Hesekiele 44:1-31
44 A mmbuyisa nga nḓila ya khoro ya nga nnḓa ya nnḓu khethwa yo lavhelesaho vhubvaḓuvha,+ ye ya vha yo valwa.+
2 Ndi hone Yehova a tshi amba na nṋe a ri: “Heyi khoro i ḓo dzula yo valwa. A i nga ḓo vulwa, a hu na muthu ane a ḓo dzhena ngayo; ngauri Yehova Mudzimu wa Isiraele o dzhena ngayo,+ ndi ngazwo i tshi fanela u dzula yo valwa.
3 Naho zwo ralo, murangaphanḓa u ḓo dzula kha yeneyo khoro uri a ḽe zwiḽiwa* phanḓa ha Yehova,+ ngauri ndi murangaphanḓa. U ḓo dzhena nga vurannḓa yayo, a bva ngayo.”+
4 A ndzhenisa nga khoro ya devhula phanḓa ha thembele. Musi ndi tshi lavhelesa, nda vhona vhugala ha Yehova ho ḓadza thembele ya Yehova.+ Ngauralo, nda gwadama ndo kwatamisa tshifhaṱuwo tshanga.+
5 Yehova a amba na nṋe a ri: “Murwa muthu, ṱhogomela, u lavhelese, u thetshelese nga vhuronwane zwoṱhe zwine nda u vhudza nga ha maitele na milayo ya thembele ya Yehova. Lavhelesa nga vhuronwane muṋango wa u dzhena thembeleni na miṋango yoṱhe ya u bva nḓuni khethwa.+
6 U ambe na nnḓu ya mashandukwa a Isiraele u ri, ‘Yehova Murena Muvhusahoṱhe u ri: “Ndo neta nga mishumo yaṋu i nengisaho, inwi vha nnḓu ya Isiraele.
7 Musi ni tshi ḓisa vhatsinda vha re na mbilu dzi si dzavhuḓi vha songo fumbaho nḓuni yanga khethwa, vho tshikafhadza thembele yanga. No ḓisa vhurotho, mapfura na malofha, ngeno mulanga wanga u tshi khou vunḓiwa nga nṱhani ha mishumo yaṋu yoṱhe i nengisaho.
8 A no ngo ṱhogomela zwithu zwanga zwikhethwa.+ Nṱhani hazwo, no vhea vhaṅwe uri vha shume mishumo ya nḓuni yanga khethwa.”’
9 “‘Zwe Yehova Murena Muvhusahoṱhe a zwi amba ndi hezwi: “A hu na mutsinda a re na mbilu i si yavhuḓi a songo fumbaho a dzulaho Isiraele ane a ḓo dzhena nḓuni yanga khethwa.”’
10 “‘Fhedzi Vhalevi vhe vha nndaṱa+ musi Vhaisiraele vha tshi nṱutshela u itela u tevhela midzimu yavho ya zwifanyiso i nengisaho* vha ḓo sedzana na masiandoitwa a vhukhakhi havho.
11 Vha ḓo vha vhashumi nḓuni yanga khethwa vhane vha lavhelesa khoro dza thembele na u shuma thembeleni.+ Vha ḓo ṱhavha zwifhiwa zwa u fhiswa na u ṱhavhela vhathu vhanga zwiṱhavhelo, vha ḓo ima phanḓa ha vhathu vhanga u itela u vha shumela.
12 Ngauri vho vha shumela phanḓa ha midzimu yavho ya zwifanyiso i nengisaho, vha vha tshikhukhulisi tshi itaho uri vha nnḓu ya Isiraele vha ite tshivhi,+ ndi ngazwo ndo vha imisela tshanḓa nda vha itela muano,’ u ralo Yehova Murena Muvhusahoṱhe, ‘vha ḓo sedzana na masiandoitwa a vhukhakhi havho.
13 A vha nga ḓo sendela tsini na nṋe uri vha shume sa vhotshifhe vhanga kana u sendela tsini na fhethu hanga hukhethwa kana tsini na zwithu zwanga zwikhethwa-khethwa, vha ḓo farwa nga ṱhoni nga nṱhani ha zwithu zwi nengisaho zwe vha zwi ita.
14 Fhedzi ndi ḓo ita uri vha vhe na vhuḓifhinduleli ha u ṱhogomela thembele, vha ite mishumo ya thembeleni na zwoṱhe zwine zwa fanela u itwa khayo.’+
15 “‘Vhotshifhe vha Vhalevi vhane vha vha vharwa vha Tsadoko,+ vhe vha ṱhogomela nnḓu yanga khethwa musi Vhaisiraele vha tshi nṱutshela,+ vha ḓo sendela tsini na nṋe uri vha ntshumele na u ima phanḓa hanga uri vha nḓisele mapfura+ na malofha,’+ u ralo Yehova Murena Muvhusahoṱhe.
