Hesekiele 40:1-49
40 Nga ṅwaha wa vhu 25 ri vhuthubwani,+ mathomoni a wonoyo ṅwaha, nga ḓuvha ḽa vhufumi ḽa wonoyo ṅwedzi, musi ho no fhela miṅwaha ya 14 muḓi wo fheliswa,+ nga ḽeneḽo ḓuvha tshanḓa tsha Yehova tsho vha tshi kha nṋe, a nnyisa muḓini.+
2 Mudzimu a nnyisa shangoni ḽa Isiraele, a mmbea kha thavha ndapfu ndi kha bono,+ he ha vha hu na tshifhaṱo tshi ngaho muḓi thungo ya tshipembe.
3 Musi a tshi mmbea henefho, nda vhona munna we a vha a tshi penya sa koporo.+ O vha o fara thambo na luṱanga zwa u kala,*+ o ima tsini na khoro.
4 Onoyo munna a amba na nṋe a ri: “Murwa muthu, lavhelesa nga vhuronwane, u thetshelese zwavhuḓi, u livhise ṱhogomelo kha zwoṱhe zwine nda u sumbedza, ngauri ndi ngazwo wo ḓiswa fhano. Vhudza vha nnḓu ya Isiraele zwoṱhe zwine wa zwi vhona.”+
5 Ndo vhona luvhondo lwo monaho nga nnḓa ha thembele.* Onoyo munna o vha o fara luṱanga lwa u kala lwa vhulapfu ha khubithi dza rathi (kha khubithi iṅwe na iṅwe ho engedzwa vhuphara ha minwe miṋa).* A thoma u kala luvhondo, vhudenya halwo ho vha vhu tshi lingana na luṱanga luthihi, vhulapfu halwo vhu tshi lingana na luṱanga luthihi.
6 A swika khoroni yo lavhelesaho vhubvaḓuvha+ a gonya zwiṱepisi. Musi a tshi kala muṋangoni, a wana vhuphara hawo vhu tshi lingana na ha luṱanga luthihi, na vhuphara ha muṋango wa vhuvhili vhu tshi lingana na luṱanga luthihi.
7 Kamara iṅwe na iṅwe ya vhalindi yo vha i vhulapfu ha luṱanga luthihi na vhuphara ha luṱanga luthihi, u bva kha iṅwe kamara u ya kha iṅwe ho vha hu khubithi ṱhanu.+ Muṋango wa khoro i re tsini na vurannḓa ya khoro yo livhanaho na thembele wo vha u tshi lingana na luṱanga luthihi.
8 A kala vurannḓa ya khoro yo livhanaho na thembele, a wana i tshi lingana na luṱanga luthihi.
9 A kona u kala vurannḓa ya khoro, ye ya vha i khubithi dza malo; a kala na phuphu dzi re nga matungo, dze dza vha dzi khubithi mbili; vurannḓa ya khoro yo vha yo livhana na thembele.
10 Kha thungo dzoṱhe dza khoro ya vhubvaḓuvha ho vha hu na kamara tharu dza vhalindi. Dzenedzo kamara dzo vha dzi tshi lingana, na phuphu dza nga matungo dzo vha dzi tshi lingana.
11 A kala na vhuphara ha muṋango wa khoro, a wana hu khubithi dza 10; vhulapfu ha khoro ho vha hu khubithi dza 13.
12 Nga phanḓa ha kamara dza vhalindi ho vha hu na fhethu ho fhaṱelwaho luvhondo hu linganaho khubithi nthihi. Dzenedzo kamara dza vhalindi dzi re matungo oṱhe dzo vha dzi khubithi dza rathi.
13 A kala khoro u bva kha ṱhanga ya kamara ya vhalindi* u ya kha iṅwe kamara, a wana i vhuphara ha khubithi dza 25; miṋango yo vha yo livhana.+
14 A kala phuphu dza nga matungo, a wana dzi vhulapfu ha khubithi dza 60, dzi tshi lingana na phuphu dza nga matungo a khoro dzoṱhe u mona na muṱa.
15 U bva muṋangoni wa nga phanḓa ha khoro u swika vurannḓani i re kha iṅwe thungo ya khoro ho vha hu khubithi dza 50.
16 Kamara iṅwe na iṅwe ya vhalindi yo vha i na mafasiṱere+ a re na fureme tsekene na nga nṱha ha phuphu dzoṱhe dza khoro. Ho vha hu na mafasiṱere matungo oṱhe a vurannḓa, kha phuphu dza nga matungo ho vha ho oliwa zwifanyiso zwa muri wa mutshevho.+
17 A nnyisa muṱani wa nga nnḓa, nda vhona kamara dza u ḽela+ na phevimennde yo monaho na muṱa. Hune ha vha na phevimennde ho vha hu na kamara dza u ḽela dza 30.
