Hesekiele 16:1-63
16 Yehova a dovha a amba na nṋe, a ri:
2 “Murwa muthu, sumbedza Yerusalema mishumo yawe i nengisaho.+
3 U ambe uri, ‘Yehova Murena Muvhusahoṱhe o amba na Yerusalema a ri: “He wa bva hone na he wa bebelwa hone ndi shangoni ḽa Kanana. Khotsi au o vha e Muamori,+ mme au o vha e Muhethe.+
4 Nga ḓuvha ḽe wa bebwa ngaḽo, a wo ngo bviswa ḽila kha mukombo, a wo ngo ṱanzwiwa nga maḓi uri u kune, a wo ngo ḓodzwa muṋo na u putelwa nga malabi.
5 A hu na we a u pfela vhuṱungu uri a u ite zwenezwi zwithu. A hu na we a u khathutshela. Nṱhani hazwo wo vha wo laṱwa tsimuni ngauri wo vhengwa nga ḓuvha ḽe wa bebwa ngaḽo.
6 “‘“Musi ndi tshi khou fhira nga henefho, ndo u vhona u tshi khou raha-raha wo lala kha malofha au, nda ri: ‘Tshila!’ Ndo amba na iwe wo lala henefho kha malofha au nda ri: ‘Tshila!’
7 Ndo ita uri u hule sa zwimela zwine zwa khou aluwa tsimuni, wa bvela phanḓa u tshi hula, wa ambara zwiambaro zwavhuḓi. Wa tunga maḓamu na mavhudzi au a hula; naho zwo ralo, wo vha u songo ambara, u fhedzi.”’
8 “‘Musi ndi tshi khou fhira nga henefho nda u vhona, nda zwi ṱhogomela uri wo no aluwa lune wa nga sumbedzwa lufuno. Nda u ambadza tshiambaro tshanga+ nda u thivhedza, nda ita muano na iwe,’ u ralo Yehova Murena Muvhusahoṱhe, ‘wa vha wanga.
9 Zwiṅwe hafhu, nda u ṱanzwa nga maḓi, nda u phumula malofha, nda u ḓodza mapfura.+
10 Nda u ambadza tshiambaro tsho khavhiswaho, nda u ṋea na thovho* dza mukumba, na u u putela nga ḽinene yavhuḓi, nda u ambadza zwiambaro zwi ḓuraho.
11 Ndo u nakisa nga madzanga na u u ambadza mabengele zwanḓani zwau na vhulungu mukuloni wau.
12 Ndo dovha nda u ambadza na rinngi ningoni yau na zwiṅiṋa nḓevheni dzau na khare yo nakaho ṱhohoni yau.
13 Wo ḓinakisa nga musuku na nga siḽiva, na nga zwiambaro zwa ḽinene yavhuḓi zwi ḓuraho na nga zwiambaro zwo khavhiswaho. Wo ḽa fuḽauru tsekene, mutoli na mapfura, wa hula wa naka nga maanḓa,+ wa fanelea u vha na vhuimo musanda.’”
14 “‘Bvumo* ḽau ḽa ḓivhea kha dzitshaka+ nga nṱhani ha lunako lwau, ngauri wo vha wo nakesa nga nṱhani ha uri vhugala hanga ho vha vhu kha iwe,’+ u ralo Yehova Murena Muvhusahoṱhe.”
15 “‘Fhedzi wo thoma u fhulufhela lunako lwau,+ wa vha phombwe nga nṱhani ha bvumo ḽau.+ Wa ita vhupombwe na muṅwe na muṅwe a fhiraho nga nḓila,+ wa ḓiṋekedzela khavho.
16 Wo dzhia zwiṅwe zwiambaro zwau zwa mivhala-vhala wa khavhisa ngazwo fhethu ha vhurabeli, he wa ita hone vhupombwe,+ zwithu zwe zwa vha zwi songo fanela u itwa kana u vhuya zwa itea.
