Hesekiele 41:1-26
41 A nnyisa nnḓa ha nnḓu khethwa,* a kala phuphu dza nga matungo; kha iṅwe thungo a wana dzi vhuphara ha khubithi* dza rathi na kha iṅwe thungo dzi vhuphara ha khubithi dza rathi.
2 Muṋango wo vha u vhuphara ha khubithi dza fumi, mbondo dza nga thungo ha muṋango dzo vha dzi khubithi ṱhanu kha iṅwe thungo na khubithi ṱhanu kha iṅwe thungo. A kala vhulapfu hawo a wana vhu khubithi dza 40, na vhuphara hawo a wana vhu khubithi dza 20.
3 A dzhena nga ngomu* a kala phuphu ya nga matungo a muṋango, vhudenya hayo ho vha hu khubithi mbili, muṋango u vhuphara ha khubithi dza rathi. Mbondo dza nga thungo ha muṋango dzo vha dzi* khubithi dza sumbe.
4 A kala kamara yo lavhelesaho nnḓu khethwa ya nga nnḓa, a wana i vhulapfu ha khubithi dza 20 na vhuphara ha khubithi dza 20.+ A amba na nṋe a ri: “Hafha fhethu ndi Hukhethwa-khethwa.”+
5 A kala luvhondo lwa thembele, a wana vhudenya halwo hu khubithi dza rathi. Kamara dzo monaho na thembele dzo vha dzi vhuphara ha khubithi nṋa.+
6 Kamara dza nga matungo dzo vha dzi na zwipiḓa zwiraru zwo bebekanaho, kha tshipiḓa tshiṅwe na tshiṅwe ho vha hu na kamara dza 30. Mbondo dza thembele dzo vha dzi na luguvha u mona nadzo, lwonolwo luguvha lwo vha lu tshi tika mabulannga a kamara, fhedzi eneo mabulannga a u tika o vha a sa dzheni kha luvhondo lwa thembele.+
7 Kamara dzo vha dzo ṱanḓavhuwa u bva kha tshipiḓa tsha u thoma u swika kha tshipiḓa tsha vhuraru.+ Matungo oṱhe a thembele ho vha hu na zwiṱepisi u bva kha tshipiḓa tsha u thoma u ya kha tshipiḓa tsha vhuvhili u swika kha tsha vhuraru.
8 Ndo vhona hu na pulatifomo u mona na thembele, mitheo ya kamara dza nga thungo yo vha i mielo ya luṱanga lwa khubithi dza rathi u bva fhasi u ya kha thungo ya nṱha.
9 Vhuphara ha luvhondo lwa nga nnḓa lwa kamara dza nga matungo ho vha hu khubithi ṱhanu. Ho vha hu na fhethu hu si na tshithu* tsini na kamara dza nga thungo dze dza vha dzi tshipiḓa tsha thembele.
10 Vhukati ha thembele na kamara dza u ḽela+ ho vha hu na fhethu he ha vha hu vhuphara ha khubithi dza 20 thungo dzoṱhe.
11 Ho vha hu na muṋango vhukati ha kamara dza nga matungo na fhethu hune ha sa vhe na tshithu thungo ya devhula na muṋango thungo ya tshipembe. Vhuphara ha fhethu hu si na tshithu ho vha hu khubithi ṱhanu thungo dzoṱhe.
12 Tshifhaṱo tshe tsha vha tshi vhukovhela tsho livhana na fhethu hu si na tshithu tsho vha tshi vhuphara ha khubithi dza 70 na vhulapfu ha khubithi dza 90; luvhondo lwa tshifhaṱo tshenetsho lwo vha lu vhudenya ha khubithi ṱhanu thungo dzoṱhe.
13 A kala thembele a wana i vhulapfu ha khubithi dza 100. Fhethu hu si na tshithu, tshifhaṱo* na mbondo dzayo na zwone zwo vha zwi vhulapfu ha khubithi dza 100.
14 Vhuphara ha nga phanḓa ha thembele ho lavhelesaho vhubvaḓuvha na vhuphara ha fhethu hu si na tshithu ho vha hu khubithi dza 100.
