Hesekiele 28:1-26
28 Yehova a dovha a amba na nṋe a ri:
2 “Murwa muthu, vhudza khosi ya Tiro u ri, ‘Zwe Yehova Murena Muvhusahoṱhe a zwi amba ndi hezwi:
“Ngauri u vho ḓikukumusa,+ u dzulela u amba uri, ‘Nṋe ndi mudzimu.
Ndi dzula kha khuluṋoni ya mudzimu vhukati ha lwanzhe.’+
Fhedzi u sokou vha muthu zwawe, a u mudzimu,Naho mbiluni yau u tshi ḓipfa u nga u mudzimu.
3 Wo ṱalifha u fhira Daniele.+
A hu na zwiphiri zwe wa dzumbelwa.
4 Wo ḓipfumisa nga vhuṱali hau na nga ṱhalukanyo yau,U bvela phanḓa u tshi vhulunga musuku na siḽiva mbulungeloni dzau.+
5 Vhukoni hau ha u rengisa ho u ḓisela lupfumo luhulu,+Wa thoma u ḓikukumusa nga nṱhani ha lupfumo lwau.”’
6 “‘Nga zwenezwo, Yehova Murena Muvhusahoṱhe u ri:
“Ngauri mbiluni yau u ḓipfa u tshi nga u mudzimu,
7 Ndi khou u ḓisela vhatsinda, lushaka lu re na tshiṱuhu,+Lu ḓo ṱomola mabanga alwo lwa tshinyadza zwoṱhe zwo nakaho zwe wa zwi ita nga vhuṱali hauLwa tshinyadza na vhugala hau.+
8 Lu ḓo u isa dindini,*Wa fela vhukati ha lwanzhe nga nḓila i vhavhaho.+
9 Naa u ḓo vhudza ane a khou u vhulaya wa ri, ‘Nṋe ndi mudzimu’?
Kha vhane vha khou u tshikafhadza u ḓo vha u tshi nga muthu zwawe, hu si mudzimu.”’
10 ‘U ḓo vhulawa nga zwanḓa zwa vhatsinda sa muthu a songo fumbaho,Ngauri ho amba nṋe,’ u ralo Yehova Murena Muvhusahoṱhe.”
11 Yehova a dovha a amba na nṋe a ri:
12 “Murwa muthu, imbela khosi ya Tiro luimbo lwa tshililo,* u ri, ‘Yehova Murena Muvhusahoṱhe u ri:
“Wo vha u si na tshine wa ṱahela tshone,U na vhuṱali vhunzhi+ na lunako luhulu.+
13 Wo vha u ngei Edeni, tsimuni ya Mudzimu.
Wo khavhiswa nga matombo a mutengo muhulu,A rubi, a thophasi, a yasipere; a khirisoḽaithi, a onikisi, a dzheidi; a safire, a thekhoisi+ na a emeralidi;Eneo matombo o vha o dzula nṱha ha musuku.
O lugiselelwa nga ḓuvha ḽe wa sikwa.
14 Ndo u vhea sa mukerube o ḓodzwaho ane a shuma u tsireledza.
Wo vha u thavhani khethwa ya Mudzimu,+ u tshi tshimbila vhukati ha matombo a penyaho sa mulilo.
15 U bva ḓuvha ḽe wa sikwa wo vha u tshi tshimbila nga nḓila yo teahoU swikela u tshi thoma u ita zwi songo lugaho.+
16 Nga nṱhani ha u rengisa hau zwithu zwinzhi,+Wa vha na khakhathi, wa thoma u ita tshivhi.+
Nga zwenezwo, ndi ḓo u pandela thavhani ya Mudzimu nda u fhelisa ngauri u na tshika,+Iwe mukerube a tsireledzaho, ndi ḓo u pandelela kule na matombo a penyaho sa mulilo.
17 Wo ḓihudza nga nṱhani ha lunako lwau.+
Wo tshinya vhuṱali hau nga nṱhani ha vhugala hau.+
Ndi ḓo u posela kha ḽifhasi.+
Ndi ḓo ita uri mahosi a mangale a tshi u vhona.
18 Wo tshikafhadza nnḓu dzau khethwa nga nṱhani ha mulandu wau muhulu na nga u fhura hau kha zwa u rengisa.
Ndi ḓo vhasa mulilo vhukati hau, u ḓo u fhisa.+
Ndi ḓo u fhisa wa sala u miḽora phanḓa ha vhoṱhe vho u lavhelesaho.
19 Vhathu vhoṱhe vhane vha u ḓivha vha ḓo u lavhelesa vho mangala.+
U ḓo fheliswa nga u ṱavhanya nga nḓila i vhavhaho,A u tsha ḓo vha hone lini na lini.”’”+
20 Yehova a dovha a amba na nṋe a ri:
21 “Murwa muthu, lavhelesa Sidoni,+ u porofite nga haḽo.
22 U ambe u ri, ‘Yehova Murena Muvhusahoṱhe u ri:
“Iwe Sidoni, ndi khou lwa na iwe, ndi ḓo huliswa vhukati hau;Musi ndi tshi u haṱula nda itwa mukhethwa, ndi hone vhathu vha tshi ḓo zwi ḓivha uri ndi nṋe Yehova.
23 Ndi ḓo u ḓisela malwadze, malofha a ḓo shuluwa nḓilani dzau.
Vhathu vhau vha ḓo vhulawa nga banga thungo dzoṱhe;Ndi hone vha tshi ḓo ḓivha uri ndi nṋe Yehova.+
24 “‘“Ndi hone vha nnḓu ya Isiraele vha si tsha ḓo tangwa nga vhane vha nga mipfa,+ vhane vha vha goḓa; vhathu vha ḓo zwi ḓivha uri ndi nṋe Yehova Murena Muvhusahoṱhe.”’
25 “‘Zwe Yehova Murena Muvhusahoṱhe a zwi amba ndi hezwi: “Musi ndi tshi dovha nda kuvhanganya vha nnḓu ya Isiraele vha tshi bva kha tshaka dze nda vha balanganyela khadzo,+ ndi ḓo vha mukhethwa khavho phanḓa ha dzitshaka.+ Vha ḓo dzula kha shango ḽavho+ ḽe nda ṋea Yakobo mushumeli wanga.+
26 Vha ḓo dzula khaḽo vho tsireledzea,+ vha ḓo fhaṱa dzinnḓu vha ṱavha minḓirivhe,+ vha dzula vho tsireledzea musi ndi tshi haṱula vhoṱhe vho vha tangaho vhane vha vha goḓa;+ vha ḓo ḓivha uri ndi nṋe Yehova Mudzimu wavho.”’”
