Hesekiele 29:1-21
29 Nga ṅwaha wa vhufumi, nga ṅwedzi wa vhufumi, nga ḓuvha ḽa vhu 12 ḽa wonoyo ṅwedzi, Yehova a amba na nṋe a ri:
2 “Murwa muthu, lavhelesa Farao khosi ya Egipita, u porofite nga hae na Vhaegipita vhoṱhe.+
3 U ambe u ri: ‘Zwe Yehova Murena Muvhusahoṱhe a zwi amba ndi hezwi:
“Iwe Farao khosi ya Egipita, ndi lwa na iwe,+Iwe ḽivhanda ḽihulu ḽine ḽa dzula Mulamboni wa Nili,*+Iwe we wa ri, ‘Mulambo wa Nili ndi wanga.
Ndo tou ḓiitela wone.’+
4 Fhedzi ndi ḓo dzhenisa huka mulomoni wau, nda ita uri khovhe dza Mulambo wau wa Nili dzi nambatele kha makwanda au.
Ndi ḓo u bvisa Mulamboni wau wa Nili na khovhe dzoṱhe dze dza nambatela makwanda au.
5 Ndi ḓo u laṱa sogani na khovhe dzoṱhe dza Mulambo wa Nili.
U ḓo wela ngei ḓakani, a u tsha ḓo dovha wa kuvhanganywa.+
Ndi ḓo u kumedzela zwivhanda na zwiṋoni uri zwi u ḽe.+
6 Ndi hone vhadzulapo vhoṱhe vha Egipita vha tshi ḓo ḓivha uri ndi nṋe Yehova,A vho ngo kona u tika vha nnḓu ya Isiraele ngauri vho vha vha tshi nga luhatsi.*+
7 Musi vha tshi u fara nga tshanḓa, wa vunḓea,Wa ita na uri vha vunḓee mahaḓa.
Musi vha tshi lingedza u ḓitika nga iwe, wo vunḓea,Wa ita uri milenzhe* yavho i tetemele.”+
8 “‘Yehova Murena Muvhusahoṱhe u ri: “Ndi ḓo ni ḓisela banga,+ ndi ḓo vhulaya vhathu na zwipuka.
9 Shango ḽa Egipita ḽi ḓo vha shubi na fhethu ho tshinyadzwaho;+ ndi hone vha tshi ḓo ḓivha uri ndi nṋe Yehova, ngauri wo ri, ‘Mulambo wa Nili ndi wanga; wo itwa nga nṋe.’+
10 Ndi lwa na iwe na Mulambo wau wa Nili, ndi ḓo tshinyadza shango ḽa Egipita ḽa vha fhethu ho omaho, ḽi ḓo vha soga+ u bva ngei Migidolo+ u ya ngei Sevene+ u guma nga mikano ya Etopia.
11 A hu na muthu kana tshifuwo tshine tsha ḓo fhira khaḽo,+ a ḽi nga dzulwi nga muthu lwa miṅwaha ya 40.
12 Ndi ḓo ita uri shango ḽa Egipita ḽi tshinyadzwe zwihulu u fhira mashango oṱhe, miḓi yaḽo i ḓo tshinyadzwa vhukuma u fhira yoṱhe lwa miṅwaha ya 40;+ ndi ḓo balanganyela Vhaegipita kha dzitshaka na u vha pandelela kha maṅwe mashango.”+
13 “‘Yehova Murena Muvhusahoṱhe u ri: “Musi ho no fhela miṅwaha ya 40 ndi ḓo kuvhanganya Vhaegipita kha tshaka dze nda vha balanganyela khadzo;+
14 vhenevho Vhaegipita vho thubiwaho, ndi ḓo vha humisela shangoni ḽa Patarosi,+ hune vha bva hone, a vha tsha ḓo vha muvhuso muhulu.
15 Ndi ḓo ita uri muvhuso wa Egipita u vhe muvhuso muṱukusa kha miṅwe mivhuso, a u tsha ḓo vhusa dziṅwe tshaka,+ ndi ḓo ita uri u vhe muṱuku lune wa si tsha ḓo kona u kunda dziṅwe tshaka.+
16 A u tsha ḓo dovha wa fhulufhelwa nga vha nnḓu ya Isiraele,+ fhedzi u ḓo tou vha humbudza vhukhakhi he vha vhu ita musi vha tshi humbela thuso kha Vhaegipita. Ndi hone vha tshi ḓo ḓivha uri ndi nṋe Yehova Murena Muvhusahoṱhe.”’”
17 Nga ṅwaha wa vhu 27, nga ṅwedzi wa u thoma, nga ḓuvha ḽa u thoma ḽa wonoyo ṅwedzi, Yehova o amba na nṋe, a ri:
18 “Murwa muthu, Khosi Nebukadanetsara+ wa Babele o ita uri mmbi yawe i shume nga maanḓa musi i tshi lwa na muḓi wa Tiro.+ Maswole oṱhe a mmbi yawe o guvhuwa mavhudzi a khuzuwa na mahaḓa. Fhedzi khosi na maswole ayo a vho ngo wana mbadelo kha mushumo we vha u ita ngei Tiro.
19 “Nga zwenezwo, zwe Yehova Murena Muvhusahoṱhe a zwi amba ndi hezwi, ‘Ndi khou ṋea Nebukadanetsara khosi ya Babele+ shango ḽa Egipita, u ḓo dzhia lupfumo lwaḽo, a dzhia na zwe a thuba khaḽo; zwi ḓo vha muholo wa mmbi yawe.’
20 “‘Ndi ḓo mu ṋea shango ḽa Egipita sa malamba ngauri vho lwa nawo* vha tshi itela nṋe,’+ u ralo Yehova Murena Muvhusahoṱhe.
21 “Nga ḽeneḽo ḓuvha ndi ḓo ita uri luṋanga lwa nnḓu ya Isiraele lu mele,*+ ndi ḓo u ṋea tshibuli tsha u amba navho; ndi hone vha tshi ḓo ḓivha uri ndi nṋe Yehova.”
Ṱhaluso dzi re magumoni a siaṱari
^ Hafha na kha ndimana dzine dza khou tevhela, “Nili” zwi ambela kha mulambo na migero yawo.
^ Thevhedz., “luṱanga.”
^ Thevhedz., “khundu.”
^ Ndi Tiro.
^ Kana “ndi ḓo ṋea nnḓu ya Isiraele maanḓa.”
