Hesekiele 32:1-32
32 Nga ṅwaha wa vhu 12 nga ṅwedzi wa vhu 12, nga ḓuvha ḽa u thoma ḽa wonoyo ṅwedzi, Yehova a amba na nṋe, a ri:
2 “Murwa muthu, imba luimbo lwa tshililo,* u imbele Farao khosi ya Egipita, u ri,‘Wo vha u tshi nga ndau i re na maanḓa ya dzitshaka,Fhedzi wo fhumudzwa.
Wo vha u tshi nga ḽivhanda ḽihulu ḽa maḓini,+ u tshi vhumbuluwa milamboni yau,U tshi dzikusa maḓi nga milenzhe yau na u tshikafhadza milambo.’
3 Zwe Yehova Murena Muvhusahoṱhe a zwi amba ndi hezwi:
‘Ndi ḓo u posa nga mambule anga ndi tshi shumisa tshaka nnzhi,Dzi ḓo u kokodza nga mambule anga.
4 Ndi ḓo u posa shangoni;Nda u posa ngei ḓakani.
Ndi ḓo rumela zwiṋoni zwoṱhe zwa ḓa zwa kavha kha iwe,Ndi ḓo fusha zwivhanda zwoṱhe zwa kha ḽifhasi nga iwe.+
5 Ndi ḓo posa ṋama yau dzithavhaniNdi ḓo ḓadza magovha nga ṋama yau yo salaho.+
6 Ndi ḓo ṋukadza shango u guma nga dzithavha nga malofha au,A ḓo ḓadza milambwana.’
7 ‘Musi u tshi fheliswa ndi ḓo tiba ḽiṱaḓulu nda swifhadza ṋaledzi.
Ndi ḓo tiba ḓuvha nga makole,Ṅwedzi a u tsha ḓo vhonetshela.+
8 Nga nṱhani hau ndi ḓo swifhadza zwivhonetsheli zwoṱhe zwa ṱaḓulu,Nda tiba shango ḽau nga swiswi,’ u ralo Yehova Murena Muvhusahoṱhe.
9 ‘Ndi ḓo ita uri mbilu dza vhathu vhanzhi dzi tsikeledzee musi ndi tshi isa mathubwa au kha dziṅwe tshaka,Kha mashango ane wa si a ḓivhe.+
10 Ndi ḓo mangadza vhathu vhanzhi,Mahosi avho a ḓo tshuwa musi ndi tshi vha imisela banga ḽanga.
Vha ḓo tetemela vha sa fhedzi, vha tshi ofha u vhulawa,Nga ḓuvha ḽine nda ḓo u fhelisa.’
11 Zwe Yehova Murena Muvhusahoṱhe a zwi amba ndi hezwi:
‘Banga ḽa khosi ya Babele ḽi ḓo u ḓela.+
12 Ndi ḓo ita uri magogo au a vhulawe nga banga ḽa vhahali,Nga vhoṱhe vha re na tshiṱuhu u fhira tshaka dzoṱhe.+
Vha ḓo fhelisa u ḓikukumusa ha Vhaegipita, na magogo avho oṱhe a ḓo fheliswa.+
13 Ndi ḓo vhulaya zwifuwo zwavho zwoṱhe zwine zwa vha tsini na maḓi avho manzhi,+A hu nga ḓo vha na mulenzhe kana khwanḓa ine ya ḓo dovha ya dzikusa maḓi.’+
14 ‘Nga tshenetsho tshifhinga ndi ḓo kunakisa maḓi avho,Nda ita uri milambo yavho i elele sa mapfura,’ u ralo Yehova Murena Muvhusahoṱhe.
15 ‘Musi ndi tshi ita uri Egipita ḽi vhe shubi, shango ḽo dzhielwaho zwoṱhe zwine ḽa vha nazwo,+Musi ndi tshi vhulaya vhadzulapo vhoṱhe vha re khaḽo,Ndi hone vha tshi ḓo ḓivha uri ndi nṋe Yehova.+
16 Lwonolwu ndi luimbo lwa tshililo, vhathu vha ḓo lu imba;Vhananyana vha dzitshaka vha ḓo lu imba.
Vha ḓo lu imbela ḽa Egipita na magogo aḽo,’ u ralo Yehova Murena Muvhusahoṱhe.”
