Hesekiele 31:1-18
-
U wa ha Egipita, muri muhulu wa muṱaululo (1-18)
31 Nga ṅwaha wa vhu 11, nga ṅwedzi wa vhuraru, nga ḓuvha ḽa u thoma ḽa wonoyo ṅwedzi, Yehova a dovha a amba na nṋe a ri:
2 “Murwa muthu, amba na Farao khosi ya Egipita na magogo awe+ u ri,‘Ndi nnyi ane wa nga vhambedzwa nae nga vhuhulu?
3 Ho vha hu na Muasuri, muri wa muṱaululo wa ngei Libanoni,U na matavhi avhuḓi a ngaho miri milapfu i re na mirunzi;Ṱhodzi yawo i tshi swika makoleni.
4 Maḓi o ita uri u aluwe u vhe muhulu, maḓi a zwisima o ita uri u lapfe.
He wa ṱavhiwa hone ho vha hu na milambwana;Migero yayo yo vha i tshi sheledza miri yoṱhe ya ḓaka.
5 Ndi ngazwo wo hula wa fhira miri yoṱhe ya ḓaka.
Matavhi awo a vha manzhi, a lapfaNge wa wana maḓi manzhi a bvaho kha milambwana.
6 Zwiṋoni zwoṱhe zwa fhaṱa zwiṱaha kha matavhi awo,Zwivhanda zwoṱhe zwa dzwala nga fhasi ha matavhi awo,Na tshaka dzoṱhe khulwane dza dzula murunzini wawo.
7 Wa vha muri muhulu wavhuḓi u re na matavhi malapfu,Ngauri midzi yawo yo vha yo tsa ya swika hu re na maḓi manzhi.
8 Tsimuni ya Mudzimu+ ho vha hu si na muri wa muṱaululo we wa vha u tshi nga vhambedzwa nawo.
Hu si na miri ya midzhunipa ye ya vha i na matavhi a fanaho na awo,Ho vha hu si na mihuyu i re na matavhi a fanaho na awo.
Ho vha hu si na muṅwe muri tsimuni ya Mudzimu we wa vha wo naka u u fhira.
9 Ndo u ita wa naka, nda ita uri u vhe na maṱari manzhi,Wo vha u tshi tamiwa nga miri yoṱhe ya Edeni, tsimu ya Mudzimu wa ngoho.’
10 “Yehova Murena Muvhusahoṱhe u ri: ‘Ngauri wo lapfa, wa ita uri ṱhodzi yawo i swike makoleni, mbilu yawo ya thoma u ḓikukumusa ngauri wo lapfa,
11 ndi ḓo u kumedzela muvhusi wa dzitshaka a re na maanḓa.+ U ḓo lwa nawo, ndi ḓo u laṱa nga nṱhani ha vhuvhi hawo.
12 Vhatsinda vha re na tshiṱuhu u fhira tshaka dzoṱhe vha ḓo ḓa vha u rema, vha u laṱa dzithavhani, maṱari awo a ḓo wela magovhani oṱhe, matavhi awo a ḓo vunḓekana ngei milamboni.+ Tshaka dzoṱhe dza kha ḽifhasi dzi ḓo pfuluwa murunzini wawo dza u ṱutshela.
13 Zwiṋoni zwoṱhe zwi ḓo ḓa zwa dzula kha tsinde ḽawo ḽo waho na zwivhanda zwoṱhe zwi ḓo dzula kha matavhi awo.+
14 Zwenezwi zwi khou itelwa uri miri i re tsini na maḓi i si lapfe kana u vha na ṱhodzi ine ya swika makoleni na uri muri une wa wana maḓi tshifhinga tshoṱhe u si lapfe wa swika makoleni. Ngauri yoṱhe i ḓo vhulawa, ya iswa vhiḓani khathihi na vhana vha vhathu, vhane vha tsela dindini.’*
15 “Yehova Murena Muvhusahoṱhe u ri: ‘Nga ḓuvha ḽine wa iswa Vhiḓani,* ndi ḓo ita uri hu vhe na u ṱungufhala. Nga zwenezwo, ndi ḓo thivha mativha nda vala migero ya milambwana uri hu si tsha vha na maḓi manzhi. Ndi ḓo ita uri Libanoni hu vhe na tshililo nga nṱhani hawo, miri yoṱhe ya ḓaka i ḓo oma.
16 Musi hu tshi pfala phosho ya u wa hawo, ndi ḓo ita uri tshaka dzi ofhe musi ndi tshi u isa Vhiḓani* na vhoṱhe vhane vha tsela dindini,* na miri yoṱhe ya ngei Edeni+ yavhuḓisa ya ngei Libanoni, yoṱhe i wanaho maḓi tshifhinga tshoṱhe, i ḓo khuthadzwa ngei vhiḓani.
17 Yo tsela Vhiḓani* nawo, henengei hu re na vho vhulawaho nga banga+ na vhatikedzi vhawo vha dzulaho murunzini wawo vhukati ha dzitshaka.’+
18 “‘Ndi ufhio muri wa ngei Edeni we wa vha u tshi nga iwe nga vhugala na nga vhuhulu?+ Naho zwo ralo, u ḓo remiwa na miri yoṱhe ya ngei Edeni wa tsela fhasi vhiḓani. U ḓo lala fhasi na vha songo fumbaho, na vho vhulawaho nga banga. Zwenezwi zwi ḓo itea kha Farao na gogo ḽawe ḽoṱhe,’ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Kana “vhiḓani.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “vhiḓani.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