17 Wo dovha wa dzhia dzhuweḽari* dzavhuḓi dza musuku na dza siḽiva dze nda u ṋea dzone wa ḓiitela zwifanyiso zwa vhanna, wa ita vhupombwe nazwo.+
18 Wo dzhia zwiambaro zwau zwo khavhiswaho wa fukedza zwenezwo zwifanyiso,* wa zwi ṋea mapfura anga na zwioro zwanga.+
19 Na vhurotho he nda u ṋea ho itwaho nga fuḽauru tsekene, mapfura na mutoli zwe nda u ṋea uri u zwi ḽe, wo zwi ṋekedza zwifanyiso sa tshifhiwa tshi nukhelelaho.+ Ndi zwone zwo iteaho,’ u ralo Yehova Murena Muvhusahoṱhe.”
20 “‘Wo dzhia vharwa na vhananyana vhau vhe wa mbebela vhone,+ wa vha ita tshiṱhavhelo tsha midzimu ya zwifanyiso uri vha fheliswe,+ naa a wo ngo ṋaṋisa honoho vhupombwe hau?
21 Wo vhulaya vharwa vhanga wa vha ṋekedza sa tshiṱhavhelo nga u vha posa muliloni.+
22 Musi u tshi khou ita zwithu zwau zwoṱhe zwi nengisaho na vhupombwe hau, a wo ngo humbula maḓuvha a musi u tshi kha ḓi vha muswa, musi u fhedzi u tshi khou raha-raha nṱha ha malofha au.
23 U ḓo ḓelwa nga khombo+ nga nṱhani ha vhuvhi hau hoṱhe he wa vhu ita,’ u ralo Yehova Murena Muvhusahoṱhe.
24 ‘Wo ḓiitela tshikwara na fhethu ha vhurabeli khoroni iṅwe na iṅwe.
25 Wo fhaṱa fhethu hau ha vhurabeli nḓilani dzoṱhe dzi ḓivheaho vhukuma, wa ita uri lunako lwau lu vhe tshithu tshi nengisaho nga u ḓiṋekedzela kha vhoṱhe vha fhiraho nga nḓila,+ wa ṋaṋisa mishumo yau ya vhupombwe.+
26 Wo ita vhupombwe na vharwa vha Egipita,+ vhahura vhau vha re na nyemulo, wo ntsinyusa nga vhupombwe hau vhu sa vhalei.
27 Zwino ndi ḓo u imisela tshanḓa tshanga nda u pfisa vhuṱungu nda fhelisa na zwiḽiwa zwau,+ nda u kumedzela zwanḓani zwa vhafumakadzi vha u vhengaho,+ vhane vha vha vhananyana vha Vhafilisita, vha vhengiwaho nga nṱhani ha u ḓifara luvhi.+
28 “‘Ngauri wo vha u songo fushea, wo ita vhupombwe na vharwa vha Asuri,+ fhedzi musi wo no ita honoho vhupombwe navho, wo ḓi sala u songo fushea.
29 Nga zwenezwo, wa ṋaṋisa vhupombwe hau na shangoni ḽa vharengisi* na kha Vhakaladea,+ fhedzi wa ḓi sala u songo fushea.
30 Wo vha u tshi khou lwala vhukuma,’* u ralo Yehova Murena Muvhusahoṱhe, ‘musi u tshi ita hezwi zwithu zwoṱhe, u tshi ḓifara sa phombwe i si na ṱhoni!+
31 Musi u tshi ita tshikwara tshau nḓilani dzoṱhe dzi ḓivheaho vhukuma na u ita fhethu hau ha vhurabeli khoroni dzoṱhe, wo vha u sa ngi vhaṅwe vhane vha rengisa muvhili, ngauri wo vha u sa ṱoḓi u badelwa.
32 U mufumakadzi wa phombwe, ane a funa vhatsinda nṱhani ha munna wawe!+
33 Vhathu vha ṋea phombwe dzoṱhe tshifhiwa,+ fhedzi iwe wo ṋea zwifhiwa vhoṱhe vha u emulaho,+ wa renga vhane vha bva thungo dzoṱhe uri vha ḓe vha ite vhupombwe na iwe.+
34 A u fani na vhaṅwe vhafumakadzi vhane vha ita vhupombwe. A hu na ane a ita vhupombwe u fana na iwe! U badela vhaṅwe, fhedzi vhone a vha u badeli. Zwine wa ita a zwi fani na zwa vhaṅwe.’
