Hesekiele 21:1-32
21 Yehova a dovha a amba na nṋe a ri:
2 “Murwa muthu, lavhelesa Yerusalema, u ḓivhadze nga ha fhethu hukhethwa, u porofite nga ha shango ḽa Isiraele.
3 U ambe na shango ḽa Isiraele uri, ‘Yehova u ri: “Ndi lwa na inwi, ndi ḓo bvisa banga ḽanga tshipatshini+ nda vhulaya vhavhuya na vhavhi vha re vhukati haṋu.
4 Ngauri ndi ḓo vhulaya vhavhuya na vhavhi vha re vhukati haṋu, ndi ḓo bvisa banga ḽanga uri ḽi vhulaye vhathu* vhoṱhe, u bva tshipembe u ya devhula.
5 Ndi hone vhathu vhoṱhe vha tshi ḓo ḓivha uri nṋe Yehova ndo bvisa banga ḽanga tshipatshini. A thi tsha ḓo ḽi humisela.”’+
6 “Iwe murwa muthu, gomela nga nyofho, u gomele lwa vhuṱungu phanḓa havho.+
7 Arali vha u vhudzisa uri, ‘Ndi ngani u tshi khou gomela?’ u vha fhindule u ri, ‘Ndi ngauri ndo pfa muvhigo.’ Zwi ḓo itea, vhathu vhoṱhe vha ḓo tshuwa, vha kulea nungo, vha ṱungufhala na magona avho oṱhe a rotha maḓi.*+ ‘Zwi ḓo itea zwa vhukuma,’ u ralo Yehova Murena Muvhusahoṱhe.”
8 Yehova a dovha a amba na nṋe a ri:
9 “Murwa muthu, porofita u ri, ‘Yehova u ri: “U vha vhudze uri, ‘Banga+ ḽo ṱuṱulwa na u pholishiwa.
10 Ḽo ṱuṱulelwa u vhulaya vhathu vhanzhi; ḽo pholishiwa uri ḽi penye sa lupenyo.’”’”
“Naa a ro ngo fanela u takala?”
“‘Naa ḽi* ḓo litsha lubaḓa lwa murwa wanga,+ ngeno ḽi tshi khou rema miri yoṱhe?
11 “‘Ḽo ṋewa muthu uri a ḽi pholishe na u vhulaya ngaḽo. Ḽeneḽi banga ḽo ṱuṱulwa na u pholishiwa uri ḽi ṋewe muvhulayi.+
12 “‘Murwa muthu, lila u ṱungufhale,+ ngauri ḽi ḓo ḓela vhathu vhanga; ḽi ḓo vhulaya vharangaphanḓa vhoṱhe vha Isiraele.+ Vha ḓo vhulawa nga banga khathihi na vhathu vhanga. Ḓirwe tshirumbi wo ṱungufhala.
13 Ngauri ho ṱolisiswa,+ hu ḓo itea mini arali banga ḽa litsha u rema lubaḓa? A lu* tsha ḓo vha hone,’+ u ralo Yehova Murena Muvhusahoṱhe.
14 “Iwe murwa muthu, porofita u vhande zwanḓa u ambe luraru u ri, ‘Banga!’ Ndi banga ḽine ḽa vhulaya vhathu vha ndeme ḽo vha tangaho.+
15 Mbilu dzavho dzi ḓo ṋoka nga nyofho,+ vha ḓo vhulawa khoroni dza miḓi yavho; ndi ḓo vhulaya vhathu vhanzhi nga banga. Ḽi penya sa lupenyo, ḽo pholisheliwa u vhulaya!
16 Banga kha ḽi reme thungo ya tsha u ḽa! Kha ḽi reme na thungo ya tsha monde! Ḽi reme thungo dzoṱhe!
17 Na nṋe ndi ḓo vhanda zwanḓa nda dzikisa mbiti dzanga.+ Ho amba nṋe Yehova.”
18 Yehova a dovha a amba na nṋe a ri:
19 “Iwe murwa muthu, u swaye nḓila mbili dzine banga ḽa khosi ya Babele ḽa ḓo ḓa ngadzo. Dzenedzo nḓila mbili dzi ḓo bva shangoni ḽithihi, hu vhewe tshiga mafhandeni a nḓila dza miḓi mivhili.
