Hesekiele 30:1-26
30 Yehova a dovha a amba na nṋe a ri:
2 “Murwa muthu, porofita u ambe uri, ‘Yehova Murena Muvhusahoṱhe u ri:
“Lilani ni ri, ‘Yowee, ḓuvha ḽi khou ḓa!’
3 Ngauri ḓuvha ḽi tsini, ḓuvha ḽa Yehova ḽi tsini.+
Ḽi ḓo vha ḓuvha ḽa makole,+ ndi tshifhinga tsho vhetshelwaho dzitshaka.+
4 Banga ḽi ḓo ḓela Egipita, ḽa Etopia ḽi ḓo tshuwa musi vhathu vha tshi vhulawa ngei Egipita;Lupfumo lwaḽo lwo dzhiiwa na mitheo yaḽo yo thuthiwa.+
5 Etopia,+ Phuti,+ Ludi na vhathu vhoṱhe vha bvaho kha tshaka dzo fhambananaho,*Na Kubi khathihi na vharwa vha Isiraele vho vhofhaho mulanga,*Vhoṱhe vha ḓo vhulawa nga banga.”’
6 Yehova u ri:
‘Vhatikedzi vha ḽa Egipita na vhone vha ḓo vhulawa,Maanḓa ane ḽa ḓikukumusa ngao a ḓo fhela.’+
“‘Vha ḓo vhulawa nga banga u bva Migidolo+ u swika Sevene,’+ u ralo Yehova Murena Muvhusahoṱhe.
7 ‘Shango ḽavho ḽi ḓo tshinyadzwa vhukuma u fhira mashango oṱhe, na miḓi yavho i ḓo tshinyadzwa vhukuma u fhira miḓi yoṱhe.+
8 Ndi hone vha tshi ḓo ḓivha uri ndi nṋe Yehova musi ndi tshi fhisa Egipita na u fhelisa vha tikedzi vhaḽo vhoṱhe.
9 Musi wonoyo ndi ḓo rumela vhaḓinḓa nga zwikepe uri vha ye u tshuwisa shango ḽa Etopia ḽine ḽa ḓifhulufhela; vha ḓo tshuwa musi ḽeneḽo ḓuvha ḽi tshi ḓela Egipita, ngauri ḽi ḓo ḓa ngangoho.’
10 “Yehova Murena Muvhusahoṱhe u ri: ‘Ndi ḓo fhelisa gogo ḽa Egipita ndi tshi shumisa Nebukadanetsara khosi ya Babele.+
11 Ene na mmbi yawe, ya lushaka lu re na tshiṱuhu tshihulu+ vha ḓo ḓiswa uri vha fhelise shango. Vha ḓo ṱomola mabanga avho vha lwa na shango ḽa Egipita, vha ḽi ḓadza nga vhathu vho faho.+
12 Ndi ḓo ita uri migero ya Mulambo wa Nili+ i ome, shango nda ḽi rengisela vhathu vhavhi. Ndi ḓo ita uri vhatsinda vha tshinyadze shango na zwoṱhe zwi re khaḽo.+ Ho amba nṋe Yehova.’
13 “Yehova Murena Muvhusahoṱhe u ri: ‘Ndi ḓo fhelisa na midzimu ya zwifanyiso i nengisaho,* nda fhelisa na midzimu ya Nofe*+ i sa thusi nga tshithu. A hu tsha ḓo vha na mukololo* shangoni ḽa Egipita, ndi ḓo ita uri Vhaegipita vha ofhe.+
14 Ndi ḓo tshinyadza muḓi wa Patarosi+ nda fhisa muḓi wa Tsoani nda haṱula muḓi wa Noo.*+
15 Mbiti dzanga ndi ḓo dzi shululela muḓi wa Sini dzhavhelo ḽa Egipita, nda fhelisa vhadzulapo vha Noo.
16 Ndi ḓo fhisa ḽa Egipita; muḓi wa Sini u ḓo tshuwa, muḓi wa Noo u ḓo kwashiwa, muḓi wa Nofe* u ḓo tshoṱelwa masiari tshivhangalala!
17 Vhaṱhannga vha muḓi wa Oni na vha Phibesethe vha ḓo vhulawa nga banga, yeneyo miḓi i ḓo thubiwa.
18 Thahapanese hu ḓo swifhala masiari musi ndi tshi vunḓa dzhogo dza Egipita henefho.+ Maanḓa ane ḽa ḓikukumusa ngao a ḓo fhela,+ ḽi ḓo tibiwa nga gole, miḓana yaḽo i ḓo iswa vhuthubwani.+
19 Ndi ḓo haṱula ḽa Egipita uri vha ḓivhe uri ndi nṋe Yehova.’”
20 Nga ṅwaha wa vhu 11, nga ṅwedzi wa u thoma, nga ḓuvha ḽa vhusumbe ḽa wonoyo ṅwedzi, Yehova o amba na nṋe a ri:
21 “Murwa muthu, ndo vunḓa tshanḓa tsha Farao khosi ya Egipita; a tshi nga fholi kana u vhofhiwa nga banditshi uri tshi vhe na nungo dza u kona u fara banga.”
22 “Nga zwenezwo, Yehova Murena Muvhusahoṱhe u ri: ‘Ndi khou lwa na Farao khosi ya Egipita,+ ndi ḓo mu vunḓa zwanḓa, ndi ḓo vunḓa tshi re na maanḓa na tshiḽa tshiṅwe tsho vunḓwaho,+ ndi ḓo ita uri banga ḽi we tshanḓani tshawe.+
23 Nda balanganyela Vhaegipita kha dzitshaka na u vha pandelela kha maṅwe mashango.+
24 Ndi ḓo khwaṱhisa zwanḓa* zwa khosi ya Babele,+ nda i ṋekedza banga ḽanga,+ nda vunḓa zwanḓa zwa Farao, u ḓo gomela phanḓa hayo* sa munna ane a khou fa.
25 Ndi ḓo khwaṱhisa zwanḓa zwa khosi ya Babele, fhedzi nda ita uri zwanḓa zwa Farao zwi si kone u ita tshithu; musi ndi tshi ṋea khosi ya Babele banga ḽanga, ya ḽi shumisa u lwa na shango ḽa Egipita ndi hone vha tshi ḓo ḓivha uri ndi nṋe Yehova.+
26 Ndi ḓo balanganyela Vhaegipita kha dzitshaka na u vha pandelela kha maṅwe mashango,+ ndi hone vha tshi ḓo ḓivha uri ndi nṋe Yehova.’”
Ṱhaluso dzi re magumoni a siaṱari
^ Kana “vhoṱhe vha bvaho kha dziṅwe tshaka.”
^ Khamusi zwi khou ambela kha Vhaisiraele vhe vha vha vha tshi konana na Vhaegipita.
^ Kana “murangaphanḓa.”
^ Kana “Memifisi.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Ndi Thebese.
^ Kana “Memifisi.”
^ Kana “engedza maanḓa.”
^ Ndi phanḓa ha khosi ya Babele.
