Hesekiele 26:1-21
26 Nga ṅwaha wa vhu 11, nga ḓuvha ḽa u thoma ḽa ṅwedzi, Yehova a amba na nṋe, a ri:
2 “Murwa muthu, nga nṱhani ha uri muḓi wa Tiro wo amba nga ha Yerusalema+ wa ri, ‘Koṱo! Khoro ya vhathu yo vunḓiwa!+ Zwoṱhe zwi ḓo vha zwanga, ndi ḓo pfuma ngauri zwino wo tshinyadzwa’;
3 Yehova Murena Muvhusahoṱhe uri: ‘Ndi lwa na iwe Tiro, ndi ḓo ḓisa tshaka nnzhi dza lwa na iwe, vhunga lwanzhe lu tshi ḓisa magabelo alwo.
4 Vha ḓo tshinyadza mbondo dzau, vha wisela fhasi mitsheṱo yau,+ ndi ḓo khura mavu au nda u sia u tombo ḽi penyaho.
5 U ḓo vha fhethu ha u anea mambule vhukati ha lwanzhe.’+
“‘Ngauri ho amba nṋe,’ u ralo Yehova Murena Muvhusahoṱhe, ‘tshaka dzi ḓo u dzhiela zwine wa vha nazwo.
6 Vha dzulaho miḓanani yau ya mahayani vha ḓo vhulawa nga banga, vhathu vha kona u ḓivha uri ndi nṋe Yehova.’
7 “Ngauri zwe Yehova Murena Muvhusahoṱhe a zwi amba ndi hezwi: ‘Ndi khou ḓisa Khosi Nebukadanetsara wa Babele a bvaho devhula uri a ḓe a lwe na Tiro,+ ene khosi ya mahosi+ ine ya vha na bere,+ gariki dza nndwa,+ vhaṋameli vha bere na mmbi i re na maswole* manzhi.
8 U ḓo tshinyadza miḓana yau i re mahayani nga banga, a u tanga nga luvhondo na nga mitsheṱo, a u imisela tshiṱangu tshihulu.
9 U ḓo kwasha mbondo dzau nga matanda awe, a wisa mitsheṱo yau nga dzimbaḓo.*
10 U ḓo vha e na bere nnzhi dzine dza ḓo u dubisela buse, mitsindo ya bere, malinga na gariki zwi ḓo ita uri luvhondo lu dzinginyee musi vha tshi dzhena khoroni dzau, sa vhanna vha tshi gidimela muḓini u re na mbondo dzo waho.
11 Bere dzawe dzi ḓo kandekanya nḓila dzau dzoṱhe;+ u ḓo vhulaya vhathu vhau nga banga, phuphu dzau dzo khwaṱhaho dzi ḓo wa dza kwashea.
12 Vha ḓo u dzhiela thundu dzau na zwibveledzwa zwau,+ vha wisa mbondo dzau na nnḓu dzau dzavhuḓi; nga murahu vha posa matombo au na zwivhaḓwa zwau na mavu au maḓini.’
13 “‘Ndi ḓo fhelisa phosho ya nyimbo dzau, na phosho ya haripa dzau a i tsha ḓo pfala.+
14 Ndi ḓo u ita tombo ḽi penyaho, wa vha fhethu ha u anea mambule.+ A u tsha ḓo fhaṱululwa, ngauri ho amba nṋe Yehova,’ u ralo Yehova Murena Muvhusahoṱhe.
15 “Yehova Murena Muvhusahoṱhe o amba na Tiro a ri: ‘Musi hu tshi pfala mukosi wa u wa hau, hu tshi gomela vhane vha khou welela, hu tshi khou vhulawa vhathu vhukati hau, naa zwiṱangadzime a zwi nga dzinginyei?+
16 Vhakololo* vhoṱhe vha lwanzheni vha ḓo tsa kha khuluṋoni dzavho vho tshuwa, vha bvula zwiambaro zwi si na zwanḓa na zwiambaro zwo khavhiswaho. Vha dzula fhasi mavuni vha tetemela vha u lavhelesa vho mangala.+
17 Vha ḓo u imbela luimbo lwa tshililo*+ vha ri:
“Wo fheliswa,+ iwe we wa vha wo dzula lwanzheni, iwe muḓi u huliswaho;Iwe na vhadzulapo vhau no vha ni na maanḓa lwanzheni,+Ni tshi tshuwisa vhadzulapo vhoṱhe vha ḽifhasi!
18 Zwiṱangadzime zwi ḓo tetemela musi u tshi wa,Zwiṱangadzime zwa lwanzhe zwi ḓo tshuwa musi u si tsheeho.”’+
19 “Zwe Yehova Murena Muvhusahoṱhe a zwi amba ndi hezwi: ‘Musi ndi tshi u tshinyadza u fana na miḓi i sa dzuli muthu, musi ndi tshi u kumba nga magabelo na maḓi a re na maanḓa,+
20 ndi ḓo u tsitsela fhasi dindini* samusi ndo no ḓi tsitsela vhaṅwe fhasi ngei dindini hune ha vha na vhathu vho faho kale-kale, ndi ḓo ita uri u dzule fhasi-fhasi khathihi na maṅwe mashango o tshinyadzwaho kale, khathihi na vhoṱhe vhane vha tsela dindini,+ uri u sa dzulwe nga muthu. Ndi hone ndi tshi ḓo hulisa* shango.
21 “‘Ndi ḓo u ḓisela khakhathi nga u ṱavhanya, u ḓo fheliswa.+ Vha ḓo u ṱoḓa fhedzi a vha tsha ḓo u wana,’ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Thevhedz., “vhathu.”
^ Kana “mabanga.”
^ Kana “Vharangaphanḓa.”
^ Kana “u ṱungufhala.”
^ Kana “vhiḓani.”
^ Kana “nakisa.”