Hesekiele 35:1-15
-
Vhuporofita vhu ambaho nga ha thavha dza Seiri (1-15)
35 Yehova a dovha a amba na nṋe, a ri:
2 “Murwa muthu, lavhelesa dzinguni ḽa thavhani dza Seiri,+ u porofite ngaḽo.+
3 U ambe naḽo u ri, ‘Yehova Murena Muvhusahoṱhe u ri: “Iwe dzingu ḽa thavhani dza Seiri, ndi lwa na iwe, ndi ḓo u rwa nga tshanḓa tshanga wa sala u shubi.+
4 Ndi ḓo ita uri miḓi yau i vhe mashubi, i ḓo vha shubi;+ ndi hone u tshi ḓo ḓivha uri ndi nṋe Yehova.
5 Ngauri wo dzula u tshi vhenga+ Vhaisiraele, wa vha vhulaya nga banga musi vhe khomboni, musi vha tshi khou pfiswa vhuṱungu lwa u fhedza.”’+
6 “‘Nga zwenezwo, ndi ana nga vhutshilo hanga,’ u ralo Yehova Murena Muvhusahoṱhe, ‘ndi ḓo ita uri u shululwe malofha. Lufu lu ḓo u pandamedza.+ Samusi u tshi vhenga malofha, lufu lu ḓo u pandamedza.+
7 Ndi ḓo ita uri dzingu ḽa thavhani dza Seiri ḽi vhe shubi,+ nda vhulaya ane a fhira nga henefho na ane a vhuyelela hone.
8 Ndi ḓo ḓadza thavha dzawo nga vho vhulawaho; vho vhulawaho nga banga vha ḓo wela zwikwarani zwau, magovhani au na milambwanani yau yoṱhe.
9 Ndi ḓo ita uri u vhe shubi lwa tshoṱhe, miḓi yau a i nga dzulwi nga muthu;+ ndi hone u tshi ḓo ḓivha uri ndi nṋe Yehova.’
10 “Ngauri wo ri, ‘Hedzi tshaka mbili na haya mashango mavhili zwi ḓo vha zwanga, ri ḓo dzhia zwenezwi zwithu zwa vha zwashu,’+ naho Yehova o vha e hone,
11 ‘nga zwenezwo, ndi ana nga vhutshilo hanga,’ u ralo Yehova Murena Muvhusahoṱhe, ‘ndi ḓo u lifhedza nga nṱhani ha uri wo vha sinyutshela, wa vha itela vivho na u vha vhenga;+ nda ita uri ndi ḓivhiwe vhukati havho musi ndi tshi u haṱula.
12 Ndi hone u tshi ḓo ḓivha uri ndi nṋe Yehova, ndo pfa zwithu zwoṱhe zwa lunyadzo zwe wa zwi amba nga ha thavha dza Isiraele musi u tshi ri, “Vho tshinyadzwa, vho kumedzelwa riṋe uri ri vha fhelise.”
13 Wo ntsasaladza u tshi ḓihudza, wa ntsema lunzhi-lunzhi.+ Zwoṱhe ndo zwi pfa.’
14 “Yehova Murena Muvhusahoṱhe u ri: ‘Ḽifhasi ḽoṱhe ḽi ḓo takala musi ndi tshi u ita shubi.
15 Samusi wo takala musi ifa ḽa nnḓu ya Isiraele ḽi tshi itwa shubi, ndi zwine nda ḓo u ita zwone.+ U ḓo vha shubi, iwe thavha ya dzinguni ḽa Seiri, vhoṱhe vha Edomo;+ vha ḓo ḓivha uri ndi nṋe Yehova.’”