18 Phevimennde i re tsini na khoro yo vha i tshi lingana na vhulapfu ha khoro, phevimennde yeneyo yo vha i fhasi.
19 A kala u bva kha khoro ya fhasi u swika kha muṱa wa nga ngomu. A wana hu vhulapfu ha khubithi dza 100 thungo ya vhubvaḓuvha na thungo ya devhula.
20 Muṱa wa nga nnḓa wo vha u na khoro yo sedzaho devhula, a kala vhulapfu na vhuphara hayo.
21 Ho vha hu na kamara tharu dza vhalindi thungo dzoṱhe. Mielo ya phuphu dza nga matungo na ya vurannḓa yo vha i tshi lingana na ya khoro ya u thoma. Vhulapfu hayo ho vha hu khubithi dza 50 na vhuphara hayo ho vha hu khubithi dza 25.
22 Mafasiṱere ayo, vurannḓa yayo na zwifanyiso zwa muri wa mutshevho+ zwo vha zwi tshi lingana na zwa khoro ya vhubvaḓuvha. Vhathu vho vha vha tshi gonya zwiṱepisi zwa sumbe uri vha swike muṋangoni, phanḓa hazwo ho vha hu na vurannḓa.
23 Ho vha hu na khoro muṱani wa nga ngomu yo livhanaho na khoro ya devhula na iṅwe yo livhanaho na khoro ya vhubvaḓuvha. A kala tshikhala tsha u bva kha iṅwe khoro u ya kha iṅwe khoro, a wana hu khubithi dza 100.
24 A nnyisa thungo ya tshipembe, nda vhona khoro ya tshipembe.+ A kala phuphu dza nga matungo ayo na vurannḓa yayo, a wana zwi tshi lingana na zwa dziṅwe khoro.
25 Ho vha hu na mafasiṱere thungo dzoṱhe na kha vurannḓa a fanaho na mafasiṱere a dziṅwe khoro. Vhulapfu ha yeneyo khoro hu khubithi dza 50, vhuphara hayo hu khubithi dza 25.
26 Wo vha u tshi gonya zwiṱepisi zwa sumbe uri u swike khayo,+ phanḓa hazwo ho vha hu na vurannḓa. Kha phuphu dzayo dza nga matungo ho oliwa zwifanyiso zwa muri wa mutshevho, thungo dzoṱhe.
27 Muṱa wa nga ngomu wo vha u na khoro yo lavhelesaho tshipembe; a kala a tshi tsela thungo ya tshipembe u bva kha iṅwe khoro u ya kha iṅwe khoro, a wana hu khubithi dza 100.
28 A ndzhenisa muṱani wa nga ngomu nga khoro ya tshipembe; musi a tshi kala khoro ya tshipembe, a wana i tshi lingana na dziṅwe.
29 Kamara dzayo dza vhalindi, phuphu dzayo na vurannḓa yayo, zwo vha zwi tshi lingana na zwa dziṅwe. Ho vha hu na mafasiṱere thungo dzoṱhe na kha vurannḓa. Vhulapfu ha yeneyo khoro hu khubithi dza 50, vhuphara hayo hu khubithi dza 25.+
30 Thungo dzoṱhe hu na vurannḓa; vhulapfu hadzo hu khubithi dza 25, vhuphara hadzo hu khubithi dza 5.
31 Vurannḓa yayo yo lavhelesa thungo ya muṱani wa nga nnḓa, phuphu dzayo dzo oliwa zwifanyiso zwa muri wa mutshevho thungo dzoṱhe,+ muthu o vha a tshi fanela u gonya zwiṱepisi zwa malo uri a swike khayo.+
32 A nnyisa muṱani wa nga ngomu u re thungo ya vhubvaḓuvha, a kala khoro, a wana i tshi lingana na dziṅwe.
33 Kamara dzayo dza vhalindi, phuphu dzayo na vurannḓa yayo zwi tshi lingana na zwa dziṅwe, hu na mafasiṱere thungo dzoṱhe na vurannḓani. Vhulapfu ha yeneyo khoro hu khubithi dza 50, vhuphara hayo hu khubithi dza 25.
34 Vurannḓa yayo yo lavhelesa muṱani wa nga nnḓa, kha phuphu dzayo mbili dza nga matungo ho oliwa zwifanyiso zwa muri wa mutshevho, muthu o vha a tshi fanela u gonya zwiṱepisi zwa malo uri a swike khayo.
35 A nnyisa khoroni ya devhula+ a i kala; a wana i tshi lingana na dziṅwe.
36 Kamara dzayo dza vhalindi, phuphu dzayo na vurannḓa yayo zwi tshi lingana na zwa dziṅwe. Hu na mafasiṱere thungo dzoṱhe. Vhulapfu ha yeneyo khoro hu khubithi dza 50, vhuphara hayo hu khubithi dza 25.
