Hesekiele 46:1-24
46 “Yehova Murena Muvhusahoṱhe u ri: ‘Khoro ya muṱani wa nga ngomu yo lavhelesaho vhubvaḓuvha+ i fanela u valwa+ lwa maḓuvha a rathi ane ha vha hu tshi khou shumiwa ngao,+ fhedzi nga ḓuvha ḽa Savhatha na nga ḓuvha ḽa ṅwedzi muswa i fanela u vulwa.
2 Murangaphanḓa u ḓo dzhena nga nḓila ya nga nnḓa nga vurannḓa ya khoro,+ u ḓo ima tsini na fureme ya khoro. Vhotshifhe vha ḓo ṋekedza tshifhiwa tshawe tsha u fhiswa na zwiṱhavhelo zwawe zwa u pfumedzana, u ḓo gwadama muṋangoni wa khoro, a kona u bvela nnḓa. Fhedzi khoro a yo ngo fanela u valwa u swika ḽi tshi kovhela.
3 Vhathu vha shango vha ḓo gwadama phanḓa ha Yehova muṋangoni wa khoro nga Dzisavhatha na nga ṅwedzi muswa.+
4 “‘Tshifhiwa tsha u fhiswa tshine murangaphanḓa a fanela u tshi ḓisa phanḓa ha Yehova nga ḓuvha ḽa Savhatha tshi fanela u vha tshi ngwana dzi sa lwaliho dza rathi dza nduna na thutha i sa lwaliho.+
5 Kha tshifhiwa tsha thoro a bvise efa* nthihi a tshi itela thutha na zwine a nga kona a tshi itela ngwana dza nduna, na efa+ iṅwe na iṅwe a i bvisele tshikalo tsha hini* tsha mapfura.
6 Nga ḓuvha ḽa ṅwedzi muswa, tshifhiwa tshi ḓo vha mbohwana i sa lwaliho, ngwana dza rathi dza nduna na thutha; dzi fanela u vha dzi sa lwali.+
7 Kha tshifhiwa tsha thoro a bvise efa nthihi a tshi itela mbohwana, a bvise efa nthihi a tshi itela thutha, ngwana dza nduna a nga dzi bvisela tshiṅwe na tshiṅwe tshine a kona. Na efa iṅwe na iṅwe a i bvisele tshikalo tsha hini tsha mapfura.
8 “‘Musi murangaphanḓa a tshi dzhena, u fanela u dzhena nga vurannḓani ya khoro, u fanela u bva nga henefho.+
9 Musi vhathu vha shango vha tshi ḓa phanḓa ha Yehova nga tshifhinga tsha vhuṱambo,+ vhane vha dzhena nga khoro ya devhula+ vha tshi ḓa u rabela vha fanela u bva nga khoro ya tshipembe,+ na vhane vha dzhena nga khoro ya tshipembe vha fanela u bva nga khoro ya devhula. A hu na ane a fanela u bva nga khoro ye a dzhena ngayo, ngauri vha fanela u bva nga khoro ye vha livhana nayo.
10 Murangaphanḓa a re vhukati havho, u fanela u dzhena musi vha tshi dzhena, na u bva musi vha tshi bva.
11 Nga tshifhinga tsha vhuṱambo, kha tshifhiwa tsha thoro hu fanela u bviswa efa nthihi hu tshi itelwa mbohwana, hu bviswe efa nthihi hu tshi itelwa thutha, ngwana dza nduna a nga dzi bvisela tshine a kona, na efa+ iṅwe na iṅwe a i bvisele tshikalo tsha hini tsha mapfura.
