Hesekiele 6:1-14
6 Yehova o dovha a amba na nṋe a ri:
2 “Murwa muthu, lavhelesa thavhani dza Isiraele u porofite nga hadzo.
3 U ambe u ri, ‘Inwi thavha dza Isiraele, ipfani zwine Yehova Murena Muvhusahoṱhe a zwi amba: Zwe Yehova Murena Muvhusahoṱhe a zwi vhudza thavha, zwikwara, milambo na magovha, ndi hezwi: “Ndi ḓo ni ḓisela banga, ndi ḓo fhelisa fhethu haṋu ha vhurabeli.
4 Aḽeṱare dzaṋu dzi ḓo thuthiwa, hune na ṱoma hone zwioro hu ḓo kwashiwa,+ vhathu vhaṋu vho faho ndi ḓo vha posa phanḓa ha midzimu yaṋu ya zwifanyiso i nengisaho.*+
5 Ndi ḓo posa zwitumbu zwa vhathu vha Isiraele phanḓa ha midzimu yavho ya zwifanyiso, ndi ḓo balanganya marambo aṋu u mona na aḽeṱare dzaṋu dzoṱhe.+
6 Fhethu hoṱhe hune na dzula hone, miḓi i ḓo fheliswa na fhethu ha vhurabeli hu ḓo thuthiwa ha sala hu shubi.+ Aḽeṱare dzaṋu dzi ḓo thuthiwa,+ midzimu yaṋu ya zwifanyiso i nengisaho i ḓo fheliswa, hune na ṱoma hone zwioro hu ḓo kwashiwa, zwoṱhe zwe na ita zwi ḓo fheliswa.
7 Vho vhulawaho vha ḓo ḓala vhukati haṋu,+ na kona u ḓivha uri ndi nṋe Yehova.+
8 “‘“Fhedzi ndi ḓo sia masalela, ngauri vhaṅwe vhaṋu vha ḓo ponyoka banga vhe vhukati ha dzitshaka musi ni tshi balanganyelwa kha mashango oṱhe.+
9 Vhe vha ponyoka vha ḓo nkhumbula vhe vhukati ha tshaka dze vha thubelwa khadzo.+ Vha ḓo ṱhogomela uri ndo vha ndo vhaiswa nga nṱhani ha u sa fhulufhedzea havho* musi vha tshi ntshandukela,+ vha tevhela midzimu yavho ya zwifanyiso i nengisaho.+ Vha ḓo shona na u nengwa zwivhi zwoṱhe na zwi nengisaho zwe vha zwi ita.+
10 Vha ḓo ḓivha uri ndi nṋe Yehova na uri ndo vha ndi tshi khou amba ngoho musi ndi tshi ri ndi ḓo vha ḓisela heyi khombo.”’+
11 “Zwe Yehova Murena Muvhusahoṱhe a zwi amba ndi hezwi: ‘Vhandani zwanḓa ni giginye nga mulenzhe, ni ṱungufhale nga nṱhani ha zwivhi zwoṱhe na zwithu zwi nengisaho zwe zwa itwa nga vha nnḓu ya Isiraele, ngauri vha ḓo fa nga banga, nga nḓala na nga dwadze.+
12 Ane a vha kule u ḓo fa nga dwadze, ane a vha tsini u ḓo fa nga banga, ane a ponyoka zwenezwi u ḓo fa nga nḓala; ndi ḓo vha sinyutshela zwihulu.+
13 Ndi hone ni tshi ḓo ḓivha uri ndi nṋe Yehova,+ musi vhathu vhavho vho vhulawaho vha tshi ḓala vhukati ha midzimu yavho ya zwifanyiso, u mona na aḽeṱare dzavho dzoṱhe,+ kha tshikwara tshiṅwe na tshiṅwe, kha ṱhodzi dzoṱhe dza thavha, na nga fhasi ha miri yoṱhe mihulu, na nga fhasi ha matavhi a miri mihulu, he vha ṋekedza zwifhiwa zwi nukhelelaho u itela u dzikisa midzimu yavho yoṱhe ya zwifanyiso.+
14 Ndi ḓo imisela nṱha tshanḓa tshanga tsha vha rwa, nda ita uri shango ḽi si tsha dzulwa nga muthu, fhethu havho hoṱhe hune vha dzula hone hu ḓo tshinyadzwa ha fhira soga ḽi re tsini na Dibila. Ndi hone vha tshi ḓo ḓivha uri ndi nṋe Yehova.’”
Ṱhaluso dzi re magumoni a siaṱari
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “u ḓifara havho luvhi; u ita havho zwa vhudzekani na vhathu vhanzhi.”
