Hesekiele 23:1-49
23 Yehova a dovha a amba na nṋe a ri:
2 “Murwa muthu, ho vha hu na vhafumakadzi vhavhili vhane vha vha vhana vha mme.+
3 Vha thoma u rengisa muvhili ngei Egipita;+ vho zwi thoma vha tshee vhaswa. Vhe henengei maḓamu avho a puṱedzwa na khana dzavho dza farwa-farwa.
4 Muhulwane o vha a tshi pfi Ohala,* murathu wawe a tshi pfi Ohaliba.* Ndo vha ita vhanga, vha beba vharwa na vhananyana. Ohala ndi Samaria,+ Ohaliba ndi Yerusalema.
5 “Ohala o thoma u rengisa muvhili+ a tshi kha ḓi vha wanga. O emula vhafunwa vhawe,+ vhane vha vha vhahura vhawe vha Vhaasuri.+
6 Vho vha vhe vhavhusi vhane vha ambara zwiambaro zwa muvhala wa lutombo na vhathusi vha vhavhusi vhane vha vha vhaṱhannga vhavhuḓi vho ṋamelaho bere.
7 O bvela phanḓa a tshi rengisela muvhili vharwa vhavhuḓi vha Asuri, a ḓitshikafhadza+ nga midzimu ya zwifanyiso i nengisaho* ya vhenevho vhe a vha a tshi vha emula.
8 Ho ngo litsha zwa u rengisa muvhili zwe a vha a tshi zwi ita ngei Egipita, ngauri vho lala nae a tshee muswa, vha fara-fara khana yawe na u mu emula.*+
9 Ndi ngazwo ndo mu kumedzela zwanḓani zwa vhafunwa vhawe, vha vharwa vha Asuri+ vhe a vha a tshi vha emula.
10 Vho mu vhonela+ na u dzhia vharwa na vhananyana vhawe,+ vha mu vhulaya nga banga. A ḓivhiwa sa mufumakadzi ane a ḓifara luvhi, vha mu haṱula.
11 “Musi murathu wawe Ohaliba a tshi zwi vhona, nyemulo yawe ya engedzea, a rengisa muvhili u fhira mukomana wawe.+
12 O emula vhahura vhawe vhane vha vha vharwa vha Asuri,+ vhavhusi na vhathusi vha vhavhusi vho ambara zwiambaro zwa u naka vho ṋamelaho bere, vhoṱhe vhe vhaṱhannga vho nakaho.
13 Musi a tshi ḓitshikafhadza, nda ṱhogomela uri vhuvhili havho vha khou ita zwi fanaho.+
14 Fhedzi a tou ṋaṋisa mishumo yawe ya u rengisa muvhili. O vhona zwifanyiso zwa vhanna zwo olwaho kha luvhondo, zwifanyiso zwa Vhakaladea zwo olwaho nga muvhala mutswuku,
15 vhenevho vhanna vho vhofha mabannda khunduni dzavho, vho vhofha dugu khulwane ṱhohoni dzavho, vha tshi vhonala vhe vhahali, vhoṱhe vha tshi fanyisela Vhababele vho bebelwaho shangoni ḽa Vhakaladea.
16 Musi a tshi vhona zwenezwo zwifanyiso a thoma u vha emula, a rumela vhaḓinḓa khavho ngei Kaladea.+
17 Vharwa vha Babele vha ḓa vha lala nae mmbeteni wawe, vha mu tshikafhadza nga u ita zwa vhudzekani nae. Musi vho no mu tshikafhadza, a vha litsha ngauri vho vha vha tshi vho mu nengisa.
18 “Musi a tshi rengisa muvhili na u ḓipengula a si na ṱhoni,+ ndo mu litsha ngauri o vha a tshi vho nnengisa, samusi ndo litsha mukomana wawe we a vha a tshi nnengisa.+
19 O bvela phanḓa a tshi ṋaṋisa zwiito zwawe zwa u rengisa muvhili,+ a tshi humbula maḓuvha awe a vhuswa musi a tshi rengisa muvhili ngei shangoni ḽa Egipita.+
20 O vha emula sa vhafumakadzi vha vhuimo ha fhasi* vha tshi emula vhanna vhavho vha re na vhunna* vhune ha nga ha donngi na ha bere.
