova Murena Muvhusahoṱhe.”
12 Yehova a dovha a amba na nṋe a ri:
13 “Murwa muthu, arali shango ḽa nkhakhela nga u sa fhulufhedzea, ndi ḓo ḽi rwa nda fhelisa na zwiḽiwa zwi re khaḽo,+ nda ḓisa nḓala khaḽo,+ nda vhulaya vhathu vha re khaḽo na zwipuka.”+
14 “‘Naho vhenevha vhanna vhararu Noaxe,+ Daniele+ na Yobo+ vha vhe vha tshi dzula khaḽo, vho vha vha tshi ḓo kona u tshidza vhone vhaṋe fhedzi nga nṱhani ha u luga havho,’+ u ralo Yehova Murena Muvhusahoṱhe.”
15 “‘Kana khamusi nda ita uri zwivhanda zwi dzhene shangoni, zwi vhulaye vhathu* khaḽo na u ita uri ḽi vhe soga, uri hu si vhe na muthu ane a fhira nga henefho nga nṱhani ha zwivhanda.+
16 Ndi ana nga vhutshilo hanga,’ u ralo Yehova Murena Muvhusahoṱhe, ‘naho havha vhanna vhararu vha vhe vha tshi dzula khaḽo vho vha vha sa ḓo kona u tshidza vharwa vhavho kana vhananyana vhavho; vho vha vha tshi ḓo tshidza vhone vhaṋe fhedzi, shango ḽo vha ḽi tshi ḓo vha shubi.’”
17 “‘Kana khamusi nda ḓisela ḽeneḽo shango banga,+ nda ri: “Banga ḽi dzhene shangoni,” ḽi vhulaye vhathu na zwipuka,+
18 naho vhenevha vhanna vhararu vha vhe vha tshi dzula khaḽo, ndi ana nga vhutshilo hanga,’ u ralo Yehova Murena Muvhusahoṱhe, ‘vho vha vha sa ḓo kona u tshidza vharwa vhavho kana vhananyana vhavho; vho vha vha tshi ḓo tshidza vhone vhaṋe fhedzi.’”
19 “‘Kana khamusi nda rumela dwadze khaḽo,+ nda shululela mbiti dzanga khaḽo na u shulula malofha a vhathu na a zwipuka,
20 naho arali Noaxe,+ Daniele+ na Yobo+ vha vhe vha tshi dzula khaḽo, ndi ana nga vhutshilo hanga,’ u ralo Yehova Murena Muvhusahoṱhe, ‘vho vha vha sa ḓo kona u tshidza vharwa vhavho kana vhananyana vhavho; vho vha vha tshi ḓo tshidza vhone vhaṋe fhedzi nga nṱhani ha u luga havho.’”+
21 “Ngauri zwe Yehova Murena Muvhusahoṱhe a zwi amba ndi hezwi: ‘Zwi ḓo tou ralo musi ndi tshi rumela ṱhamu+ nṋa dzine dza vha banga, nḓala,+ zwivhanda na dwadze Yerusalema uri ndi fhelise vhathu vha re khaḽo na zwipuka.+
22 Naho zwo ralo, ndi ḓo sia vhaṅwe vhane vha ḓo ponyoka, vha bviswa khaḽo,+ vharwa na vhananyana. Vhenevho vha khou ḓa kha inwi, musi ni tshi vhona nḓila dzavho na mishumo yavho ni ḓo khuthadzwa kha maṱungu e nda ni ḓisela one Yerusalema, na kha zwoṱhe zwe nda ni ita.’”
23 “‘Vha ḓo ni khuthadza musi ni tshi vhona nḓila dzavho na mishumo yavho, ndi hone ni tshi ḓo ḓivha uri ndi ngani ndo ita zwe nda ḽi ita zwone,’+ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “zwi vhulaye vhana.”
