Hesekiele 43:1-27
43 A nnyisa khoroni yo lavhelesaho vhubvaḓuvha.+
2 Ndi henefho nda vhona vhugala ha Mudzimu wa Isiraele vhu tshi ḓa vhu tshi bva vhubvaḓuvha,+ ipfi ḽawe ḽo vha ḽi tshi nga phosho ya maḓi;+ ḽifhasi ḽo vha ḽo vhonetshelwa nga vhugala hawe.+
3 Zwe nda zwi vhona zwo vha zwi tshi nga bono ḽe nda ḽi vhona musi ndi* tshi ḓa u fhelisa muḓi, zwo vha zwi tshi nga zwe nda zwi vhona tsini na mulambo wa Kebara;+ nda gwadama ndo kwatamisa tshifhaṱuwo tshanga.
4 Vhugala ha Yehova ha dzhena thembeleni* nga khoro yo lavhelesaho vhubvaḓuvha.+
5 Muya wa nkhwala wa nnyisa muṱani wa nga ngomu, nda vhona thembele yo ḓala nga vhugala ha Yehova.+
6 Nda pfa muthu a tshi amba na nṋe e thembeleni, onoyo munna a bvela nnḓa a ima tsini na nṋe.+
7 A amba na nṋe a ri:
“Murwa muthu, hafha ndi hune khuluṋoni yanga+ ya dzula hone na hune nda vhea hone milenzhe yanga,+ ndi hune nda ḓo dzula hone na vhathu vha Isiraele lwa tshoṱhe.+ Vha nnḓu ya Isiraele na mahosi avho a vha tsha ḓo tshikafhadza dzina ḽanga ḽikhethwa,+ nga u sa fhulufhedzea havho* na nga zwitumbu zwa mahosi avho o faho.
8 Nga u vhea muṋango wavho tsini na muṋango wanga na fureme yavho tsini na fureme yanga, nṋe navho ra tou fhandekanywa nga luvhondo,+ vho tshikafhadza dzina ḽanga ḽikhethwa nga zwithu zwi nengisaho zwe vha zwi ita, ndi ngazwo ndo vha fhelisa ndo sinyuwa.+
9 Zwino vha vhudze vha litshe u sa fhulufhedzea havho,* vha bvisele zwitumbu zwa mahosi avho kule na nṋe, ndi hone ndi tshi ḓo dzula vhukati havho lwa tshoṱhe.+
10 “Iwe murwa muthu, ṱalutshedza vha nnḓu ya Isiraele+ nga ha thembele, uri vha dzhenwe nga ṱhoni nga nṱhani ha vhukhakhi havho,+ vha sedze pulane yayo.
11 Arali vho shoniswa nga zwoṱhe zwe vha zwi ita, u fanela u vha vhudza pulane ya thembele, nzudzanyo yayo, miṋango yayo ya u bva na ya u dzhena.+ Vha sumbedze pulane yayo yoṱhe na maitele ayo, pulane yayo na milayo yayo, u zwi ṅwale vha tshi zwi vhona, uri vha tevhedze pulane yayo yoṱhe na maitele ayo.+
12 Hoyu ndi mulayo wa thembele. Fhethu hoṱhe u mona na ṱhodzi ya thavha ndi hukhethwa-khethwa.+ Hoyu ndi mulayo wa thembele.
13 “Heyi ndi mielo ya aḽeṱare nga dzikhubithi+ (kha khubithi iṅwe na iṅwe ho engedzwa vhuphara ha minwe miṋa).* Mutheo wayo ndi khubithi na vhuphara hayo ndi khubithi. Lumeme lwayo u mona nayo yoṱhe ho vha hu vhuphara ha tshanḓa.* Hoyu ndi mutheo wa aḽeṱare.
14 U bva kha mutheo u swika kha luguvha lwa fhasi ndi khubithi mbili, na vhuphara ha khubithi nthihi. U bva kha luguvha luṱuku u swika kha luguvha luhulu ndi khubithi nṋa, vhuphara halwo ndi khubithi.
