Hesekiele 47:1-23
47 A nkhumisela murahu muṋangoni wa thembele,+ henefho nda vhona maḓi a tshi khou elela a tshi ya thungo ya vhubvaḓuvha a tshi bva fhasi ha muṋango wa thembele,+ ngauri thembele yo vha yo lavhelesa vhubvaḓuvha. Maḓi o vha a tshi khou elela a tshi tsela fhasi a tshi bva nga thungo ya tsha u ḽa ya thembele, thungo ya tshipembe ya aḽeṱare.
2 A mbvisela nnḓa nga khoro i re devhula,+ a nnyisa nnḓa tsini na khoro ya nga nnḓa yo lavhelesaho vhubvaḓuvha,+ nda vhona maḓi a tshi khou elela zwavhuḓi a tshi bva thungo ya tsha u ḽa.
3 Onoyo munna a ya thungo ya vhubvaḓuvha o fara luṱale lwa u kala,+ a kala a wana hu khubithi* dza 1 000, a ita uri ndi pfuke kha eneo maḓi; o vha a tshi guma nṱha ha zwirethe.*
4 A dovha a kala dziṅwe khubithi dza 1 000, a ita uri ndi pfukekanye maḓi, o vha a tshi guma kha magona.
A kala dziṅwe khubithi dza 1 000, a ita uri ndi pfukekanye maḓi, o vha a tshi guma kha khundu.
5 Musi a tshi kala dziṅwe khubithi dza 1 000, ho vha ho no vha mulambo we nda kundwa u u pfuka, wonoyo mulambo wo vha wo tsa lwe muthu a vha a tshi fanela u bambela, zwi sa konadzei u u pfuka nga milenzhe.
6 A mmbudzisa a ri: “Murwa muthu, naa wo no zwi vhona zwenezwi?”
A ita uri ndi tshimbile ndi humele kha philiphili ya mulambo.
7 Musi ndi tshi humela kha philiphili ya mulambo, nda vhona hu na miri minzhi-minzhi thungo dzoṱhe.+
8 A amba na nṋe a ri: “Haya maḓi a elela a tshi ya thungo ya vhubvaḓuvha a swika na ngei Araba*+ a dzhena na lwanzheni. Musi a tshi dzhena lwanzheni,+ maḓi a henefho a vha avhuḓi.
9 Zwithu zwinzhi zwi tshilaho zwi ḓo kona u tshila huṅwe na huṅwe hune eneo maḓi a elela hone. Hu ḓo vha na khovhe nnzhi, ngauri eneo maḓi a ḓo elela henefho. Maḓi a lwanzhe a ḓo vha avhuḓi, tshiṅwe na tshiṅwe tshi ḓo tshila huṅwe na huṅwe hune eneo maḓi a ḓo ya hone.
10 “Vharei vha khovhe vha ḓo ima tsini na lwanzhe lwa ngei Engedi+ u swika ngei Enegilaimi, hune ha ḓo vha na fhethu ha u anea hone mambule. Hu ḓo vha na khovhe dza mifuda minzhi dzine dza fana na dza ngei Lwanzheni Luhulu.*+
11 “Hu ḓo vha na matzhava na matope, maḓi a hone ha nga vhi avhuḓi. A ḓo dzula e na muṋo.+
12 “Miri ya mifuda yoṱhe ya mitshelo ine ya ḽiwa i ḓo mela philiphilini dzoṱhe dza mulambo. Maṱari ayo ha nga puti; i ḓo dzulela u aṋwa. Ṅwedzi muṅwe na muṅwe i ḓo aṋwa mitshelo miswa, ngauri maḓi ayo a elela a tshi bva nḓuni khethwa.+ Mitshelo yayo i ḓo vha zwiḽiwa, maṱari ayo a ḓo vha a u fhodza.”+
13 Yehova Murena Muvhusahoṱhe u ri: “Heḽi ndi shango ḽine na ḓo ḽi kovhela tshaka dza 12 dza Isiraele, Yosefa u ḓo wana mikovhe mivhili.+
14 Ḽi ḓo vha ifa ḽaṋu, ni ḓo wana mikovhe i linganaho. Ndo anela vhomakhulukuku waṋu+ uri ndi ḓo vha ṋea ḽone, zwino ndi ḽi ṋea inwi sa ifa.
15 “Hoyu ndi mukano wa shango ḽi re thungo ya devhula: Wonoyu mukano u bva Lwanzheni Luhulu u ya Hethiloni+ thungo ya Tsedada,+
16 Hamathi,+ Berotha+ na Sibiraimi, hune ha vha vhukati ha shango ḽa Damaseko na ḽa Hamathi, u ya Hasera-hathikhoni, hune ha vha tsini na mukano wa Haurani.+
17 Mukano u ḓo bva lwanzheni lwa Hasara-enani,+ tsini na mukano wa Damaseko thungo ya devhula, na mukanoni wa Hamathi.+ Wonoyu ndi mukano wa devhula.
18 “Wa vhubvaḓuvha u ḓo vha vhukati ha Haurani na Damaseko na tsini na Yorodane vhukati ha Giḽiada+ na shango ḽa Isiraele. Ni kale u bva mukanoni u ya vhubvaḓuvha ha lwanzhe.* Wonoyu ndi mukano wa vhubvaḓuvha.
19 “Mukano wa tshipembe u ḓo bva ngei Thamara wa swika maḓini a Meribati-kadese,+ wa swika na ngei Muedzini* na Lwanzheni Luhulu.+ Wonoyu ndi mukano wa tshipembe.
20 “Thungo ya vhukovhela mukano ndi Lwanzhe Luhulu u swika ho livhanaho na Lebo-hamathi.*+ Wonoyu ndi mukano wa vhukovhela.”
21 “Ni kovhelane ḽeneḽi shango u ya nga tshaka dza 12 dza Isiraele.
22 Ni fanela u kovhekana ḽone sa ifa vhukati haṋu na u kovhela vhatsinda vhane vha dzula na inwi vhe vha vha na vhana vha tshi khou dzula vhukati haṋu; kha inwi zwi ḓo tou nga ndi vhadzulapo vha Isiraele. Vha ḓo wana ifa vhukati ha tshaka dza Isiraele khathihi na inwi.
23 Ni ṋee mutsinda ifa kha shango ḽa lushaka ḽine a dzula khaḽo,” u ralo Yehova Murena Muvhusahoṱhe.
Ṱhaluso dzi re magumoni a siaṱari
^ Zwi ambela kha khubithi ndapfu. Sedzani Ṱhume. B14.
^ Kana “kha ḽiṱo ḽa mulenzhe.”
^ Kana “sogani.”
^ Ndi lwa Meditherenieni.
^ Ndi Lwanzhe lwo Faho.
^ Ndi Muedzi wa Egipita.
^ Kana “khoro ya Hamathi.”
