Hesekiele 3:1-27
3 Ndi hone a tshi amba na nṋe a ri: “Murwa muthu, i ḽa zwi re phanḓa hau.* I ḽa hoyu mupombo, u ṱuwe u ye u ambe na vha nnḓu ya Isiraele.”+
2 Nda aṱama mulomo, a ita uri ndi ḽe wonoyu mupombo.
3 A amba na nṋe a ri: “Murwa muthu, i ḽa hoyu mupombo une nda khou u ṋea wone, u ḓadze thumbu yau ngawo.” Nda thoma u u ḽa, wo vha u tshi ḓifha sa mutoli.+
4 A amba na nṋe a ri: “Murwa muthu, dzhena nḓuni ya Isiraele u vha vhudze zwe nda u vhudza.
5 Ngauri a u khou rumiwa kha vhathu vhane vha amba luambo lu sa pfesesei kana lu sa ḓivhei, fhedzi u khou rumiwa kha vha nnḓu ya Isiraele.
6 A u khou rumiwa kha vhathu vhanzhi vhane vha amba luambo lu sa pfesesei kana lu sa ḓivhei, vhane wa nga si kone u pfesesa zwine vha amba. Arali ndi vhe ndo u ruma khavho vho vha vha tshi ḓo u thetshelesa.+
7 Fhedzi vha nnḓu ya Isiraele a vha nga u thetshelesi, ngauri a vha ṱoḓi u nthetshelesa.+ Vhoṱhe vha nnḓu ya Isiraele vha na tshikhuna, mbilu dzavho dzo rindila.+
8 Ndo ita uri tshifhaṱuwo tshau tshi ome u fana na zwifhaṱuwo zwavho na u ita uri phanḓa yau i ome u fana na phanḓa dzavho.+
9 Ndo ita uri phanḓa yau i ome sa daimane na u oma u fhira tombo.+ U songo vha ofha kana wa tshuwiswa nga zwifhaṱuwo zwavho,+ ngauri ndi vha nnḓu ya mashandukwa.”
10 A amba na nṋe a ri: “Murwa muthu, zwoṱhe zwine nda u vhudza u zwi dzhiele nṱha na u zwi thetshelesa.
11 Iya kha vhathu vhau*+ vho thubiwaho u ambe navho. U vha vhudze uri, ‘Hezwi ndi zwe Yehova Murena Muvhusahoṱhe a zwi amba,’ hu sa londwi uri vha ḓo thetshelesa kana vha nga si thetshelese.”+
12 Muya wa nkhwala,+ nda pfa ipfi ḽihulu murahu hanga ḽi tshi ri: “Nga hu rendwe vhugala ha Yehova henefho hune a dzula hone.”
13 Ho vha hu na phosho ya maphapha a zwivhumbiwa zwi tshilaho a tshi khou phaphathana,+ na phosho ya malinga a re tsini nazwo,+ na phosho khulu.
14 Muya wa nkhwala, nda ṱuwa ndo sinyuwa, ndo vhaisala, maanḓa a Yehova o vha a tshi khou shuma kha nṋe nga nḓila khulwane.
15 Nda ya kha vhathu vho thubiwaho ngei Thele-abibi, vho dzulaho mulamboni wa Kebara,+ nda dzula navho henefho; ndo dzula navho maḓuvha a sumbe ndo ḓaḓa.+
16 Musi maḓuvha a sumbe a tshi fhela, Yehova a amba na nṋe a ri:
17 “Murwa muthu, ndo u vhea uri u vhe mulindi wa vha nnḓu ya Isiraele;+ musi u tshi pfa zwine nda amba, u vha tsivhudze nga zwe nda u vhudza.+
18 Musi ndi tshi amba na muvhi nda ri, ‘U ḓo fa,’ fhedzi iwe wa si mu tsivhudze, wa si ambe nae uri u mu tsivhudze uri a litshe nḓila yawe mmbi uri a tshile,+ onoyo muvhi u ḓo fa nga nṱhani ha vhukhakhi hawe,+ fhedzi ndi ḓo vhila malofha awe kha iwe.*+
19 Arali wa tsivhudza muvhi, a si litshe zwivhi zwawe na nḓila yawe mmbi, onoyo muvhi u ḓo fa nga nṱhani ha vhukhakhi hawe, fhedzi iwe u ḓo tshidza vhutshilo hau.+
20 Musi muvhuya a tshi litsha zwivhuya zwawe, a ita zwo khakheaho,* ndi ḓo ita uri a khukhulwe, a fe.+ Arali wa sa mu tsivhudza u ḓo fa nga nṱhani ha zwivhi zwawe, zwivhuya zwawe a zwi tsha ḓo humbulwa, fhedzi nṋe ndi ḓo vhila malofha awe kha iwe.*+
21 Fhedzi arali wo tsivhudza muvhuya uri a si ite tshivhi, a si tshi ite, onoyo muvhuya u ḓo tshila ngauri o tsivhudzwa,+ u ḓo vha wo tshidza vhutshilo hau.”
22 Tshanḓa tsha Yehova tsho nḓela henefho, a amba na nṋe a ri: “Takuwa u ye govhani, ndi ḓo amba na iwe u henengei.”
23 Nda takuwa nda ya govhani, henefho hu na vhugala ha Yehova,+ vhune ha nga he nda vhu vhona tsini na mulambo wa Kebara,+ nda gwadama.
24 Ndi hone muya u tshi dzhena kha nṋe wa ita uri ndi ime,+ a amba na nṋe a ri:
“Tshimbila u ye u ḓivalele nḓuni yau.
25 Iwe murwa muthu, vha ḓo u vhofha nga thambo uri u si bve wa ya khavho.
26 Ndi ḓo ita uri lulimi lwau lu nambatele nga ngomu mulomoni wau, uri u si tsha kona u amba, na u vha kaidza, ngauri ndi vha nnḓu ya mashandukwa.
27 Musi ndi tshi amba na iwe ndi ḓo vula mulomo wau, u ambe navho u ri,+ ‘Hezwi ndi zwe Yehova Murena Muvhusahoṱhe a zwi amba.’ Ane a thetshelesa nga a thetshelese,+ ane a hana u thetshelesa a songo thetshelesa, ngauri ndi vha nnḓu ya mashandukwa.+
Ṱhaluso dzi re magumoni a siaṱari
^ Thevhedz., “i ḽa zwine wa zwi wana.”
^ Thevhedz., “vharwa vha vhathu vhau.”
^ Kana “ndi ḓo u vhona mulandu wa malofha awe.”
^ Kana “a haṱula nga nḓila i songo teaho.”
^ Kana “ndi ḓo u vhona mulandu wa malofha awe.”
