Hesekiele 7:1-27
7 Yehova a dovha a amba na nṋe a ri:
2 “Iwe murwa muthu, Yehova Murena Muvhusahoṱhe o amba na shango ḽa Isiraele a ri: ‘Vhufhelo! Vhufhelo ho swika kha thungo nṋa dza shango.
3 Zwino ndi tshifhinga tsha uri u fheliswe, ndi ḓo u sinyutshela, nda u haṱula u ya nga nḓila dzau na u u vhona mulandu nga nṱhani ha mishumo yau yoṱhe i nengisaho.
4 A thi nga u khathutsheli; kana u u pfela vhuṱungu,+ ngauri ndi ḓo u ḓisela mvelelo dza zwe wa ita, u ḓo pfa vhuṱungu nga nṱhani ha masiandoitwa a mishumo yau i nengisaho.+ Ndi hone u tshi ḓo ḓivha uri ndi nṋe Yehova.’+
5 “Zwe Yehova Murena Muvhusahoṱhe a zwi amba ndi hezwi: ‘Hu ḓo ḓa khombo, khombo i sa fani na dziṅwe, i khou ḓa.+
6 Hu khou ḓa vhufhelo; vhufhelo vhu ḓo ḓa; vhu ḓo u ḓela. Vhu khou ḓa.
7 Tshifhinga tshau tsho swika, iwe mudzulapo wa shango. Tshifhinga tshau tshi khou ḓa, ḓuvha ḽau ḽo sendela.+ Hu na nḓaḓo hu si dakalo ngei dzithavhani.
8 “‘Hu si kale ndi ḓo shululela mbiti dzanga kha iwe,+ ndi ḓo u sinyutshela zwihulu,+ nda u haṱula u ya nga nḓila dzau na u u vhona mulandu kha mishumo yau yoṱhe i nengisaho.
9 A thi nga u khathutsheli; kana u u pfela vhuṱungu.+ Ndi ḓo u ḓisela mvelelo dza zwe wa ita, u ḓo pfa vhuṱungu nga nṱhani ha masiandoitwa a mishumo yau i nengisaho. Ndi hone u tshi ḓo ḓivha uri ndi nṋe Yehova ane a khou u rwa.+
10 “‘Ḓuvha ḽi khou ḓa! Tshifhinga tshau tsho swika;+ lubaḓa lwo bva maluvha na u ḓihudza ha swina ho no engedzea.
11 Khakhathi yo no vha lubaḓa lwa vhuvhi.+ A vha nga ponyoki khathihi na lupfumo lwavho, gogo ḽavho na vhaḓivhalea vhavho.
12 Tshifhinga tshi ḓo ḓa, ḓuvha ḽi ḓo swika. Murengi a songo takala, na murengisi a songo ṱungufhala, ngauri ndo sinyutshela gogo ḽavho ḽoṱhe.*+
13 Ngauri murengisi a nga si humele kha zwe zwa rengiswa, naho a songo vhulawa, ngauri bono ḽi kwama mavhuthu oṱhe. A hu na ane a ḓo humela murahu, nga nṱhani ha vhukhakhi hawe, a hu na ane a ḓo tshidza vhutshilo hawe.
14 “‘Vho lidza phalaphala,+ muṅwe na muṅwe o ḓilugiselela, fhedzi a hu na ane a khou ya nndwani, ngauri ndo sinyutshela mavhuthu oṱhe.+
15 Banga ḽi ngei nnḓa,+ dwadze na nḓala zwi muḓini. A re masimuni u ḓo vhulawa nga banga, nḓala na dwadze zwi ḓo vhulaya vha re muḓini.+
16 Vho ponyokaho vha ḓo shavhela dzithavhani, sa maivha a magovhani, muṅwe na muṅwe u ḓo ṱungufhala nga nṱhani ha vhukhakhi hawe.+
17 Zwanḓa zwavho zwoṱhe zwi ḓo ṋembelela, na magona avho oṱhe a ḓo rotha maḓi.*+
18 Vho ambara madzanganda,+ vho tshuwa. Vhoṱhe vha ḓo shoniswa, vha ḓo bva phanḓa kha ṱhoho dzavho.*+
19 “‘Vha ḓo laṱa siḽiva yavho nḓilani, vha ḓo vhenga musuku wavho. Siḽiva yavho kana musuku wavho a zwi nga ḓo vha tshidza nga ḓuvha ḽa u sinyuwa ha Yehova.+ A vha nga ḓo fushea, kana u ḓadza thumbu dzavho, ngauri ndi zwone* zwine zwa ita uri vha khakhe.
20 Vha ḓihudza nga madzanga avho o nakaho, vha ita zwifanyiso zwavho zwi nengisaho ngazwo,* midzimu yavho ya zwifanyiso i nengisaho.+ Ndi ngazwo ndi tshi ḓo ita uri vha zwi vhenge.
21 Ndi ḓo zwi* kumedzela zwanḓani zwa vhatsinda uri vha zwi thube na kha vhavhi vha ḽifhasi uri vha zwi dzhie, vha ḓo zwi tshikafhadza.
22 “‘Ndi ḓo vha furalela,+ vha ḓo tshikafhadza fhethu hanga ho dzumbamaho,* mavemu a ḓo dzhena a hu tshikafhadza.+
23 “‘Itani ngeḓane,*+ ngauri shango ḽo ḓala khaṱhulo dza malofha+ na muḓi wo ḓala dzikhakhathi.+
24 Ndi ḓo ḓisa tshaka dzi fhiraho dzoṱhe nga vhuvhi,+ dzi ḓo dzhia nnḓu dzavho,+ ndi ḓo fhelisa u ḓihudza ha vhane vha vha na maanḓa, nnḓu dzavho khethwa dzi ḓo tshikafhadzwa.+
25 Musi vhuṱungu havho vhu tshi swika, vha ḓo ṱoḓa mulalo, fhedzi u ḓo vha u siho.+
26 Hu ḓo ḓa khombo dzi tshi khou tou tevhekana, na mivhigo i tshi khou tou tevhekana, vhathu vha ḓo ṱoḓa bono kha muporofita,+ fhedzi mulayo* u ḓo vha u si tsheeho kha tshifhe na vhahulwane vha si tsha eletshedza.+
27 Khosi i ḓo ṱungufhala,+ na murangaphanḓa u ḓo kulea nungo, zwanḓa zwa vhathu vha shango zwi ḓo tetemela nga nyofho. Ndi ḓo vha fara u ya nga nḓila dzavho, nda vha haṱula u ya nga nḓila ye vha haṱula ngayo. Ndi hone vha tshi ḓo ḓivha uri ndi nṋe Yehova.’”+
Ṱhaluso dzi re magumoni a siaṱari
^ Zwine zwa amba uri vhane vha renga thundu kana u i rengisa a vha nga vhuyelwi, ngauri vha ḓo fheliswa vhoṱhe.
^ Nga u ḓirundela ngauri vha khou ofha.
^ Vha ḓo vheulwa ṱhoho dzavho ngauri vho ṱungufhala.
^ Ndi siḽiva yavho na musuku wavho.
^ Ndi zwithu zwavho zwa musuku na zwa siḽiva.
^ Ndi siḽiva yavho na musuku wavho zwine vha zwi shumisa u ita midzimu ya zwifanyiso.
^ Zwi vhonala zwi tshi khou ambela kha tshipiḓa tsha nga ngomu-ngomu tsha nnḓu khethwa ya Yehova.
^ Ndi ngeḓane dza u thuba.
^ Kana “ndayo.”