12 “‘Arali murangaphanḓa a bvisa tshifhiwa tsha u fhiswa+ kana zwiṱhavhelo zwa u pfumedzana sa tshifhiwa tsha u ḓifunela kha Yehova, u ḓo vulelwa khoro yo lavhelesaho vhubvaḓuvha, u ḓo bvisa tshifhiwa tsha u fhiswa na zwiṱhavhelo zwa u pfumedzana sa zwine a zwi ita nga ḓuvha ḽa Savhatha.+ Musi a tshi tou bva, khoro i fanela u valwa.+
13 “‘Ḓuvha ḽiṅwe na ḽiṅwe ni fanela u bvisela Yehova ngwana ya nduna i sa lwaliho i re na ṅwaha muthihi sa tshifhiwa tsha u fhiswa.+ Ni zwi ite matsheloni maṅwe na maṅwe.
14 Musi ni tshi bvisa yeneyo ngwana matsheloni maṅwe na maṅwe, ni bvise na efa nthihi kha dza rathi sa tshifhiwa tsha thoro, na tshikalo tsha hini tshithihi kha zwiraru tsha mapfura a u shasha fuḽauru tsekene sa tshifhiwa tsha tshifhinga tshoṱhe tsha thoro tsha Yehova. Zwenezwi ndi maitele a lini na lini.
15 Vha tea u ḓisa ngwana ya nduna, tshifhiwa tsha thoro na mapfura matsheloni maṅwe na maṅwe sa tshifhiwa tsha tshifhinga tshoṱhe tsha u fhiswa.’
16 “Yehova Murena Muvhusahoṱhe u ri: ‘Arali murangaphanḓa a ṋea vharwa wawe tshifhiwa sa ifa, tshi ḓo vha thundu ya vharwa vhawe. Ndi thundu yavho ye vha i wana sa ifa.
17 Arali a ṋea muṅwe wa vhashumeli vhawe tshifhiwa tshi tshi bva kha ifa, tshi ḓo vha tshawe u swika nga ṅwaha wa mbofholowo;+ ndi hone tshi tshi ḓo vhuyelela kha murangaphanḓa. Ndi vharwa vhawe fhedzi vhane vha ḓo dzula na ifa ḽa vha ḽavho lwa tshoṱhe.
18 Murangaphanḓa ho ngo fanela u dzhiela vhathu ifa naho ḽi ḽifhio ḽine ḽa vha thundu yavho. U fanela u ṋea vharwa vhawe ifa ḽine ḽa bva kha thundu yawe, uri hu si vhe na ane a dzhielwa thundu yawe kha vhathu vhanga.’”
19 A ndzhenisa nga muṋango+ u re tsini na khoro ya u ya kamarani khethwa dza u ḽela dza vhotshifhe, dzo lavhelesaho devhula,+ henefho nda vhona nga murahu ha fhethu hu re thungo ya vhukovhela.
20 A amba na nṋe a ri: “Henefha ndi hune vhotshifhe vha ḓo vhilisela hone tshifhiwa tsha u pfumelela mulandu na tshifhiwa tsha u pfumelela tshivhi na hune vha ḓo bakela hone tshifhiwa tsha thoro,+ uri vha si ise tshithu muṱani wa nga nnḓa, vha pfukisela vhukhethwa kha vhathu.”+
21 A nnyisa muṱani wa nga nnḓa nda fhira thungo nṋa dza muṱa, nda vhona thungo iṅwe na iṅwe ya muṱa wa nga nnḓa.
22 Kha thungo nṋa dza muṱa ho vha hu na miṱa miṱuku, yo vha i na vhulapfu ha khubithi* dza 40 na vhuphara ha khubithi dza 30. Vhuṋa hayo yo vha i tshi lingana.
23 Yo vha i na luguvha u mona nayo, nga fhasi ha luguvha ho vha hu na fhethu hune vha vhilisela hone zwifhiwa.
24 A amba na nṋe a ri: “Hedzi ndi nnḓu dzine vhashumi vha thembeleni vha vhilisela khadzo zwiṱhavhelo zwo ḓiswaho nga vhathu.”+
Ṱhaluso dzi re magumoni a siaṱari
^ Sedzani Ṱhume. B14.
^ Sedzani Ṱhume. B14.
^ Zwi ambela kha khubithi ndapfu. Sedzani Ṱhume. B14.