21 Wo vha u tshi tama u ḓifara luvhi zwe wa vha u tshi zwi ita u tshee muswa ngei Egipita+ musi vha tshi fara-fara khana yau na maḓamu au.+
22 “Ndi ngazwo Yehova Murena Muvhusahoṱhe a tshi amba na iwe Ohaliba a ri: ‘Ndi khou dzikusa vhafunwa+ vhau vhe wa vha nengwa, ndi ḓo ita uri vha u ḓele vha tshi bva thungo dzoṱhe,+
23 vharwa vha Babele+ na Vhakaladea+ vhoṱhe, vhanna vha Pekoda,+ Shoa na Koa vha ḓo ḓa na vharwa vhoṱhe vha Asuri. Vhoṱhe ndi vhanna vhavhuḓi, vhane vha vha vhavhusi na vhathusi vha vhavhusi, ndi vhahali vho nangiwaho, vha ḓo ḓa vho ṋamela bere.
24 Vha ḓo ḓa vha lwa na iwe vho ṋamela gariki dza nndwa vhe na maswole manzhi, zwiṱangu zwihulu na zwiṱangu zwiṱuku* na magondolo. Vha ḓo u tanga, ndi ḓo vha ṋea maanḓa a uri vha u haṱule, vha ḓo u haṱula nga nḓila ine vha funa.+
25 Ndi ḓo u sinyutshela, vha ḓo u fara nga nḓila ya tshiṱuhu. Vha ḓo tumula ningo na nḓevhe dzau, vho salaho vha ḓo vhulawa nga banga. Vha ḓo dzhia na vharwa vhau na vhananyana vhau, vho salaho vha ḓo fhiswa nga mulilo.+
26 Vha ḓo u bvula zwiambaro+ vha u dzhiela na dzhuweḽari*+ dzau dzavhuḓi.
27 Ndi ḓo fhelisa u ḓifara hau luvhi na u rengisa hau muvhili,+ zwe wa zwi thoma ngei shangoni ḽa Egipita.+ A u tsha ḓo vha lavhelesa, a u tsha ḓo dovha wa humbula Egipita.’
28 “Yehova Murena Muvhusahoṱhe u ri: ‘Zwino ndi khou u kumedzela zwanḓani zwa vhane wa vha vhenga, vhe wa vha litsha nga u vha nengwa.+
29 Vha ḓo u vhenga vha u dzhiela zwoṱhe zwe wa zwi shumela,+ vha u bvula vha u sia u fhedzi. Mishumo yau ya vhupombwe na u ḓifara luvhi na u rengisa hau muvhili zwi ḓo bviselwa khagala.+
30 Zwenezwi zwoṱhe zwi ḓo itea kha iwe ngauri wo pandamedza dzitshaka sa a rengisaho muvhili+ na ngauri wo ḓitshikafhadza nga midzimu yavho ya zwifanyiso i nengisaho.+
31 Wo ita zwe zwa itwa nga mukomana wau,+ ndi ḓo u ṋea tshinwelo tshawe.’+
32 “Zwe Yehova Murena Muvhusahoṱhe a zwi amba ndi hezwi:
‘U ḓo nwa tshinwelo tsho ḓalaho tsha mukomana wau,+Wa vha wa u seiwa na u nyadziwa, ngauri tshenetsho tshinwelo tsho ḓala nga zwenezwo.+
33 U ḓo kambiwa na u ṱungufhala,Nga tshinwelo tsha u tshuwa na u fheliswa,Tshenetsho ndi tshinwelo tsha mukomana wau, Samaria.
34 U ḓo tshi nwa wa tshi khobisa+ na u shenga zwipiḓa zwatshoNga murahu wa ṱhukhula maḓamu au.
“Ngauri ho amba nṋe,” u ralo Yehova Murena Muvhusahoṱhe.’
35 “Nga zwenezwo, Yehova Murena Muvhusahoṱhe u ri: ‘Nga nṱhani ha uri wo nkhangwa wa nnyadza,+ u ḓo sedzana na masiandoitwa a u ḓifara hau luvhi na a zwiito zwau zwa u rengisa muvhili.’”