15 Hune ha vhaswa hone mulilo kha aḽeṱare ndi vhulapfu ha khubithi nṋa, nṱha hayo hu na maṋanga maṋa.+
16 Hune ha vhaswa hone mulilo kha aḽeṱare ho vha hu tshi lingana matungo oṱhe, ho vha hu vhulapfu ha khubithi dza 12 na vhuphara ha khubithi dza 12.+
17 Luguvha lwo monaho nayo thungo nṋa ndi vhulapfu ha khubithi dza 14 na vhuphara ha khubithi dza 14; lumeme lwo monaho nayo ndi hafu ya khubithi, mutheo wayo ndi khubithi thungo dzoṱhe.
“Zwiṱepisi zwayo zwo lavhelesa vhubvaḓuvha.”
18 A amba na nṋe a ri, “Murwa muthu, Yehova Murena Muvhusahoṱhe u ri: ‘Haya ndi maitele ane a fanela u tevhelwa musi hu tshi fhaṱiwa aḽeṱare, uri hu ṋekedzwe zwifhiwa zwa u fhiswa na uri malofha a shashiwe khayo.’+
19 “‘U tea u ṋekedza mbohwana sa tshifhiwa tsha u pfumelela tshivhi+ kha vhotshifhe vha Vhalevi vhane vha vha vhana vha Tsadoko,+ vhane vha sendela tsini hanga uri vha ntshumele,’ u ralo Yehova Murena Muvhusahoṱhe.
20 ‘U fanela u dzhia maṅwe a malofha ayo u a ḓodze kha maṋanga maṋa a re kha aḽeṱare, na kha thungo nṋa dza luguvha lwo monaho nayo na kha lumeme u mona nayo, u itela u i kunakisa kha tshivhi na u i itela tshipfumelelo.+
21 U dzhie mbohwana, ine ya vha tshifhiwa tsha u pfumelela tshivhi, uri i fhiswe fhethu ho khethiwaho thembeleni, nnḓa ha nnḓu khethwa.+
22 Nga ḓuvha ḽi tevhelaho u ḓo ṋekedza tshibokoṱo tshi sa lwaliho sa tshifhiwa tsha u pfumelela tshivhi; vha ḓo kunakisa aḽeṱare kha tshivhi samusi vho i kunakisa kha tshivhi vha tshi shumisa mbohwana.’
23 “‘Musi u tshi fhedza u i kunakisa kha tshivhi, u ṋekedze mbohwana i sa lwaliho na thutha i sa lwaliho.
24 U zwi ṋekedze Yehova, vhotshifhe vha tea u zwi shela muṋo+ na u zwi ṋekedza Yehova sa tshifhiwa tsha u fhiswa.
25 Lwa maḓuvha a sumbe u ḓo ṋekedza tshibokoṱo sa tshifhiwa tsha u pfumelela tshivhi+ ḓuvha ḽiṅwe na ḽiṅwe, khathihi na mbohwana na thutha; u ṋekedze zwifuwo zwo kunaho.*
26 Lwa maḓuvha a sumbe vha fanela u itela aḽeṱare tshipfumelelo, vha tea u i kunakisa uri vha kone u i shumisa.
27 Musi eneo maḓuvha o no fhela, nga ḓuvha ḽa vhumalo+ na u ya phanḓa, vhotshifhe vha ḓo ṋekedza zwifhiwa zwaṋu* zwa u fhiswa na zwiṱhavhelo zwa u pfumedzana kha aḽeṱare; ndi hone ndi tshi ḓo ni takalela,’+ u ralo Yehova Murena Muvhusahoṱhe.”
Ṱhaluso dzi re magumoni a siaṱari
^ Kana khamusi, “a.”
^ Thevhedz., “nḓuni.”
^ Kana “nga u ita vhupombwe ha lwa muya.”
^ Kana “vha litshe u ita vhupombwe ha lwa muya.”
^ Zwenezwi zwi ambela kha khubithi ndapfu. Sedzani Ṱhume. B14.
^ Ndi tshikhala tsha u bva kha gunwe u ya kha munwe muṱuku, tshi ṱoḓaho u vha senthimithara dza 22,2. Sedzani Ṱhume. B14.
^ Kana “zwo fhelelaho.”
^ Ndi zwa vhathu.