15 A kala vhulapfu ha tshifhaṱo tsho lavhelesaho nga murahu ha fhethu hu si na tshithu na phasedzhi dzatsho thungo dzoṱhe, a wana zwi khubithi dza 100.
A dovha a kala nga nnḓa ha nnḓu khethwa, na nga ngomu ha nnḓu khethwa+ na vurannḓa ya muṱa,
16 na muṋango, mafasiṱere e a vha e na fureme tsekene,+ na phasedzhi dze dza vha dzi henefho fhethu huraru. Tsini na muṋango ho vha hu na mabulannga+ kha luvhondo u bva fhasi u swika kha mafasiṱere; mafasiṱere o vha e na mabulannga.
17 Ho kaliwa nṱha ha muṋango na nga ngomu ha thembele na nga nnḓa na kha luvhondo lwoṱhe thungo dzoṱhe.
18 Ho vha hu na zwifanyiso zwa vhakerube+ na zwa miri ya mitshevho,+ tsini na muri muṅwe na muṅwe wa mutshevho ho vha ho ima vhakerube vhavhili, mukerube muṅwe na muṅwe o vha e na zwifhaṱuwo zwivhili.
19 Tshifhaṱuwo tsha muthu tsho vha tsho lavhelesa muri wa mutshevho u re kha iṅwe thungo, tshifhaṱuwo tsha ndau tsho lavhelesa muri wa mutshevho u re kha iṅwe thungo.+ Zwo vha zwo olwa nga yeneyi nḓila kha thembele yoṱhe.
20 U bva fhasi u ya nṱha ha muṋango ho vha hu na zwifanyiso zwa vhakerube na miri ya mitshevho luvhondoni lwa nnḓu khethwa.
21 Fureme dza miṋango* ya nnḓu khethwa dzo vha dzi tshi lingana matungo oṱhe.+ Phanḓa ha fhethu hukhethwa* ho vha hu na tshithu tshine tsha nga
22 aleṱare+ ya mabulannga ye ya vha i khubithi tharu u ya nṱha na vhulapfu ha khubithi mbili. Yo vha i na thungo nṋa, fhasi hayo na nga thungo hayo ho vha ho itwa nga mabulannga. A amba na nṋe a ri: “Heḽi ndi ṱafula ḽi re phanḓa ha Yehova.”+
23 Nḓuni khethwa ho vha hu na muṋango u re na mavothi mavhili na fhethu hukhethwa hu na muṋango u re na mavothi mavhili.+
24 Muṋango muṅwe na muṅwe wo vha u na mavothi mavhili ane a petea.
25 Ho vha hu na zwifanyiso zwa vhakerube na zwa miri ya mitshevho kha mavothi a nnḓu khethwa, zwine zwa fana na zwine zwa vha kha luvhondo.+ Nga nnḓa ho vha hu tshi dovha ha vha na vurannḓa yo fulelwaho nga mabulannga.
26 Ho vha hu tshi dovha ha vha na mafasiṱere a re na fureme tsekene+ na zwifanyiso zwa miri ya mitshevho thungo dzoṱhe dza vurannḓa, na nga matungo a kamara dza thembele na kha ṱhanga.
Ṱhaluso dzi re magumoni a siaṱari
^ Thevhedz., “thembele.” Kha ndima 41 na ndima 42, ḽeneḽi ipfi ḽi ambela fhethu hune ha vha nnḓa ha nnḓu khethwa kana kha nnḓu khethwa yoṱhe (thembele i katela fhethu Hukhethwa na Hukhethwa-khethwa).
^ Zwenezwi zwi ambela kha kubithi ndapfu. Sedzani Ṱhume. B14.
^ Ndi nga ngomu nḓuni khethwa kana fhethu Hukhethwa-khethwa.
^ Thevhedz., “Vhuphara ha muṋango ho vha hu.”
^ Khamusi ndi fhethu he ha vha hu tshi tshimbilwa hone u mona na thembele.
^ Ndi tshifhaṱo tshi re vhukovhela ha nnḓu khethwa.
^ Thevhedz., “Fureme dza muṋango.” Zwi vhonala zwi tshi ambela kha muṋango wa u dzhena fhethu Hukhethwa.
^ Zwi vhonala zwi tshi ambela kha fhethu Hukhethwa-khethwa.
