Hesekiele 19:1-14
-
Luimbo lwa tshililo lwa vharangaphanḓa vha Isiraele (1-14)
19 “Imba luimbo lwa tshililo* nga ha vharangaphanḓa vha Isiraele
2 u ri,‘Mme aṋu o vha a tshi tou vha mini? O vha e ndau* vhukati ha dzindau.
O vha a tshi shuvhama vhukati ha ndawana dza maanḓa a tshi khou alusa vhana vhawe.
3 Yo alusa vhana vhayo, iṅwe ya vha ndawana ya maanḓa.+
Ya guda u ṱhukhukanya tshe ya tshi zwima,Ya vhulaya na vhathu.
4 Vhathu vha dzitshaka vha pfa nga hayo, vha i fasha dindini ḽavho,Vha i fara nga huka vha i isa shangoni ḽa Egipita.+
5 Mme ayo a i lindela a vhuya a zwi vhona uri i nga si tsha vhuya.
Ya dzhia muṅwe wa vhana vhayo ya mu ruma ngauri o vha o no vha ndawana ya maanḓa.
6 Na yone ya tshimbila na dziṅwe ndau, ya vha ndawana ya maanḓa.
Ya guda u ṱhukhukanya tshe ya tshi zwima, ya vhulaya na vhathu.+
7 Ya dodela mitsheṱoni yavho yo khwaṱhaho na u tshinyadza miḓi yavho,Ya ita uri i pfale musi i tshi vhomba mashubini.+
8 Tshaka dza zwiṱirikini zwa henefho tsini dza ḓa dza i posa nga mambule,Dza i fasha dindini ḽadzo.
9 Dza i fara nga huka dza i valela, dza i isa kha khosi ya Babele.
Na henefho vha i valela, uri i si tsha pfala i tshi vhomba thavhani dza Isiraele.
10 Mme au o vha a tshi nga munḓirivhe+ wo ṱavhiwaho tsini na maḓi.
We wa aṋwa mitshelo wa vha na matavhi manzhi ngauri wo vha u tsini na maḓi manzhi.
11 Wa vha na matavhi madenya, ane a nga ita lubaḓa lwa vhavhusi.
Wa hula wa lapfa wa fhira miṅwe miri,Wa vhonala hoṱhe nga nṱhani ha vhulapfu hawo na nga nṱhani ha maṱari awo manzhi.
12 Fhedzi vha u sinyutshela vha u tupula+ vha u laṱela fhasi,Ha ḓa muya wa vhubvaḓuvha wa vhudzula mitshelo yawo ya oma.
Matavhi awo madenya a vunḓwa a oma,+ a fhiswa nga mulilo.+
13 Zwino wo ṱavhiwa sogani,Shangoni ḽo omaho, ḽi si na maḓi.+
14 Mulilo wa fhisa matavhi awo na mitshelo yawo,Ha sala hu si tshee na matavhi madenya, hu si tshee na lubaḓa lwa u vhusa.+
“‘Holwu ndi lwone luimbo lwa tshililo, lu ḓo shumiswa sa luimbo lwa u lila.’”