Hesekiele 20:1-49
20 Nga ṅwaha wa vhusumbe, nga ṅwedzi wa vhuṱanu, nga ḓuvha ḽa vhufumi ḽa wonoyo ṅwedzi, vhaṅwe vhahulwane vha Isiraele vho ḓa vha dzula phanḓa hanga u itela uri ndi vha vhudzisele kha Yehova.
2 Ndi hone Yehova a tshi amba na nṋe a ri:
3 “Murwa muthu, amba na vhahulwane vha Isiraele u vha vhudze uri, ‘Zwe Yehova Murena Muvhusahoṱhe a zwi amba ndi hezwi: “Ni khou ḓa u vhudzisa nṋe? ‘Ndi ana nga vhutshilo hanga, ndi nga si ni fhindule,’+ u ralo Yehova Murena Muvhusahoṱhe.”’
4 “Naa wo ḓilugiselela u vha haṱula? Iwe murwa muthu, naa wo ḓilugiselela u vha haṱula?* Vha vhudze nga ha zwithu zwi nengisaho zwe vhomakhulukuku wavho vha zwi ita.+
5 U vha vhudze uri, ‘Yehova Murena Muvhusahoṱhe u ri: “Nga ḓuvha ḽe nda nanga Isiraele,+ ndo dovha nda anela vhana* vha nnḓu ya Yakobo, nda ita uri vha nḓivhe vhe shangoni ḽa Egipita.+ Ndo vha anela nda ri, ‘Ndi nṋe Yehova Mudzimu waṋu.’
6 Nga ḽeneḽo ḓuvha ndo ana uri ndi ḓo vha bvisa ngei shangoni ḽa Egipita nda vha isa shangoni ḽe nda vha ṱoḓela ḽone, shango ḽi elelaho mafhi na mutoli.+ Ḽo vha ḽi shango ḽo nakaho u fhira oṱhe.
7 Ndo vha vhudza uri, ‘Muṅwe na muṅwe a laṱe zwi nengisaho zwine a vha nazwo; uri ni si ḓitshikafhadze nga midzimu ya zwifanyiso i nengisaho* ya Egipita.+ Ndi nṋe Yehova Mudzimu waṋu.’+
8 “‘“Fhedzi vha ntshandukela vha si nthetshelese. A vho ngo laṱa zwithu zwi nengisaho zwe vha vha vhe nazwo, a vho ngo ṱutshela midzimu ya zwifanyiso i nengisaho ya Egipita.+ Ngauralo, nda fhulufhedzisa uri ndi ḓo vha shululela mbiti dzanga na u vha sinyutshela shangoni ḽa Egipita.
9 Nda dzhia vhukando ndi tshi itela uri dzina ḽanga ḽi si tshikafhadzwe phanḓa ha tshaka dze vha vha vha tshi dzula vhukati hadzo.+ Ngauri ndo ita uri vha* nḓivhe phanḓa ha dzenedzo tshaka musi ndi tshi vha* bvisa shangoni ḽa Egipita.+
10 Nga zwenezwo, nda vha bvisa shangoni ḽa Egipita nda vha isa sogani.+
11 “‘“Nda vha ṋea milayo yanga na u ita uri vha ḓivhe khaṱhulo dzanga,+ uri muthu ane a dzi tevhedza a tshile.+
12 Ndo dovha nda vha ṋea na maḓuvha a savhatha+ uri a vhe tshiga vhukati hanga navho,+ uri vha kone u ḓivha uri ndi nṋe Yehova ane a vha ita vhakhethwa.
13 “‘“Fhedzi vha nnḓu ya Isiraele vha ntshandukela sogani.+ Vha si tevhedze maitele anga, vha landula khaṱhulo dzanga dzine dza ita uri ane a dzi tevhedza a tshile. Vho tshikafhadza tshoṱhe savhatha dzanga. Nga zwenezwo, nda fhulufhedzisa uri ndi ḓo vha shululela mbiti dzanga ngei sogani uri ndi vha fhelise.+
14 Nda dzhia vhukando ndi tshi itela uri dzina ḽanga ḽi si tshikafhadzwe phanḓa ha tshaka dze nda vha* bvisa khadzo dzi tshi zwi vhona.+
15 Ndo dovha nda ana sogani uri ndi nga si vha ise shangoni ḽe nda vha ṋea ḽone,+ shango ḽi elelaho mafhi na mutoli,+ shango ḽo nakaho u fhira oṱhe,
16 ngauri vho landula khaṱhulo dzanga vha si tevhedze maitele anga, vha tshikafhadza savhatha dzanga, nga nṱhani ha uri mbilu dzavho dzo vha dzi tshi khou tevhela midzimu ya zwifanyiso i nengisaho.+
17 “‘“Fhedzi nda vha pfela vhuṱungu nda si vha fhelise; nda si vha vhulaye sogani.
