Hesekiele 17:1-24
17 Yehova a dovha a amba na nṋe a ri:
2 “Murwa muthu, amba thai na murero nga ha vha nnḓu ya Isiraele.+
3 U vha vhudze uri, ‘Yehova Murena Muvhusahoṱhe u ri: “Goni ḽihulu+ ḽi re na maphapha mahulu na mathenga malapfu a re na mivhala, ḽo ḓa Libanoni+ ḽa ṱhukhula ṱhodzi ya muri wa muṱaululo.+
4 Ḽa ṱhukhula lutavhi lu re nṱha-nṱha ḽa lu isa shangoni ḽa vharengisi,* ḽa lu vhea muḓini wa vharengisi.+
5 Ḽa dzhia iṅwe mbeu ya ḽeneḽo shango+ ḽa i ṱavha tsimuni. Ḽa i ṱavha tsini na maḓi manzhi u fana na muri wa muṋengeledzi.
6 Ya mela ya vha munḓirivhe mupfufhi wo ṋavhaho une maṱari awo a si lapfe,+ midzi yawo yo ṱoka fhasi. Wa vha munḓirivhe une wa vha na tavhi.+
7 “‘“Ha ḓa ḽiṅwe goni ḽihulu,+ ḽi na maphapha mahulu na mathenga malapfu.+ Wonoyo munḓirivhe wa ita uri midzi yawo i ṋavhe i tshi ya khaḽo kule na he wa vha wo ṱavhiwa hone, wa ita uri maṱari awo a ye khaḽo uri ḽi kone u u sheledza.+
8 Wo vha wo ṱavhiwa fhethu havhuḓi tsini na maḓi manzhi, uri u kone u vha na maṱari, u aṋwe mitshelo u vhe munḓirivhe muhulu.”’+
9 “U vha vhudze uri, ‘Yehova Murena Muvhusahoṱhe u ri: “Naa u ḓo aluwa? Naa muthu a nga si tumule midzi+ yawo a ita uri mitshelo yawo i sine na maṱari awo a pute?+ U ḓo oma lune ha sa ḓo ṱoḓea muthu a re na maanḓa kana vhathu vhanzhi uri vha u tupule na midzi.
10 Naho wa ṱavhiwa huṅwe fhethu, naa u ḓo aluwa? Naa a u nga ḓo puta musi muya wa vhubvaḓuvha u tshi u vhudzula? U ḓo puta ḓakani he wa mela hone.”’”
11 Yehova a dovha a amba na nṋe a ri:
12 “Vhudza vha nnḓu ya mashandukwa u ri, ‘Naa a ni ṱhogomeli uri zwenezwi zwithu zwi amba mini?’ U vha vhudze u ri, ‘Khosi ya Babele yo ḓa Yerusalema ya dzhia khosi na vhakololo, ya vha isa Babele.+
13 Zwiṅwe hafhu, yo dzhia ṅwana* wa musanda+ ya vhofha mulanga nae ya mu anisa.+ Ya thuba na vhanna vha vhuimo ha nṱha vha ḽeneḽo shango,+
14 u itela uri muvhuso u si tsha vha na maanḓa, u si tsha dovha wa hula, uri wonoyo muvhuso u si bvele phanḓa arali u sa tevhedzi mulanga wayo.+
15 Fhedzi yeneyo khosi ya Yuda ya shandukela khosi ya Babele+ nga u rumela vhaḓinḓa vhayo uri vha ye Egipita vha wane bere+ na mmbi khulu.+ Naa i ḓo kunda? Naa muthu ane a khou ita zwenezwo ha nga pfiswi vhuṱungu? Naa i nga vunḓa mulanga ya si itwe tshithu?’+
16 “‘“Ndi ana nga vhutshilo hanga,” u ralo Yehova Murena Muvhusahoṱhe, “khosi i ḓo fela Babele fhethu hune ha dzula khosi* ye ya i* vhea, ngauri yo nyadza muano wa yeneyo khosi na u vunḓa mulanga wayo.+
17 Na mmbi khulu na maswole manzhi a Farao a nga si thuse nndwani,+ musi muḓi u tshi tangiwa na u fhaṱelwa mbondo uri hu vhulawe vhathu vhanzhi.
18 Yeneyo khosi ya Yuda yo nyadza muano na u vunḓa mulanga. Naho yo vha yo fhulufhedzisa, yo ita zwenezwo zwithu zwoṱhe, a i nga ponyoki.”’
19 “‘Zwe Yehova Murena Muvhusahoṱhe a zwi amba ndi hezwi: “Ndi ana nga vhutshilo hanga, ndi ḓo i pfisa vhuṱungu nga nṱhani ha u nyadza muano wanga+ na u vunḓa mulanga wanga.
20 Ndi ḓo i posa nga mambule anga a i fasha.+ Ndi ḓo i isa Babele nda i haṱula henefho nga nṱhani ha uri a yo ngo fhulufhedzea kha nṋe.+
21 Maswole ayo oṱhe o shavhaho a ḓo vhulawa nga banga, o salaho a balanganyelwa thungo dzoṱhe.+ Ndi hone ni tshi ḓo ḓivha uri zwo ambiwa nga nṋe Yehova.”’+
22 “‘Yehova Murena Muvhusahoṱhe u ri: “Ndi ḓo ṱhukhula lutavhi kha ṱhodzi ya muri mulapfu wa muṱaululo+ nda lu ṱavha, kha ṱhodzi ya matavhi awo ndi ḓo ṱhukhula lutavhi,+ nda lu ṱavha kha thavha khulwane yo lapfaho.+
23 Ndi ḓo lu ṱavha kha thavha khulwane ya Isiraele, matavhi alwo a ḓo hula, lwa aṋwa mitshelo lwa vha muri muhulu wa muṱaululo. Zwiṋoni zwoṱhe zwi ḓo ḓa zwa dzula khawo zwa khuda murunzini wa maṱari awo.
24 Miri yoṱhe ya ḓaka i ḓo zwi ḓivha uri ndi nṋe Yehova we a wisa muri mulapfu, a hudza muri muṱuku;+ ndo omisa muri mudala, nda ita uri muri wo omaho u bve maluvha.+ Ndi nṋe Yehova we a zwi amba na u zwi ita.”’”
Ṱhaluso dzi re magumoni a siaṱari
^ Thevhedz., “Kanana.”
^ Thevhedz., “mbeu.”
^ Ndi Nebukadanetsara.
^ Ndi Tsedekia.
