Hesekiele 4:1-17
4 “Iwe murwa muthu, dzhia tshidina u tshi vhee phanḓa hau. U ole muḓi wa Yerusalema khatsho.
2 U tshi tange,+ u tshi fhaṱele luvhondo lwa u tshi tanga,+ u tshi fhaṱele na mutsheṱo wa u tshi tanga,+ u tshi tange nga madennde, u tshi tange nga matanda.+
3 Dzhia pani ya tsimbi u i vhee tsini natsho sa luvhondo lwa tsimbi vhukati hau na muḓi. Nga zwenezwo, u u sedze, u ḓo vha wo tangiwa; u tea u u tanga. Hezwi zwi fanyisela zwine zwa ḓo itea kha Vhaisiraele.+
4 “Nga zwenezwo, u lale nga lurumbu lwau lwa tsha monde u hwale mulandu wa Vhaisiraele.+ U ḓo hwala wonoyo mulandu wavho lwa maḓuvha oṱhe ane wa ḓo lala nga lwonolwo lurumbu.
5 Ndi ḓo u itisa zwenezwi lwa maḓuvha a 390, a tshimbidzanaho na miṅwaha ya mulandu wavho,+ wa hwala mulandu wa Vhaisiraele.
6 U fanela u a fhedza.
“U dovhe u lale nga lurumbu lwau lwa tsha u ḽa, u hwale mulandu wa Vhayuda+ lwa maḓuvha a 40. Ḓuvha ḽithihi ḽi eḓana na ṅwaha, ḓuvha ḽithihi ḽi eḓana na ṅwaha, ndi zwe nda ṋea iwe.
7 U ḓo lavhelesa zwo tangaho Yerusalema+ wo finya tshanḓa, wa porofita nga hawo.
8 “Ndi ḓo u vhofha nga thambo uri u si kone u rembulutshela kha luṅwe lurumbu lwau u swika u tshi fhedza maḓuvha au a u tanga muḓi.
9 “U fanela u dzhia goroi, baḽi, ṋawa, nḓodzi, mufhoho na luvhele, u zwi shele khalini, u bake vhurotho ngazwo. Ngauri u ḓo vhu ḽa lwa maḓuvha a 390 ane wa ḓo vha wo eḓela nga lurumbu lwau.+
10 Zwenezwo zwiḽiwa u ḓo zwi kala zwa vha shekele dza 20* wa zwi ḽa nga ḓuvha. U ḓo zwi ḽa nga tshifhinga tshazwo.
11 “U ḓo nwa maḓi o kalwaho nga zwikalo zwa rathi zwa hini.* U ḓo a nwa nga tshifhinga tshao.
12 “U ḓo vhu ḽa nga nḓila ye wa vha u tshi ḓo ḽa ngayo ḽofo ya baḽi; u ḓo vhu baka vha tshi zwi vhona, u tshi shumisa mulilo wa malaṱwa o omaho a vhathu.”
13 Yehova a ri: “Iyi ndi nḓila ine Vhaisiraele vha ḓo ḽa ngayo vhurotho havho, vha ḓo vhu ḽa vhu na tshika vhukati ha tshaka dzine nda ḓo vha balanganyela khadzo.”+
14 Ndi hone ndi tshi ri: “Iwe Yehova Murena Muvhusahoṱhe, ndi nga si kone u ita zwenezwo! A thi athu u ḓishata tshika nga u ḽa ṋama ya tshipuka tsho faho kana tshe tsha vhulawa,+ a thi athu u ḽa ṋama i re na tshika u bva ndi tshee muṱuku u swikela zwino.”+
15 Nga zwenezwo, a amba na nṋe a ri: “Zwo luga, ndi ḓo u tendela u tshi shumisa matoko a kholomo nṱhani ha u shumisa malaṱwa a vhathu, u ḓo shumisa one u baka vhurotho.”
16 A amba na nṋe a ri: “Murwa muthu, ndi ḓo ita uri hu si tsha vha na zwiḽiwa Yerusalema,+ nga nṱhani ha u tambula vha ḓo ḽa vhurotho ho thoma ha kaliwa,+ vha nwa maḓi o kaliwaho vhe na nyofho.+
17 Zwenezwi zwi ḓo itea u swikela vhurotho na maḓi zwi tshi fhela, vha ḓo lavhelesana vho mangala, vha fa nga nṱhani ha vhukhakhi havho.
Ṱhaluso dzi re magumoni a siaṱari
^ Gramu dzi ṱoḓaho u vha 230. Sedzani Ṱhume. B14.
^ Ḽithara dzi ṱoḓaho u vha 0,6. Sedzani Ṱhume. B14.