Hesekiele 48:1-35
48 “Haya ndi madzina a dzitshaka u bva mukanoni wa devhula: Tshipiḓa tsha Dani+ tshi thoma Hethiloni u swika Lebo-hamathi*+ u ya Hasara-enani, tsini na mukano wa Damaseko thungo ya devhula, tsini na Hamathi;+ wa bva vhubvaḓuvha wa ya kha wa vhukovhela.
2 Tshipiḓa tsha Ashere+ tshi mukanoni wa Dani, u bva mukanoni wa vhubvaḓuvha u ya kha wa vhukovhela.
3 Tshipiḓa tsha Nafutali+ tshi mukanoni wa Ashere, u bva mukanoni wa vhubvaḓuvha u ya kha wa vhukovhela.
4 Tshipiḓa tsha Manase+ tshi mukanoni wa Nafutali, u bva mukanoni wa vhubvaḓuvha u ya kha wa vhukovhela.
5 Tshipiḓa tsha Efuraimi tshi mukanoni wa Manase,+ u bva mukanoni wa vhubvaḓuvha u ya kha wa vhukovhela.
6 Tshipiḓa tsha Rubeni tshi mukanoni wa Efuraimi,+ u bva mukanoni wa vhubvaḓuvha u ya kha wa vhukovhela.
7 Tshipiḓa tsha Yuda tshi mukanoni wa Rubeni,+ u bva mukanoni wa vhubvaḓuvha u ya kha wa vhukovhela.
8 Magumoni a shango ḽa Yuda, u bva mukanoni wa vhubvaḓuvha u ya kha wa vhukovhela, tshipiḓa tshine na tea u tshi vhetshela thungo tshi tea u vha vhuphara ha khubithi* dza 25 000,+ tshi lingane na vhulapfu ha zwipiḓa zwa dziṅwe tshaka u bva mukanoni wa vhubvaḓuvha u ya kha wa vhukovhela. Nnḓu khethwa i ḓo vha vhukati ha tshenetsho tshipiḓa.
9 “Tshipiḓa tshine na fanela u tshi vhetshela Yehova tshi fanela u vha vhulapfu ha khubithi dza 25 000 na vhuphara ha khubithi dza 10 000.
10 Hu ḓo vha fhethu hukhethwa ha vhotshifhe.+ Thungo ya devhula tshi ḓo vha tshi khubithi dza 25 000, thungo ya vhukovhela tshi ḓo vha tshi khubithi dza 10 000, thungo ya vhubvaḓuvha tshi ḓo vha tshi khubithi dza 10 000, thungo ya tshipembe tshi ḓo vha tshi khubithi dza 25 000. Nnḓu khethwa ya Yehova i ḓo vha i vhukati hatsho.
11 Tshi ḓo vha tsha vhotshifhe vhakhethwa vha bvaho kha vharwa vha Tsadoko,+ vhe vha shuma mishumo yavho vha tshi itela nṋe, vha si ntshandukele musi Vhaisiraele na Vhalevi vha tshi ntshandukela.+
12 Vha ḓo wana tshipiḓa kha shango ḽikhethwa-khethwa ḽo vhetshelwaho thungo, mukanoni wa Vhalevi.
13 “Tsini na shango ḽa vhotshifhe, Vhalevi vha ḓo wana tshipiḓa tsha vhulapfu ha khubithi dza 25 000 na vhuphara ha khubithi dza 10 000. (Tshenetsho tshipiḓa tshoṱhe tshi ḓo vha tshi vhulapfu ha khubithi dza 25 000 na vhuphara ha khubithi dza 10 000.)
14 A vho ngo fanela u rengisa, u ṋeana kana u pfukisela tshenetsho tshipiḓa tshavhuḓi tsha shango, ngauri ndi tshi khethwa kha Yehova.
15 “Fhethu ho salaho hune ha vha vhuphara ha khubithi dza 5 000 tsini na mukano une wa vha khubithi dza 25 000, nga hu vhe ha muḓi,+ hu ḓo vha ha u fhaṱa dzinnḓu na ha pfulo. Muḓi u ḓo vha u henefho vhukati.+
16 Mielo ya muḓi ndi heyi: Mukano wa devhula ndi khubithi dza 4 500, wa tshipembe ndi khubithi dza 4 500, wa vhubvaḓuvha ndi khubithi dza 4 500 na wa vhukovhela ndi khubithi dza 4 500.
17 Pfulo ya wonoyo muḓi i ḓo vha khubithi dza 250 thungo ya devhula, thungo ya tshipembe i ḓo vha khubithi dza 250, thungo ya vhubvaḓuvha i ḓo vha khubithi dza 250 na thungo ya vhukovhela i ḓo vha khubithi dza 250.
