Hesekiele 9:1-11
9 A vhidzelela nga ipfi ḽihulu ndi tshi zwi pfa, a ri: “Nga hu sendele vhane vha ḓo fhelisa muḓi, muṅwe na muṅwe a fare tshiṱhavhane tshawe tsha u fhelisa!”
2 Nda vhona vhanna vha rathi vha tshi khou bva kha thungo ya khoro ya nṱha+ yo lavhelesaho devhula, muṅwe na muṅwe o vha o fara tshiṱhavhane tsha u vhulaya; hu na munna muthihi vhukati havho o ambara ḽinene, khunduni dzawe hu na tshishumiswa tsha muṅwaleli tshine tsha fara inki na tsha u ṅwala, vha dzhena vha ima tsini na aḽeṱare ya koporo.+
3 Nga zwenezwo, vhugala ha Mudzimu wa Isiraele+ ha bva he ha vha vhu hone nṱha ha vhakerube ha ya muṋangoni wa nnḓu,+ a thoma u vhidzelela munna we a vha o ambara ḽinene, khunduni dzawe hu na tshishumiswa tsha muṅwaleli tshine tsha fara inki na tsha u ṅwala.
4 Yehova a amba nae a ri: “Tshimbila na muḓi woṱhe wa Yerusalema, u swaye vhathu kha phanḓa vhane vha khou lila na u gomela+ nga nṱhani ha zwithu zwoṱhe zwi nengisaho zwine zwa khou itwa muḓini.”+
5 A amba na vhaṅwe ndi tshi zwi pfa a ri: “Tshimbilani na muḓi woṱhe ni mu sale murahu, ni vhulaye vhathu. Ni songo vha khathutshela, ni songo pfela vhuṱungu muthu na muthihi.+
6 Vhakalaha, vhaṱhannga, vhasidzana,* vhana vhaṱuku na vhafumakadzi, vha vhulayeni vhoṱhe ni vha fhedze.+ Fhedzi ni songo sendela tsini na muthu naho e ufhio a re na luswayo.+ Ni fanela u thoma nḓuni yanga khethwa.”+ Nga zwenezwo, vha thoma nga vhahulwane vha re phanḓa ha nnḓu.+
7 A amba navho a ri: “Tshikafhadzani nnḓu ni ḓadze miṱa nga vho vhulawaho.+ Tshimbilani!” Ngauralo, vha ya vha vhulaya vhathu vha re muḓini.
8 Musi vha tshi khou vha vhulaya, vha sia nṋe ndi ndoṱhe, nda gwadama fhasi nda vhidzelela nda ri: “Yowee, Iwe Yehova Murena Muvhusahoṱhe! Naa u ḓo fhelisa masalela oṱhe a Isiraele musi wo sinyutshela Yerusalema?”+
9 A amba na nṋe a ri: “Vhukhakhi ha nnḓu ya Isiraele na ya Yuda ndi vhuhulu vhukuma.+ Shango ḽo ḓala nga malofha o shululwaho,+ na muḓi wo ḓala nga vhutshinyi.+ Ngauri vha ri, ‘Yehova o ṱuwa shangoni, Yehova ha vhoni.’+
10 Fhedzi nṋe a thi nga vha khathutsheli; kana u vha pfela vhuṱungu.+ Ndi ḓo vha lifhedza u ya nga nḓila dzavho.”
11 Nda vhona munna o ambaraho tshiambaro tsha ḽinene e na tshishumiswa tsha muṅwaleli tshine tsha fara inki na tsha u ṅwala khunduni dzawe, a tshi ḓisa muvhigo, a ri: “Ndo ita zwe wa mmbudza.”