37 Phuphu dzayo dza nga matungo dzo lavhelesa muṱani wa nga nnḓa, phuphu dzayo dzo oliwa zwifanyiso zwa muri wa mutshevho thungo dzoṱhe, muthu a tshi fanela u gonya zwiṱepisi zwa malo uri a swike khayo.
38 Ho vha hu na kamara ya u ḽela ine ya vha na muṋango wayo i re tsini na phuphu dza khoro, zwifhiwa zwa u fhiswa zwi tshi ṱanzwelwa hone.+
39 Phanḓa ha vurannḓa ya khoro hu na maṱafula mavhili thungo dzoṱhe a u ṱhavhela zwifhiwa zwa u fhiswa,+ zwifhiwa zwa u pfumelela tshivhi+ na zwifhiwa zwa u pfumelela mulandu.+
40 Nḓilani i yaho kha khoro ya devhula, hu na maṱafula mavhili nnḓa ha muṋango. Hu na maṅwe maṱafula mavhili kha luṅwe lurumbu lwa vurannḓa ya khoro.
41 Ho vha hu na maṱafula maṋa thungo dzoṱhe dza khoro, o ṱangana e malo, vha tshi ṱhavhela zwiṱhavhelo khao.
42 Maṱafula maṋa a tshifhiwa tsha u fhiswa o vhaḓiwa nga matombo. Vhulapfu hao ho vha vhu khubithi nthihi na hafu, vhuphara hao hu khubithi nthihi na hafu, u ya nṱha e khubithi nthihi. Khao ho vha hu tshi vhewa zwishumiswa zwa u ṱhavha zwifhiwa zwa u fhiswa na zwiṱhavhelo.
43 Kha mbondo dzoṱhe ho vha hu na raga dza vhuphara ha minwe miṋa; ṋama ya zwifhiwa zwa tshiṱhavhelo yo vha i tshi vhewa nṱha ha maṱafula.
44 Nnḓa ha khoro ya nga ngomu ho vha hu na kamara dza u ḽela vhaimbi;+ dzo vha dzi muṱani wa nga ngomu tsini na khoro ya devhula, dzo lavhelesa tshipembe. Iṅwe kamara ya u ḽela yo vha i tsini na khoro ya vhubvaḓuvha, yo lavhelesa devhula.
45 A amba na nṋe a ri: “Heyi kamara ya u ḽela yo lavhelesaho tshipembe ndi ya vhotshifhe vhane vha shuma mishumo ya thembeleni.+
46 Kamara ya u ḽela yo lavhelesaho devhula ndi ya vhotshifhe vhane vha shuma aḽeṱareni.+ Ndi vharwa vha Tsadoko,+ vhane vha bva kha Vhalevi vho ṋewaho mushumo wa u sendela tsini na Yehova uri vha mu shumele.”+
47 Nga zwenezwo, a kala muṱa wa nga ngomu. Vhulapfu hawo ho vha hu khubithi dza 100 na vhuphara hawo hu khubithi dza 100, u tshi eḓana thungo dzoṱhe. Phanḓa ha thembele ho vha hu na aḽeṱare.
48 A nnyisa vurannḓani ya thembele,+ a kala phuphu dza vurannḓa, a wana ya thungo iṅwe i khubithi ṱhanu na ya thungo iṅwe i khubithi ṱhanu. Luṅwe lurumbu lwa muṋango lwo vha lu khubithi tharu na luṅwe lu khubithi tharu.
49 Vhulapfu ha vurannḓa ho vha vhu khubithi dza 20 na vhuphara hayo vhu khubithi dza 11.* Vhathu vho vha vha tshi fanela u gonya zwiṱepisi uri vha swike khayo. Thungo dzoṱhe ho vha hu na phuphu tsini na mbondo.+
Ṱhaluso dzi re magumoni a siaṱari
^ Sedzani Ṱhume. B14.
^ Thevhedz., “nnḓu.” Ḽeneḽi ipfi ḽo shumiswa kha ndima 40 u swika kha ndima 48, ndi musi “nnḓu” i tshi ambela kha zwifhaṱo zwi re thembeleni kana thembele yone iṋe.
^ Thevhedz., “luṱanga lwa u kala lu re na khubithi dza rathi, khubithi na vhuphara ha minwe miṋa.” Zwenezwi zwi ambela kha khubithi ndapfu. Sedzani Ṱhume. B14.
^ Khamusi zwi khou ambela u bva nṱha ha luvhondo lwa kamara ya vhalindi.
^ Kana khamusi, “12.”