18 “Vhulapfu ha tshipiḓa tsho salaho hu ḓo lingana na ha fhethu hukhethwa,+ thungo ya vhubvaḓuvha hu ḓo vha khubithi dza 10 000 na ya vhukovhela hu ḓo vha khubithi dza 10 000. Hu ḓo lingana na ha fhethu hukhethwa, zwibveledzwa zwa henefho zwi ḓo vha zwiḽiwa zwa vhane vha shuma kha wonoyo muḓi.
19 Vhane vha shuma kha wonoyo muḓi vha tshi bva kha tshaka dzoṱhe dza Isiraele vha ḓo lima henefho fhethu.+
20 “Tshenetsho tshipiḓa ndi khubithi dza 25 000 thungo dzoṱhe. Ni tshi vhetshele thungo uri hu vhe fhethu hukhethwa khathihi na tshipiḓa tsha muḓi.
21 “Zwipiḓa zwo salaho thungo mbili dza fhethu hukhethwa na kha tshipiḓa tsha muḓi zwi ḓo vha zwa murangaphanḓa.+ Zwi ḓo vha tsini na mukano wa vhubvaḓuvha na wa vhukovhela wa tshenetsho tshipiḓa tshine tsha vha khubithi dza 25 000. Zwi ḓo lingana na zwenezwo zwipiḓa zwi re nga tsini, zwi ḓo vha zwa murangaphanḓa. Fhethu hukhethwa na nnḓu khethwa i re thembeleni zwi ḓo vha henefho vhukati.
22 “Tshipiḓa tsha Vhalevi na tshipiḓa tsha wonoyo muḓi zwi ḓo vha vhukati ha zwine zwa vha zwa murangaphanḓa. Shango ḽa murangaphanḓa ḽi ḓo vha vhukati ha mukano wa Yuda+ na wa Benyamini.
23 “Kha tshaka dzo salaho, tshipiḓa tsha Benyamini tshi thoma kha mukano wa vhubvaḓuvha tsha swika kha wa vhukovhela.+
24 Tshipiḓa tsha Simioni tshi tsini na mukano wa Benyamini,+ u bva mukanoni wa vhubvaḓuvha u ya kha wa vhukovhela.
25 Tshipiḓa tsha Isashari+ tshi tsini na mukano wa Simioni, u bva mukanoni wa vhubvaḓuvha u ya kha wa vhukovhela.
26 Tshipiḓa tsha Sebuloni tshi tsini na mukano wa Isashari,+ u bva mukanoni wa vhubvaḓuvha u ya kha wa vhukovhela.+
27 Tshipiḓa tsha Gada tshi tsini na tsha Sebuloni,+ u bva mukanoni wa vhubvaḓuvha u ya kha wa vhukovhela.
28 Mukano wa tshipembe u re tsini na mukano wa Gada u ḓo bva Thamara+ wa ya maḓini a Meribati-kadese,+ thungo ya Muedzini* na ya Lwanzheni Luhulu.*+
29 “Heḽi ndi shango ḽine na fanela u ḽi kovha sa ifa kha tshaka dza Isiraele,+ hezwi zwi ḓo vha zwipiḓa zwavho,”+ u ralo Yehova Murena Muvhusahoṱhe.
30 “Mielo ya khoro dza muḓi ndi heyi: Thungo ya devhula hu ḓo vha khubithi dza 4 500.+
31 “Khoro dza muḓi dzi ḓo irwa madzina u ya nga tshaka dza Isiraele. Kha khoro tharu dzi re thungo ya devhula, nthihi i ḓo vha ya Rubeni, iṅwe ya vha ya Yuda, iṅwe ya vha ya Levi.
32 “Thungo ya vhubvaḓuvha i ḓo vha vhulapfu ha khubithi dza 4 500, hu ḓo vha hu na khoro tharu: nthihi i ḓo vha ya Yosefa, iṅwe ya vha ya Benyamini, iṅwe ya vha ya Dani.
33 “Thungo ya tshipembe i ḓo vha khubithi dza 4 500, hu ḓo vha hu na khoro tharu: nthihi i ḓo vha ya Simioni, iṅwe ya vha ya Isashari, iṅwe ya vha ya Sebuloni.
34 “Thungo ya vhukovhela i ḓo vha vhulapfu ha khubithi dza 4 500, hu ḓo vha hu na khoro tharu: nthihi i ḓo vha ya Gada, iṅwe ya vha ya Ashere, iṅwe ya vha ya Nafutali.
35 “Luvhondo lwo monaho na muḓi lu ḓo vha khubithi dza 18 000. U bva nga ḽeneḽo ḓuvha wonoyu muḓi u ḓo vha na dzina ḽine ḽa amba uri Yehova U Henefho.”+
Ṱhaluso dzi re magumoni a siaṱari
^ Kana “khoroni ya Hamathi.”
^ Zwi ambela kha khubithi ndapfu. Sedzani Ṱhume. B14.
^ Ndi lwa Meditherenieni.
^ Ndi Muedzi wa Egipita.
