Hesekiele 42:1-20
42 A nnyisa kha muṱa wa nga nnḓa kha thungo ya devhula.+ A ndzhenisa kamarani dza u ḽela dze dza vha dzi tsini na fhethu hu si na tshithu,+ devhula ha tshifhaṱo tshe tsha vha tsho livhana nadzo.+
2 Vhulapfu hadzo thungo ya muṋango wa devhula ho vha hu khubithi* dza 100, vhuphara hadzo ho vha hu khubithi dza 50.
3 Muṱa wa nga ngomu wo vha u khubithi dza 20,+ kamara dza u ḽela dzo vha dzi vhukati ha muṱa wa nga ngomu na phevimennde ya muṱa wa nga nnḓa. Phasedzhi dzadzo dzo vha dzo livhana, dzi zwipiḓa zwiraru u ya nṱha.
4 Phanḓa ha kamara dza u ḽela ho vha hu na hune ha tshimbilwa hone ha nga ngomu+ ha vhuphara ha khubithi dza 10 na vhulapfu ha khubithi dza 100,* miṋango yadzo yo vha yo lavhelesa devhula.
5 Kamara dza u ḽela dze dza vha dzi kha tshipiḓa tsha vhuraru dzo vha dzi ṱhukhu kha dzi re kha tshipiḓa tsha u thoma na tsha vhuvhili, ngauri phasedzhi dzadzo dzo vha dzi khulwane.
6 Ngauri dzo vha dzi zwipiḓa zwiraru u ya nṱha, fhedzi dzo vha dzi si na phuphu dzine dza fana na dzi re miṱani. Ndi ngazwo tshipiḓa tsha vhuraru tsho vha tshi tshiṱuku kha tsha u thoma na tsha vhuvhili.
7 Luvhondo lwa nga nnḓa lwo fhaṱiwaho nga matombo lu re tsini na kamara dza u ḽela dzi re tsini na muṱa wa nga nnḓa wo lavhelesaho dziṅwe kamara dza u ḽela lwo vha lu vhulapfu ha khubithi dza 50.
8 Ngauri vhulapfu ha kamara dza u ḽela dze dza vha dzi tsini na muṱa wa nga nnḓa ho vha hu khubithi dza 50, fhedzi vhulapfu ha dzo lavhelesaho nnḓu khethwa ho vha hu khubithi dza 100.
9 Thungo ya vhubvaḓuvha ho vha hu na muṋango une wa bva muṱani wa nga nnḓa wa livha kamarani dza u ḽela.
10 Ho vha hu tshi dovha ha vha na kamara dza u ḽela nga ngomu ha luvhondo lwo fhaṱiwaho nga matombo lwa muṱa u re thungo ya vhubvaḓuvha, tsini na fhethu ho vuleaho na tsini ha tshifhaṱo.+
11 Ho vha hu na fhethu ha u tshimbila phanḓa hadzo hune ha fana na ha kamara dza u ḽela dzi re thungo ya devhula.+ Vhulapfu hadzo na vhuphara hadzo ho vha hu tshi lingana, dzo vha dzi na miṋango ine ya fana na nḓila ye dza fhaṱiwa ngayo yo vha i tshi fana. Miṋango yadzo
12 yo vha i tshi fana na ya kamara dza u ḽela dzi re thungo ya tshipembe. Ho vha hu na muṋango mathomoni a hune ha tshimbilwa hone, phanḓa ha luvhondo lwo fhaṱiwaho nga matombo lu re thungo ya vhubvaḓuvha, hune muthu a nga kona u dzhena.+
13 A amba na nṋe a ri: “Kamara dza u ḽela dzi re devhula na kamara dza u ḽela dzi re tshipembe dzi re tsini na fhethu ho vuleaho+ ndi kamara khethwa dza u ḽela hune vhotshifhe vhane vha sendela tsini na Yehova vha ḽela hone zwifhiwa zwikhethwa-khethwa.+ Henefho vho vha vha tshi vhea zwifhiwa zwikhethwa-khethwa, tshifhiwa tsha thoro, tshifhiwa tsha u pfumelela tshivhi na tshifhiwa tsha u pfumelela mulandu, ngauri henefho fhethu ndi hukhethwa.+
14 Musi vhotshifhe vha tshi dzhena a vho ngo fanela u bva fhethu hukhethwa vha ya muṱani wa nga nnḓa vha songo thoma vha bvula zwiambaro zwine vha shuma ngazwo,+ ngauri ndi zwikhethwa. Vha fanela u ambara zwiṅwe uri vha kone u ya fhethu he ha tendelwa vhathu vhanzhi.”
15 Musi o no fhedza u kala nga ngomu ha thembele,* a mbvisa nga nḓila ya khoro yo lavhelesaho vhubvaḓuvha,+ a kala fhethu hoṱhe.
16 A kala thungo ya vhubvaḓuvha nga luṱanga lwa u kala.* A wana hu vhulapfu ha ṱhanga dza 500 u bva kha iṅwe thungo u ya kha iṅwe.
17 A kala thungo ya devhula, a wana hu vhulapfu ha ṱhanga dza 500.
18 A kala thungo ya tshipembe, a wana hu vhulapfu ha ṱhanga dza 500.
19 A kala thungo ya vhukovhela, a wana hu vhulapfu ha ṱhanga dza 500.
20 A i kala thungo nṋa. Mbondo dzayo dzoṱhe+ dzo vha dzi vhulapfu ha ṱhanga dza 500 na vhuphara ha ṱhanga dza 500,+ u itela u khethekanya fhethu hukhethwa na hu si hukhethwa.+
Ṱhaluso dzi re magumoni a siaṱari
^ Zwi ambela kha khubithi ndapfu. Sedzani Ṱhume. B14.
^ U ya nga Septuagint ya Tshigerika, ndi “vhulapfu ha khubithi dza 100.” Maṅwalo a Tshihevheru a ri: “Nḓila ya khubithi nthihi.” Sedzani Ṱhume. B14.
^ Thevhedz., “nnḓu ya nga ngomu.”
^ Sedzani Ṱhume. B14.