16 ‘Ndi vhone vhane vha ḓo dzhena nḓuni yanga khethwa, vha ḓo sendela tsini na ṱafula ḽanga uri vha ntshumele,+ vha ḓo ita mishumo yavho vha tshi itela nṋe.+
17 “‘Musi vha tshi dzhena nga khoro dza muṱa wa nga ngomu, vha fanela u ambara zwiambaro zwa ḽinene.+ A vho ngo fanela u ambara tshiambaro tsho itwaho nga wuḽu musi vha tshi shuma khoroni dza muṱa wa nga ngomu kana thembeleni.
18 Vha fanela u vhofha dugu dza ḽinene kha ṱhoho dzavho, na u ambara marukhu mapfufhi a ḽinene ane a thivha zwirumbi zwavho.+ A vho ngo fanela u ambara tshithu tshine tsha ḓo ita uri vha bve biko.
19 Musi vha sa athu u ya muṱani wa nga nnḓa hune ha vha na vhathu, vha fanela u bvula zwiambaro zwine vha shuma ngazwo,+ vha zwi vhee kamarani khethwa dza u ḽela.+ Vha kone u ambara zwiṅwe zwiambaro uri vha si pfukisele vhukhethwa kha vhathu nga zwiambaro zwavho.
20 A vho ngo fanela u vheula ṱhoho dzavho+ kana u litsha mavhudzi avho a tshi vha malapfu. Vha fanela u a geredzela zwavhuḓi.
21 Vhotshifhe a vho ngo fanela u nwa waini musi vha tshi dzhena muṱani wa nga ngomu.+
22 A vho ngo fanela u vhinga tshilikadzi kana mufumakadzi o ṱalwaho;+ fhedzi vha nga vhinga musidzana* kha vhana vha Isiraele kana tshilikadzi ye ya vha yo vhingwa nga tshifhe.’+
23 “‘Vha fanela u funza vhathu vhanga u fhambanyisa zwine zwa vha zwikhethwa na zwine zwa sa vhe zwikhethwa; vha vha funze u fhambanyisa zwo kunaho na zwi songo kunaho.+
24 Vha fanela u vha vhahaṱuli musi hu na milandu;+ vha fanela u haṱula u tendelana na milayo yanga.+ Vha fanela u tevhedza milayo yanga na maitele anga kha vhuṱambo hanga+ hoṱhe na u ita uri savhatha dzanga dzi vhe khethwa.
25 A vho ngo fanela u sendela tsini na tshitumbu tsha muthu, ngauri vha ḓo vha na tshika. Naho zwo ralo, vha nga ḓitshikafhadza nga tshitumbu tsha khotsi avho, mme avho, murwa wavho, ṅwananyana wavho, shaka ḽavho kana khaladzi avho a songo vhingwaho.+
26 Musi tshifhe o no fhedza u ḓikunakisa vha fanela u mu litsha a fhedza maḓuvha a sumbe.
27 Nga ḓuvha ḽine a dzhena fhethu hukhethwa, muṱani wa nga ngomu, u itela u shuma fhethu hukhethwa, u fanela u ṋekedza tshifhiwa tshawe tsha u pfumelela tshivhi,’+ u ralo Yehova Murena Muvhusahoṱhe.
28 “‘Vha ḓo wana ifa ḽavho. Nṋe ndi ifa ḽavho.+ A no ngo fanela u vha ṋea thundu kha ḽa Isiraele, ngauri nṋe ndi thundu yavho.
29 Vha ḓo ḽa tshifhiwa tsha thoro,+ tshifhiwa tsha u pfumelela tshivhi, tshifhiwa tsha u pfumelela mulandu,+ na tshiṅwe na tshiṅwe tsho kumedzwaho kha ḽa Isiraele tshi ḓo vha tshavho.+
30 Mitshelo yoṱhe ya u thoma u vhibva na miṋeelo i bvaho ha inwi i ḓo vha ya vhotshifhe.+ Ni fanela u ṋea tshifhe khaṋo yaṋu ya u thoma.+ Zwenezwi zwi ḓo ita uri miṱa yaṋu i fhaṱutshedzwe.+
31 Vhotshifhe a vho ngo fanela u ḽa tshiṋoni kana tshifuwo tshine tsha wanala tsho fa kana tsho vhulawaho nga zwipuka.’+
Ṱhaluso dzi re magumoni a siaṱari
^ Thevhedz., “vhurotho.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Sedzani Mutevhe Wa Ṱhalutshedzo Ya Maipfi.