17 Yehova o amba na nṋe nga ṅwaha wa vhu 12, nga ḓuvha ḽa vhu 15 ḽa wonoyo ṅwedzi, a ri:
18 “Murwa muthu, lilela gogo ḽa Egipita, ḽeneḽo shango u ḽi tsitsele vhiḓani, ḽone na vhananyana vha tshaka dzi re na maanḓa na vhane vha khou tsela dindini.*
19 “‘U fhira nnyi nga lunako? Tsela dindini u ladzwe na vha songo fumbaho!’
20 “‘Vha ḓo wela vhukati ha vho vhulawaho nga banga.+ Ḽa Egipita ḽo kumedzelwa banga; ḽi kokodze na magogo aḽo oṱhe.
21 “‘Vhahali vha ḓo amba nae na vhathusi vhawe vhe fhasi-fhasi Vhiḓani.* Vha ḓo tsela fhasi vha eḓedzwa na vha songo fumbaho, vho vhulawaho nga banga.
22 Asuri u henefho na tshivhidzo tshawe tshoṱhe. O tangiwa nga mavhiḓa avho, vhoṱhe vho vhulawa nga banga.+
23 Mavhiḓa awe a dindini fhasi-fhasi, na tshivhidzo tshawe tshoṱhe tsho tanga vhiḓa ḽawe, vhoṱhe vho vhulawa nga banga, ngauri vho ita uri shango ḽi dzhenwe nga nyofho.
24 “‘Elamu+ na magogo awe vha henengei, vho tanga vhiḓa ḽawe, vhoṱhe vho vhulawa nga banga. Vho tsela fhasi vhiḓani vha songo fumba, vhenevho vhe vha ita uri shango ḽi dzhenwe nga nyofho. Zwino vha ḓo farwa nga ṱhoni khathihi na vhane vha tsela dindini.*
25 O adzelwa vhulalo na vho vhulawaho, khathihi na magogo awe o tangaho mavhiḓa awe. Vhoṱhe a vho ngo fumba, vho vhulawa nga banga ngauri vho ita uri shango ḽi dzhenwe nga nyofho; vha ḓo farwa nga ṱhoni na vhane vha tsela dindini.* O vhewa vhukati ha vho vhulawaho.
26 “‘Henefho hu na Meseke na Thubali+ na magogo avho oṱhe. Mavhiḓa avho* o mu tanga. Vhoṱhe a vho ngo fumba, vho vhulawa nga banga ngauri vho ita uri shango ḽi dzhenwe nga nyofho.
27 Naa vha nga si ladzwe na vhahali vha songo fumbaho vhe vha vhulawa, vho tselaho Vhiḓani* na zwiṱhavhane zwavho zwa nndwa? Vha ḓo vhea mabanga avho nga fhasi ha ṱhoho dzavho,* zwivhi zwavho zwa dzula kha marambo avho, ngauri vhenevha vhahali vho ita uri shango ḽi dzhenwe nga nyofho.
28 Fhedzi iwe u ḓo fheliswa na vha songo fumbaho, u ḓo eḓedzwa na vho vhulawaho nga banga.
29 “‘Edomo+ ḽi henengei, mahosi aḽo na vharangaphanḓa vhaḽo vhoṱhe, vhe naho vho vha vhe na maanḓa, vho vhulungwa na vho vhulawaho nga banga; na vhone vha ḓo ladzwa na vha songo fumbaho+ na vhane vha tsela dindini.*
30 “‘Vhakololo* vhoṱhe vha devhula vha henefho khathihi na vhoṱhe Vhasidoni,+ vhe vha tsela fhasi na vho vhulawaho vho shona, naho maanḓa avho o ita uri vhathu vha ofhe. Vha songo fumbaho vha ḓo ladzwa na vho vhulawaho nga banga, vha ḓo shoniswa na vhane vha tsela dindini.*
31 “‘Farao u ḓo vhona zwoṱhe zwine zwa khou itea, a khuthadzwa nga zwo iteaho kha magogo awe;+ Farao na mmbi yawe vha ḓo vhulawa nga banga,’ u ralo Yehova Murena Muvhusahoṱhe.
32 “‘Ngauri Farao o ita uri shango ḽi dzhenwe nga nyofho, ene na magogo awe oṱhe vha ḓo vhulungwa na vha songo fumbaho vhe vha vhulawa nga banga,’ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Kana “u ṱungufhala.”
^ Kana “vhiḓani.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “vhiḓani.”
^ Kana “vhiḓani.”
^ Thevhedz., “awe.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Khamusi zwi khou ambela kha vhahali vhe vha huliswa nga u vhulungwa na mabanga avho.
^ Kana “vhiḓani.”
^ Kana “Vharangaphanḓa.”
^ Kana “vhiḓani.”
