Hesekiele 22:1-31
22 Yehova a dovha a amba na nṋe, a ri:
2 “Iwe murwa muthu, naa wo ḓilugiselela u ḓivhadza khaṱhulo* kha muḓi u re na mulandu wa malofha+ na u u ḓivhadza zwithu zwawo zwoṱhe zwi nengisaho?+
3 U ambe uri, ‘Yehova Murena Muvhusahoṱhe u ri: “Iwe muḓi une wa shulula malofha,+ tshifhinga tshau tshi khou ḓa,+ iwe ane wa ita midzimu ya zwifanyiso i nengisaho* uri u ḓitshikafhadze,+
4 u shulula malofha zwo ita uri u vhe na mulandu,+ midzimu yau ya zwifanyiso i nengisaho yo ita uri u vhe na tshika.+ Wo ita uri maḓuvha a u fheliswa hau a swike nga u ṱavhanya, miṅwaha yau i tsini na u fhela. Ndi ngazwo ndi tshi ḓo ita uri u nyadziwe nga dzitshaka na u goḓiwa mashangoni oṱhe.+
5 Mashango a re tsini na iwe na a re kule a ḓo u goḓa,+ iwe ane dzina ḽau ḽa vha na tshika, wa dovha wa ḓala dzikhakhathi.
6 Murangaphanḓa muṅwe na muṅwe wa Isiraele u shumisa maanḓa awe u itela u shulula malofha.+
7 Kha iwe vhokhotsi na vhomme vha a nyadziwa.+ Vha fhura mutsinda, vha tambudza ṅwana a si na khotsi* na tshilikadzi.”’”+
8 “‘Wo nyadza fhethu hanga hukhethwa, wa tshikafhadza savhatha dzanga.+
9 Kha iwe hu na vhane vha tshinya vhaṅwe dzina,+ vhane vha ṱoḓa u shulula malofha. Kha iwe hu na vhane vha ḽa zwiṱhavhelo dzithavhani na u ḓifara luvhi.+
10 Kha iwe hu na vhane vha nyadza mmbete wa khotsi avho,+ na vhane vha tshikafhadza mufumakadzi a re maḓuvhani.+
11 Kha iwe munna u ita zwi nengisaho na mufumakadzi wa muhura wawe,+ muṅwe munna u tshikafhadza mazwale wawe nga u ḓifara luvhi,+ muṅwe munna a tshikafhadza khaladzi awe, ṅwana wa khotsi awe.+
12 Kha iwe vha ita zwa tshanḓanguvhoni vha tshi itela u shulula malofha.+ Iwe u kolodisa tshelede u tshi itela u wana nzwalelo,+ na u dzhiela vhahura vhau tshelede.+ Wo nkhangwa tshoṱhe,’ u ralo Yehova Murena Muvhusahoṱhe.
13 “‘Ndi vhanda zwanḓa zwanga nga u nengiswa nga vhufhura hau na u shululwa ha malofha hune ha itwa vhukati hau.
14 Naa u ḓo dzula u na tshivhindi na zwanḓa zwau zwa dzula zwo khwaṱha musi ndi tshi u dzhiela vhukando?+ Ho amba nṋe Yehova, ndi ḓo dzhia vhukando.
15 Ndi ḓo u balanganyela vhukati ha dzitshaka nda u balanganyela kha maṅwe mashango,+ nda fhelisa tshika dzau.+
16 U ḓo nyadziwa nga dzitshaka, ndi hone u tshi ḓo ḓivha uri ndi nṋe Yehova.’”+
17 Yehova a dovha a amba na nṋe a ri:
18 “Murwa muthu, nnḓu ya Isiraele yo no vha na tshika. Vhoṱhe vho no vha koporo, thini, tsimbi na mutobvu nga ngomu ṋanḓoni. Vho no vha tshika i bvaho kha siḽiva.+
19 “Nga zwenezwo, Yehova Murena Muvhusahoṱhe u ri: ‘Ngauri noṱhe no no vha tshika,+ ndi khou ni kuvhanganya noṱhe nga ngomu Yerusalema.
20 Samusi siḽiva, koporo, tsimbi, mutobvu na thini zwi tshi kuvhanganywa zwa iswa ṋanḓoni uri zwi kone u fhiswa nga mulilo na u ṋokiswa, na inwi ndi ḓo ni kuvhanganya ndo sinyuwa, nda ni vhudzulela mulilo na ṋoka.+
21 Ndi ḓo ni kuvhanganya nda ni vhudzulela mulilo wanga ndo sinyuwa,+ ni ḓo ṋokela nga ngomu muḓini.+
22 Samusi siḽiva i tshi ṋokiswa ṋanḓoni, na inwi ni ḓo ṋokiswa muḓini; ndi hone ni tshi ḓo ḓivha uri ndi nṋe Yehova we a ni shululela mbiti.’”
23 Yehova a dovha a amba na nṋe, a ri:
24 “Murwa muthu, amba na wonoyo muḓi u ri, ‘U shango ḽine ḽa sa ḓo kunakiswa kana u nelwa nga mvula nga ḓuvha ḽine nda ḓo vha ndo u sinyutshela.
25 Khawo vhaporofita vhawo vho ita tshimbevha,+ sa ndau i ṱhukhukanyaho tshe ya zwima.+ Vha khou fhedza vhathu. Vha khou dzhia lupfumo na madzanga. Na u ita uri vhafumakadzi vhanzhi vha vhe tshilikadzi khawo.
26 Vhotshifhe vhawo vho pfuka mulayo wanga,+ vha dzulela u tshikafhadza fhethu hanga hukhethwa.+ A vha koni u fhambanyisa zwikhethwa na zwi si zwikhethwa,+ vha kundelwa u ḓivhadza uri ndi zwifhio zwa tshika na zwo kunaho,+ vha hana u tevhedza savhatha dzanga, ndo tshikafhadzwa vhukati havho.
27 Vhakololo vha re vhukati hawo vha nga maṱarelwa* a ṱhukhukanyaho tshipuka; vha shulula malofha na u vhulaya vhathu vha tshi itela u ḓivhuyedza nga vhufhura.+
28 Fhedzi vhaporofita vhawo vha dzumba mishumo yavho mivhi. Vha vhona mabono a mazwifhi na u bvumba zwa mazwifhi,+ vha tshi ri: “Yehova Murena Muvhusahoṱhe o ri,” ngeno Yehova a songo amba.
29 Vhathu vha ḽeneḽo shango vho ita zwa vhukwila na zwa vhufhura,+ vho tambudza mushai, vha fhura mutsinda na u sa mu haṱula nga nḓila yo teaho.’
30 “‘Ndo vha ndi tshi khou ṱoḓa muthu vhukati havho ane a ḓo vusulusa mutsheṱo kana u ima phanḓa hanga a tshi itela shango uri ḽi si fheliswe,+ fhedzi a tho ngo mu wana.
31 Ndi ḓo vha sinyutshela nda vha fhelisa nga mulilo wa mbiti dzanga. Ndi ḓo vha ḓisela masiandoitwa a nḓila dzavho,’ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Thevhedz., “naa u ḓo haṱula.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “tshisiwana.”
^ Kana “mmbwa dza ḓaka.”