Hesekiele 24:1-27
24 Yehova a dovha a amba na nṋe nga ṅwaha wa vhuṱahe, nga ṅwedzi wa vhufumi, nga ḓuvha ḽa vhufumi ḽa wonoyo ṅwedzi, a ri:
2 “Murwa muthu, ṅwala fhasi heḽi ḓuvha. Khosi ya Babele yo thoma u lwa na Yerusalema nga ḽeneḽi ḓuvha.+
3 Vha nnḓu ya mashandukwa u vha vhudze nga ha hetshi tshifanyiso, u ambe nga havho u ri:
“‘Yehova Murena Muvhusahoṱhe u ri:
“Vhea bodo ya u bika; i vhee muliloni u i shele maḓi.+
4 U dzhenise zwipiḓa zwa ṋama khayo,+ zwipiḓa zwavhuḓi,U dzhenise tshizwa na voho; u i ḓadze nga marambo avhuḓi.
5 U nange nngu yavhuḓi kha sambi,+ u dzhenise khuni u mona na bodo.
U bike zwenezwi zwipiḓa na marambo azwo.”’
6 “Yehova Murena Muvhusahoṱhe u ri:
‘Khombo kha muḓi u shululaho malofha,+ bodo i re na rosi, i sa athu u ṱanzwiwaho rosi!
Ṋula thango nga nthihi nga nthihi;+ u songo dzi nanguludza.
7 Ngauri muḓi u na malofha;+ wo shululela malofha kha tombo.
A wo ngo a shululela kha mavu uri u a fukedze.+
8 Uri ndi vuse mbiti dza u lifhedza,Ndo shululela malofha awe nṱha ha tombo ḽi penyahoUri eneo malofha a si fukedzwe.’+
9 “Nga zwenezwo, Yehova Murena Muvhusahoṱhe u ri:
‘Khombo kha muḓi u shululaho malofha!+
Ndi ḓo u dzhenisela khuni nnzhi.
10 Ṱhopha khuni u vhase mulilo,U bike yeneyo ṋama i vhibve, u shulule muthotho, u litshe marambo a swe.
11 U vhee yeneyo bodo i si na tshithu kha mulilo* uri i sweUri koporo yayo i swe i tswukuluwe.
Tshika yayo i bve,+ na rosi yayo i swe.
12 Hone ndi u sokou ḓinetisa,Ngauri yeneyo rosi nnzhi i nga si bve.+
Posa yeneyo bodo muliloni na rosi yayo!’
13 “‘Tshika yau yo vhangiwa nga u ḓifara hau luvhi.+ Ndo lingedza u u ṱanzwa tshika fhedzi i si bve. U nga si kune u swika mbiti dzanga dzi tshi dzika.+
14 Ho amba nṋe Yehova. Zwi ḓo itea. A thi nga litshi u dzhia vhukando, thi nga pfeli vhuṱungu, thi nga ḓisoli.+ Vha ḓo u haṱula u ya nga nḓila dzau na nga mishumo yau,’ u ralo Yehova Murena Muvhusahoṱhe.”
15 Yehova a dovha a amba na nṋe a ri:
16 “Murwa muthu, ndi ḓo u dzhiela mufunwa wau nga u ṱavhanya.+ U songo ṱungufhala; kana u lila kana u rothisa miṱodzi.
17 U songo sumbedza uri wo pfa vhuṱungu, u songo tevhedza mikhuvha ya u lilela mufu.+ U vhofhe dugu yau,+ u ambare thovho*+ dzau. U songo fukedza ndebvu dzau,+ u songo ḽa zwiḽiwa* zwe vhaṅwe vha u ḓisela zwone.”+
18 Nda amba na vhathu nga matsheloni, mufumakadzi wanga a fa nga madekwana. Ḽi tshi tsha nga matsheloni nda ita zwe nda vhudzwa zwone.
19 Vhathu vho mmbudzisa vha ri: “Naa a u nga ri vhudzi uri zwenezwi zwithu zwine wa khou zwi ita zwi ri kwama hani?”
20 Nda vha fhindula nda ri: “Yehova o amba na nṋe a ri,
21 ‘Vhudza vha nnḓu ya Isiraele uri: “Yehova Murena Muvhusahoṱhe u ri, ‘Ndi tsini na u tshikafhadza nnḓu yanga khethwa+ ine ya vha tshithu tshine na ḓihudza ngatsho, ine ya vha tshithu tshine na tshi takalela, ine mbilu yaṋu ya i takalela. Vharwa na vhananyana vhaṋu vhe na vha sia murahu vha ḓo vhulawa nga banga.+
22 Ndi hone ni tshi ḓo ita zwe nda zwi ita. A ni nga fukedzi ndebvu dzaṋu, a ni nga ḽi zwiḽiwa* zwe vhaṅwe vha ni ḓisela zwone.+
23 Dugu dzaṋu dzi ḓo vha dzo vhofhiwa kha dziṱhoho no ambara na thovho.* A ni nga ṱungufhali kana u lila. Nṱhani hazwo, ni ḓo fela zwivhi zwaṋu,+ ni ḓo gomela nga tshaṋu.
24 Hesekiele ndi tshiga kha inwi.+ Ni ḓo ita zwe a zwi ita. Musi zwi tshi itea, ndi hone ni tshi ḓo ḓivha zwa uri ndi nṋe Yehova Murena Muvhusahoṱhe.’”’”
25 “Iwe murwa muthu, nga ḓuvha ḽine nda ḓo vha dzhiela dzhavhelo ḽavho, ḽine ḽa vha dakalo ḽavho, ḽine ḽa vha tshithu tshine vha tshi takalela, ḽine mbilu dzavho dza ḽi takalela, khathihi na vharwa na vhananyana vhavho,+
26 u ḓo vhigelwa zwenezwo zwithu nga we a ponyoka.+
27 Nga ḽeneḽo ḓuvha u ḓo vula mulomo wau wa amba na we a ponyoka, a u tsha ḓo litsha u amba.+ U ḓo vha tshiga khavho, vha ḓo ḓivha uri ndi nṋe Yehova.”
Ṱhaluso dzi re magumoni a siaṱari
^ Thevhedz., “malasha.”
^ Kana “phashane, navhula.”
^ Thevhedz., “vhurotho.”
^ Thevhedz., “vhurotho.”
^ Kana “phashane, navhula.”