20 U swaye iṅwe nḓila ine banga ḽa ḓo ya ngayo kha muḓi wa Raba+ wa Vhaamoni, iṅwe i ḓo vha ya u yela muḓini wo khwaṱhaho wa Yerusalema+ ngei Yuda.
21 Ngauri khosi ya Babele yo swika ya ima uri i bvumbe musi i mafhandeni a nḓila, hune nḓila mbili dza fhandekana hone. Ya dzungudza misevhe. Ya vhudzisa midzimu yayo ya zwifanyiso;* ya shumisa tshivhindi u bvumba.
22 Zwe ya vhona kha tshanḓa tsha u ḽa zwo i sumbedza uri i ye Yerusalema u ita matanda a u kwasha luvhondo, u ṋea ndaela ya u vhulaya, u ṱavha mukosi wa nndwa, u vhea matanda a u kwasha dzikhoro u itela u fhaṱa mitsheṱo ya u tanga na u tanga muḓi nga luvhondo.+
23 Fhedzi zwi ḓo nga ndi mazwifhi kha vhe* vha ita muano navho.+ Fhedzi i ḓo humbula mulandu wavho ya vha thuba.+
24 “Yehova Murena Muvhusahoṱhe u ri: ‘No ita uri mulandu waṋu u humbulwe na u bvukulula vhukhakhi haṋu na u ita uri zwivhi zwaṋu zwi vhonale kha mishumo yaṋu yoṱhe. Samusi zwino no humbulwa, ni ḓo dzhiiwa nga khani.’
25 “Fhedzi ḓuvha ḽau ḽo swika, iwe wo huvhadzwaho, iwe murangaphanḓa muvhi wa Isiraele,+ tshifhinga tsha uri u pfiswe vhuṱungu lwa u fhedza tsho swika.
26 Yehova Murena Muvhusahoṱhe u ri: ‘Bvula dugu yau na khare yau.+ A zwi nga dzuli zwo ralo.+ Wa vhuimo ha fhasi u mu takusele nṱha,+ wa vhuimo ha nṱha u mu tsitsele fhasi.+
27 Ndi ḓo tshinyadza yeneyo khare. A i nga vhi na muṋe u swika ane a fanelea a tshi swika,+ nda mu ṋea yone.’+
28 “Iwe murwa muthu, porofita u ambe u ri, ‘Yehova Murena Muvhusahoṱhe o amba hezwi nga ha Vhaamoni na nga ha zwigoḓo zwavho.’ U ambe u ri, ‘Banga ḽi khou ḓa u vhulaya; ḽo pholisheliwa u vhulaya na uri ḽi penye sa lupenyo.
29 Hu sa londwi mabono a mazwifhi na u bvumba zwa mazwifhi hu tshi ambiwa nga ha inwi, ni ḓo kuvhanganywa na vhavhi vho vhulawaho vhane maḓuvha avho o swika, tshifhinga tshavho tsha u pfiswa vhuṱungu tsho swika.
30 Banga kha ḽi vhuyedzedzwe tshipatshini tshaḽo. Ndi ḓo u haṱulela fhethu he wa bebelwa hone kha shango ḽine wa bva khaḽo.
31 Ndi ḓo u sinyutshela. Ndi ḓo u vhudzulela mulilo wa mbiti dzanga, nda u kumedzela zwanḓani zwa vhanna vha tshiṱuhu, vha re na vhutsila ha u fhelisa.+
32 U ḓo vha khuni dza u khuṱhedza mulilo;+ malofha au a ḓo shululwa, a u tsha ḓo humbulwa, ho amba nṋe Yehova.’”
Ṱhaluso dzi re magumoni a siaṱari
^ Thevhedz., “ṋama.”
^ Nga u ḓirundela ngauri vha khou ofha.
^ Ndi banga ḽa Yehova.
^ Kana “Lubaḓa a lu.”
^ Thevhedz., “terafimi.”
^ Ndi vhadzulapo vha Yerusalema.