35 “Zwino ipfa zwine Yehova a amba iwe phombwe.+
36 Yehova Murena Muvhusahoṱhe u ri: ‘Ngauri wo emula lwo kalulaho na u vhonelwa musi u tshi khou ita vhupombwe na vhafunwa vhau na mishumo yau yoṱhe i nengisaho, midzimu yau ya zwifanyiso i nengisaho*+ ye wa i itela tshiṱhavhelo tsha malofha a vharwa vhau,+
37 ndi ngazwo ndi tshi khou kuvhanganya vhafunwa vhau vhoṱhe vhe wa vha takadza, vhoṱhe vhane wa vha funa na vhoṱhe vhane wa vha vhenga. Ndi ḓo vha kuvhanganya vhoṱhe vha u ḓela vha tshi bva thungo dzoṱhe, nda ita uri vha u vhonele, vha ḓo u vhonela u fhedzi.+
38 “‘Ndi ḓo u pfisa vhuṱungu nga khaṱhulo yo teaho dziphombwe+ na vhafumakadzi vha shululaho malofha,+ malofha au a ḓo shululwa ndi na mbiti na vivho.+
39 Ndi ḓo u kumedzela zwanḓani zwavho, vha ḓo thutha zwikwara zwau na fhethu hau ha vhurabeli;+ vha ḓo u bvula zwiambaro na u u dzhiela dzhuweḽari* dzau+ dzo nakaho,+ vha u sia u songo ambara, u fhedzi.
40 Vha ḓo u ḓela vhe gogo,+ vha ḓo u kanḓa nga matombo+ vha u vhulaya nga mabanga avho.+
41 Vha ḓo fhisa nnḓu dzau nga mulilo+ na u u haṱula phanḓa ha vhafumakadzi vhanzhi; ndi ḓo fhelisa vhupombwe hau,+ u si tsha vha badela.
42 Ndi ḓo fhelisa mbiti dzanga nga iwe,+ ndi si tsha u sinyutshela;+ nda dzika ndi si tsha sinyuwa.’
43 “‘Ngauri a wo ngo humbula maḓuvha a musi u tshee muswa,+ wo ntsinyusa nga u ita zwenezwi zwithu zwoṱhe, zwino ndi ḓo u ḓisela masiandoitwa a nḓila dzau,’ u ralo Yehova Murena Muvhusahoṱhe, ‘a u tsha ḓo dovha wa ḓifara luvhi na u ita mishumo yau yoṱhe i nengisaho.
44 “‘Muṅwe na muṅwe u ḓo amba hezwi kha iwe: “Ndi ṅwananyana o dzhielaho mme awe!”+
45 Wo dzhiela mme au, we a vha a tshi vhenga munna wawe na vhana vhawe. Wo dzhiela vhana vha mme au, vha vhengaho vhanna vhavho na vhana vhavho. Mme au o vha e Muhethe, khotsi au o vha e Muamori.’”+
46 “‘Mukomana wau ndi Samaria,+ u dzula ngei devhula na vhananyana* vhawe,+ murathu wau ndi Sodoma,+ u dzula ngei tshipembe na vhananyana vhawe.+
47 A wo ngo tshimbila nḓilani dzavho na u tevhedza mishumo yavho i nengisaho fhedzi, nṱhani hazwo wo kaludza vhuḓifari hau nga tshifhinganyana ha fhira havho.+
48 Ndi ana nga vhutshilo hanga,’ u ralo Yehova Murena Muvhusahoṱhe, ‘Sodoma murathu wau na vhananyana vhawe a vho ngo ita zwe iwe na vhananyana vhau na zwi ita.