18 Nda vhudza vharwa vhavho musi vhe sogani+ nda ri, ‘Ni songo tevhedza maitele a vhomakhulukuku waṋu+ kana u tevhedza nḓila ye vha vha vha tshi haṱula ngayo kana na ḓitshikafhadza nga midzimu yavho ya zwifanyiso i nengisaho.
19 Ndi nṋe Yehova Mudzimu waṋu. Tshimbilani nga maitele anga ni tevhedze nḓila ine nda haṱula ngayo.+
20 Ni ite uri savhatha+ dzanga dzi vhe khethwa, uri dzi vhe tshiga vhukati hanga na inwi uri ni ḓivhe uri ndi nṋe Yehova Mudzimu waṋu.’+
21 “‘“Fhedzi vharwa vhavho vha ntshandukela.+ Vha si tevhedze maitele anga, vha si thetshelese na u haṱula nga nḓila ine nda haṱula ngayo, zwine zwa ita uri ane a zwi tevhedza a tshile. Vho tshikafhadza savhatha dzanga. Nda fhulufhedzisa uri ndi ḓo vha shululela mbiti dzanga na u vha sinyutshela ngei sogani.+
22 Nda ḓifara+ ndi tshi itela uri dzina ḽanga+ ḽi si tshikafhadzwe phanḓa ha tshaka, dze nda vha* bvisa khadzo dzi tshi zwi vhona.
23 Zwiṅwe hafhu, nda vha anela ngei sogani uri ndi ḓo vha balanganyela kha tshaka nda vha pandelela kha maṅwe mashango,+
24 ngauri a vho ngo tevhedza nḓila ine nda haṱula ngayo, vho laṱa maitele anga,+ vha tshikafhadza savhatha dzanga, vha tevhela midzimu ya zwifanyiso i nengisaho ya vhomakhulukuku wavho.+
25 Nda vha litsha vha tshi tevhedza maitele a songo lugaho na kuhaṱulele kune kwa ḓo vha isa lufuni.+
26 Ndo vha tendela vha tshi ḓitshikafhadza nga zwiṱhavhelo zwavho, musi vha tshi posa matanzhe avho muliloni,+ uri vha hanganee, vha kone u ḓivha uri ndi nṋe Yehova.”’
27 “Iwe murwa muthu, amba na vha nnḓu ya Isiraele, u vha vhudze uri, ‘Yehova Murena Muvhusahoṱhe u ri: “Na vhomakhulukuku waṋu vho ntsema nge vha si fhulufhedzee kha nṋe.
28 Nda vha isa shangoni ḽe nda vha anela ḽone.+ Musi vha tshi vhona zwikwara zwoṱhe na miri ya maṱari mahulu,+ vha ṋekedza zwiṱhavhelo na zwifhiwa zwavho zwine zwa ntsinyusa. Vha ṋekedza zwiṱhavhelo zwavho zwi nukhelelaho na u tevhula zwifhiwa zwavho zwa u nwiwa henefho.
29 Nda vha vhudzisa uri, ‘Fhethu afha hune na ya hone hune ha vhidzwa fhethu ha vhurabeli hu itwa mini? (Hu kha ḓi vhidzwa Fhethu ha Vhurabeli na ṋamusi.)’”’+
30 “Zwino vhudza vha nnḓu ya Isiraele uri, ‘Yehova Murena Muvhusahoṱhe u ri: “Naa ni khou ḓitshikafhadza u fana na zwe vhomakhulukuku waṋu vha zwi ita vha tshi tevhela midzimu yavho ya zwifanyiso i nengisaho vha si fhulufhedzee kha nṋe?*+
31 Naa na ṋamusi ni kha ḓi ḓitshikafhadza nga u ṋekedza zwiṱhavhelo midzimu yaṋu yoṱhe ya zwifanyiso i nengisaho, na u posa vharwa vhaṋu muliloni?+ Inwi vha nnḓu ya Isiraele, naa ndi fanela u ni fhindula?”’+
“‘Ndi ana nga vhutshilo hanga,’ u ralo Yehova Murena Muvhusahoṱhe, ‘A thi nga ni fhinduli.+
32 Zwine na zwi elekanya musi ni tshi ri, “Kha ri nge dziṅwe tshaka, ri fane na miṅwe miṱa ya maṅwe mashango ine ya gwadamela thanda na tombo,”+ a zwi nga ḓo vhuya zwa itea.’”
33 “‘Ndi ana nga vhutshilo hanga,’ u ralo Yehova Murena Muvhusahoṱhe, ‘ndi ḓo ni vhusa nga tshanḓa tsha maanḓa, ndo imisela nṱha tshanḓa tshanga, ndi na mbiti.+
34 Ndi ḓo ni bvisa vhukati ha dzitshaka nda ni kuvhanganya ni tshi bva mashangoni e nda ni balanganyela khao nga tshanḓa tshanga tsha maanḓa, ndo imisela nṱha tshanḓa tshanga, ndi na mbiti.+
35 Ndi ḓo ni isa sogani ḽa dzitshaka nda ni haṱula ro livhana zwifhaṱuwo.+
36 “‘Samusi ndo haṱula vhomakhulukuku waṋu sogani ḽa Egipita, na inwi ndi ḓo ni haṱula,’ u ralo Yehova Murena Muvhusahoṱhe.
