Hesekiele 5:1-17
5 “Iwe murwa muthu, dzhia banga ḽa vhuhali u ye u ḽi shumise sa tshireza tsha muvheuli. U vheule ṱhoho yau na ndebvu dzau, u zwi dzhie u ye u zwi kale na u zwi fhandekanya uri zwi vhe zwipiḓa zwiraru.
2 Musi maḓuvha a u tanga muḓi a tshi fhela, u fhise tshipiḓa tsha u thoma muliloni u vhukati ha wonoyo muḓi.+ U dovhe u dzhie tshiṅwe tshipiḓa tsha vhuvhili u tshi reme nga banga u tshi mona na muḓi woṱhe,+ tsha vhuraru u tshi hashe muyani, ndi ḓo bvisela eneo mavhudzi banga nda a pandamedza.+
3 “U dzhie maṅwe ao u a putele nga tshiambaro tshau.
4 U dovhe u dzhie maṅwe u a pose muliloni, u a fhise. Ndi hone mulilo u tshi ḓo phaḓalala na vha nnḓu yoṱhe ya Isiraele.+
5 “Zwe Yehova Murena Muvhusahoṱhe a zwi amba ndi hezwi: ‘Hoyu muḓi ndi Yerusalema. Ndo u vhea vhukati ha dzitshaka, wo tangiwa nga mashango.
6 Fhedzi wo shandukela milayo yanga na maitele anga, wa ita zwivhi u fhira dziṅwe tshaka na maṅwe mashango o u tangaho.+ Ngauri vho laṱa milayo yanga, vha si tevhedze maitele anga.’
7 “Ndi ngazwo Yehova Murena Muvhusahoṱhe a tshi ri: ‘Ngauri wo ita khakhathi dzi fhiraho dza tshaka dzo u tangaho, wa si tevhedze maitele anga na milayo yanga, wa tevhedza milayo ya tshaka dzo u tangaho,+
8 zwe Yehova Murena Muvhusahoṱhe a zwi amba ndi hezwi: “Iwe muḓi ndi lwa na iwe,+ ndi ḓo u haṱula tshaka dzo lavhelesa.+
9 Ndi ḓo u ita zwine a thi athu u vhuya nda zwi ita, na zwine nda sa tsha ḓo dovha nda zwi ita, nga nṱhani ha mishumo yau yoṱhe i nengisaho.+
10 “‘“Vhokhotsi vha re vhukati hau vha ḓo ḽa vharwa vhavho,+ na vharwa vha ḽa vhokhotsi avho, nda ni haṱula nda pandela noṱhe no salaho nda ni isa thungo dzoṱhe.”’+
11 “‘Nga zwenezwo, ndi ana nga vhutshilo hanga,’ u ralo Yehova Murena Muvhusahoṱhe, ‘ngauri wo tshikafhadza nnḓu yanga khethwa nga midzimu yau yoṱhe ya zwifanyiso zwi nengisaho na mishumo yau yoṱhe i nengisaho,+ na nṋe ndi ḓo u laṱa; a thi nga u khathutsheli na u u pfela vhuṱungu.+
12 Tshiṅwe tshigwada tsha vhathu tshi ḓo vhulawa nga dwadze kana nga nḓala. Tshiṅwe tsha vhulawa nga banga u mona na iwe.+ Ndi ḓo pandela tshigwada tsha u fhedza tsha ya thungo dzoṱhe, nda rumela banga uri ḽi vha pandamedze.+
13 Ndi hone ndi tshi ḓo litsha u sinyuwa, mbiti dzanga dza dzika, ndi ḓo fushea.+ Vha ḓo ḓivha uri nṋe Yehova ndo amba uri ndi ṱoḓa vha tshi ḓikumedza tshoṱhe kha nṋe,+ musi ndo no fhedza u vha shululela mbiti dzanga.
14 “‘Ndi ḓo ita uri u vhe fhethu ho tshinyadzwaho na hu nyadziwaho vhukati ha tshaka dzo u tangaho na kha vhathu vhane vha fhira nga henefho.+
15 U ḓo vha wa u nyadziwa na u goḓiwa,+ tsumbo i sevhaho na tshithu tshi tshuwisaho tshaka dzo u tangaho, musi ndi tshi u haṱula ndo sinyuwa na u u pfisa vhuṱungu lu vhavhaho. Ho amba nṋe Yehova.
16 “‘Ndi ḓo vha rumela misevhe i vhulayaho ya nḓala uri i vha fhelise. Misevhe ine nda i rumela i ḓo u tshinyadza.+ Ndi ḓo ita uri nḓala i ṋaṋe nga u ita uri hu si tsha vha na zwiḽiwa.+
17 Ndi ḓo u rumela nḓala na zwivhanda,+ zwi ḓo vhulaya vhana vhau. Malwadze na u shululwa ha malofha zwi ḓo u wela, ndi ḓo u ḓisela banga.+ Ho amba nṋe Yehova.’”