36 Ndi hone Yehova a tshi amba na nṋe a ri: “Murwa muthu, naa u ḓo ḓivhadza khaṱhulo ya Ohala na Ohaliba+ wa vha vhudza nga ha mishumo yavho i nengisaho?
37 Vho ita vhupombwe,+ zwanḓa zwavho zwo ḓala malofha. A vho ngo ita vhupombwe fhedzi na midzimu yavho ya zwifanyiso i nengisaho, fhedzi vho dovha vha posa na vharwa vhavho muliloni uri vha vhe zwiḽiwa zwa midzimu yavho ya zwifanyiso.+
38 Vho dovha vha nnyita na hezwi: Nga ḽeneḽo ḓuvha vho tshikafhadza nnḓu yanga khethwa, vha tshikafhadza na maḓuvha anga a savhatha.
39 Musi vho no vhulaya vharwa vhavho uri vha vhe zwiṱhavhelo zwa midzimu yavho i nengisaho,+ nga ḽeneḽo ḓuvha vho ḓa nḓuni yanga khethwa uri vha i tshikafhadze.+ Ndi zwone zwe vha zwi ita nga ngomu nḓuni yanga.
40 Vho rumela na muḓinḓa uri a vhidze vhanna vha bvaho kule.+ Musi vhe nḓilani, wa ṱamba wa pennda maṱo au, wa ḓinakisa nga madzanga.+
41 Wa dzula kha sofa+ ḽavhuḓi, hu na ṱafula phanḓa haḽo,+ nṱha haḽo wo vhea zwioro+ zwanga na mapfura anga.+
42 Ho vha hu tshi pfala phosho ya tshigwada tsha vhanna vha si na ndavha, khavho ho vha hu na zwidakwa zwo ḓaho zwi tshi bva sogani. Vha ambadza vhafumakadzi mabengele na khare dzavhuḓi.
43 “Nda amba nga ha we a vha o ṱahadzwa nga vhupombwe, nda ri: ‘Zwino ene u ḓo bvela phanḓa a tshi rengisa muvhili.’
44 Nga zwenezwo, vha ḓo bvela phanḓa vha tshi ya khae, sa vhane vha ya kha murengisi wa muvhili. Yeneyo ndi nḓila ye vha ya ngayo kha Ohala na Ohaliba, vhafumakadzi vha ḓifaraho luvhi.
45 Fhedzi vhanna vho lugaho vha ḓo mu haṱula nga nḓila yo teaho ngauri o shulula malofha+ na u ita vhupombwe;+ ngauri ndi vhafumakadzi vhane vha ita vhupombwe, zwanḓa zwavho zwo ḓala malofha.+
46 “Yehova Murena Muvhusahoṱhe u ri: ‘Vha ḓo rumelwa mmbi uri i vha ite zwi ofhisaho, vha ḓo dzhielwa thundu dzavho.+
47 Mmbi i ḓo vha posa nga matombo+ na u vha rema nga mabanga. I ḓo vhulaya vharwa vhavho na vhananyana+ vhavho na u fhisa nnḓu dzavho nga mulilo.+
48 Ndi ḓo fhelisa u ḓifara luvhi hune ha vha hone shangoni, vhafumakadzi vhoṱhe vha ḓo guda khazwo vha si edzise u ḓifara hau luvhi.+
49 Vha ḓo u pfisa vhuṱungu nga nṱhani ha u ḓifara hau luvhi na nga nṱhani ha zwivhi zwau zwe wa zwi ita na midzimu yau ya zwifanyiso i nengisaho; ndi hone u tshi ḓo ḓivha uri ndi nṋe Yehova Murena Muvhusahoṱhe.’”+
Ṱhaluso dzi re magumoni a siaṱari
^ Zwine zwa amba uri “Dennde Ḽawe.”
^ Zwine zwa amba uri “Dennde Ḽanga Ḽi Khae.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “u ḓifara luvhi nga zwa vhudzekani nae.”
^ Sedzani Mutevhe Wa Ṱhalutshedzo Ya Maipfi.
^ Kana “vhudzimu.”
^ Kanzhi zwi farwa nga vhapfuli vha misevhe.
^ Kana “madzanga.”