37 ‘Ndi ḓo ita uri ni fhire nga fhasi ha lubaḓa lwa mulisa,+ nda ita uri ni vhe nga fhasi ha mulanga.
38 Fhedzi ndi ḓo bvisa vha mashandukwa vhukati haṋu na vhane vha nkhakhela.+ Ndi ḓo vha bvisa shangoni ḽine vha vha vhatsinda khaḽo, fhedzi a vha nga dzheni shangoni ḽa Isiraele;+ ndi hone ni tshi ḓo ḓivha uri ndi nṋe Yehova.’
39 “Inwi vha nnḓu ya Isiraele, Yehova Murena Muvhusahoṱhe u ri: ‘Muṅwe na muṅwe waṋu nga a ṱuwe a ye a shumele midzimu yawe ya zwifanyiso i nengisaho.+ Nga murahu arali na sa nthetshelesa ndi ḓo ni laṱa, ni si tsha bvela phanḓa ni tshi tshikafhadza dzina ḽanga ḽikhethwa nga zwiṱhavhelo zwaṋu na nga midzimu yaṋu ya zwifanyiso i nengisaho.’+
40 “‘Ngauri thavhani yanga khethwa, kha thavha ndapfu ya Isiraele,’+ u ralo Yehova Murena Muvhusahoṱhe, ‘ndi henefho hune vha nnḓu yoṱhe ya Isiraele, vhathu vhoṱhe, vha ḓo ntshumela hone.+ Ndi ḓo vha takalela vhe henefho, ndi ḓo ṱoḓa miṋeelo yaṋu na zwiranzhe zwa zwifhiwa, zwithu zwaṋu zwoṱhe zwikhethwa.+
41 Nga nṱhani ha munukhelelo wavhuḓi, ndi ḓo takala musi ndi tshi ni bvisa vhukati ha dzitshaka na u ni kuvhanganya ni tshi bva mashangoni e na balanganyelwa khao;+ ndi ḓo vha mukhethwa kha inwi musi tshaka dzi tshi zwi vhona.’+
42 “‘Ndi hone ni tshi ḓo ḓivha uri ndi nṋe Yehova+ musi ndi tshi ni isa shangoni ḽa Isiraele,+ shango ḽe nda anela vhomakhulukuku waṋu uri ndi ḓo ni ṋea ḽone.
43 Musi no no swika henengei ni ḓo humbula mishumo yaṋu ye na ḓitshikafhadza ngayo,+ na ḓinengwa nga nṱhani ha mishumo yaṋu mivhi ye na i ita.+
44 Ndi hone ni tshi ḓo ḓivha uri ndi nṋe Yehova musi ndi tshi ni dzhiela vhukando ndi tshi itela dzina ḽanga,+ hu si u ya nga vhuḓifari haṋu vhu si havhuḓi kana nga u sa fhulufhedzea haṋu inwi vha nnḓu ya Isiraele,’ u ralo Yehova Murena Muvhusahoṱhe.”
45 Yehova a dovha a amba na nṋe a ri:
46 “Murwa muthu, rembuluwa u lavhelese thungo ya tshipembe, u ḓivhadze tshipembe, u porofitele ḓaka ḽa tshipembe.
47 Vhudza ḓaka ḽa tshipembe uri, ‘Ipfa zwe Yehova a amba. Zwe Yehova Murena Muvhusahoṱhe a zwi amba ndi hezwi: “Ndi khou u ḓisela mulilo,+ u ḓo fhisa miri yoṱhe midala na miri yoṱhe yo omaho i re kha iwe. Wonoyo mulilo a u nga dzimiwi,+ u ḓo fhisa tshifhaṱuwo tsha muṅwe na muṅwe u bva devhula u swika tshipembe.
48 Vhathu* vhoṱhe vha ḓo vhona uri ndi nṋe Yehova, we a ḽi fhisa nga mulilo, u nga si dzimiwe.”’”+
49 Nda ri: “Yowee, Yehova Murena Muvhusahoṱhe! Vha tshi nnyamba vha ri, ‘Naa ha khou sokou amba nga dzithai?’”
Ṱhaluso dzi re magumoni a siaṱari
^ Kana “u vha ḓivhadza khaṱhulo yavho.”
^ Thevhedz., “mbeu.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Ndi Isiraele.
^ Ndi Isiraele.
^ Ndi Isiraele.
^ Ndi Isiraele.
^ Kana “vha ita vhupombwe ha lwa muya?”
^ Thevhedz., “Ṋama.”