49 Vhukhakhi ha Sodoma murathu wau ndi hovhu: Ene na vhananyana vhawe+ vho vha vha tshi ḓihudza+ vhe na zwiḽiwa zwinzhi,+ vhe na mulalo;+ naho zwo ralo, a vho ngo thusa o tsikeledzeaho na mushai.+
50 Vho bvela phanḓa vha tshi ḓikukumusa+ na u ita zwi nengisaho ndi tshi zwi vhona,+ ndi ngazwo ndo vhona zwo tea uri vha fheliswe.+
51 “‘Na Samaria+ ho ngo ita zwivhi zwo no lingana na zwau. Wo bvela phanḓa u tshi ita mishumo yau minzhi i nengisaho u vha fhira, zwe zwa ita uri vhana vha mme au vha vhonale vhe vhavhuya nga nṱhani ha mishumo yau yoṱhe i nengisaho.+
52 Nge wa ṱanganedza vhuḓifari ha vhana vha mme au, zwi ḓo ita uri u nyadziwe. Vho no vha vhavhuya u u fhira nga nṱhani ha tshivhi tshau tsha u ḓifara nga nḓila i nengisaho. Zwino u ḓo farwa nga ṱhoni na u nyadziwa nge wa ita uri vhana vha mme au vha vhonale vhe vhavhuya.’
53 “‘Ndi ḓo kuvhanganya mathubwa avho, mathubwa a Sodoma na vhananyana vhawe na mathubwa a Samaria na vhananyana vhawe; ndi ḓo dovha nda kuvhanganya mathubwa au khathihi navho,+
54 uri u konḓelele u nyadziwa; u ḓo shona nga nṱhani ha zwe wa ita u tshi vha khuthadza.
55 Sodoma murathu wau na vhananyana vhawe, vha ḓo vhuyelela kha vhuimo he vha vha vhe khaho, Samaria mukomana wau na vhananyana vhawe vha ḓo vhuyelela kha vhuimo he vha vha vhe khaho na iwe na vhananyana vhau ni ḓo vhuyelela kha vhuimo he na vha ni khaho.+
56 Musi u tshi kha ḓi ḓihudza wo vha u sa ambi nga ha Sodoma murathu wau,
57 musi vhuvhi hau vhu sa athu u bviselwa khagala.+ Zwino vhananyana vha Siria na vhahura vhawe vha a u nyadza, na vhananyana vha Vhafilisita,+ vhoṱhe vho u tangaho vha a u goḓa.
58 U ḓo sedzana na masiandoitwa a u ḓifara luvhi na a mishumo yau i nengisaho,’ u ralo Yehova.”
59 “Ngauri Yehova Murena Muvhusahoṱhe u ri: ‘Zwino ndi ḓo u ita zwe wa ita,+ ngauri wo nyadza muano nga u pfuka mulanga wanga.+
60 Fhedzi nṋe ndi ḓo humbula mulanga we nda u vhofha na iwe misi iḽa u tshee muswa, nda vhofha na iwe mulanga wa tshoṱhe.+
61 U ḓo humbula vhuḓifari hau wa shona+ musi u tshi ṱanganedza vhana vha mme au, vhane vha vha vhakomana vhau khathihi na vharathu vhau, ndi ḓo u ṋea vhone uri vha vhe vhananyana vhau, hu si nga nṱhani ha mulanga wau.’
62 “‘Ndi ḓo vhofha mulanga wanga na iwe; ndi hone u tshi ḓo ḓivha uri ndi nṋe Yehova.
63 Ndi hone u tshi ḓo zwi humbula, wa shona+ na u vula mulomo wau nga nṱhani ha ṱhoni dzau, musi ndi tshi u itela tshipfumelelo hu sa londwi zwoṱhe zwe wa ita,’+ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Kana “phashane, navhula.”
^ Thevhedz., “Dzina.”
^ Kana “madzanga.”
^ Midzimu ya zwifanyiso ya zwivhumbeo zwa vhanna.
^ Thevhedz., “Kanana.”
^ Kana khamusi, “Ndo vha ndo u sinyutshela zwihulu.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “madzanga.”
^ Khamusi zwi khou ambela kha miḓana i re tsini.
