Levitiko 1:1-17
-
Tshifhiwa tsha u fhiswa (1-17)
1 Yehova a vhidza Mushe a amba nae denndeni ḽa muṱangano+ a ri:
2 “Amba na Vhaisiraele* u ri: ‘Arali muṅwe waṋu a tshi ṱoḓa u ḓisela Yehova tshifhiwa, kha bvise kha zwe a fuwa, tshenetsho tshifhiwa tshi fanela u vha kholomo, nngu kana mbudzi.+
3 “‘Arali tshifhiwa tshawe tshi tshifhiwa tsha u fhiswa tshi tshi bva kha sambi, a ḓise tsha tshiduna tshi sa lwali.+ A tshi ḓise nga u ḓifunela+ phanḓa ha Yehova muṋangoni wa dennde ḽa muṱangano.
4 A vhee tshanḓa tshawe kha ṱhoho ya tshifhiwa tsha u fhiswa, tshi ḓo ṱanganedzwa uri tshi vhe tshipfumelelo tshawe.
5 “‘Mbohwana i ṱhavhiwe phanḓa ha Yehova, vharwa vha Aroni vhane vha vha vhotshifhe,+ vha ḓo ḓisa malofha, vha ḓo shasha eneo malofha thungo dzoṱhe dza aḽeṱare,+ ine ya vha muṋangoni wa dennde ḽa muṱangano.
6 Tshifhiwa tsha u fhiswa tshi fanela u bviswa mukumba, tshi tumukanywe tshi bve zwipiḓa.+
7 Vharwa vha Aroni vhane vha vha vhotshifhe, vha fanela u vhasa mulilo kha aḽeṱare+ na u dzudzanya khuni dza u vhasa mulilo.
8 Vharwa vha Aroni vhane vha vha vhotshifhe, vha ḓo vhea zwipiḓa zwa tshifhiwa+ khathihi na ṱhoho na mapfura* nṱha ha khuni muliloni kha aḽeṱare.
9 Mala ayo na khwanḓa dzayo zwi fanela u ṱanzwiwa nga maḓi; tshifhe a fhise zwoṱhe kha aḽeṱare sa tshifhiwa tsha u fhiswa, tshine tsha nukhelela kha Yehova.+
10 “‘Arali tshifhiwa tshawe tsha u fhiswa tshi nngu kana mbudzi+ kana ngwana dza nduna, a ḓise tsha tshiduna tshi sa lwali.+
11 Tshi ṱhavhiwe thungo ya devhula ya aḽeṱare phanḓa ha Yehova, vharwa vha Aroni vhane vha vha vhotshifhe, vha ḓo shasha malofha atsho thungo dzoṱhe dza aḽeṱare.+
12 A tshi tumukanye tshi vhe zwipiḓa, u katela na ṱhoho yatsho na mapfura* atsho, tshifhe u ḓo zwi vhekanya nṱha ha khuni muliloni kha aḽeṱare.
13 A tshi ṱanzwe mala na khwanḓa nga maḓi; tshifhe u fanela u ṋekedza zwoṱhe a zwi fhisa kha aḽeṱare. Ndi tshifhiwa tsha u fhiswa, tshine tsha nukhelela kha Yehova.
14 “‘Naho zwo ralo, arali a ḓisela Yehova zwiṋoni sa tshifhiwa tsha u fhiswa, a ḓise tshifhiwa tshawe tsha maivha-muronzhe kana mafhondo a maivha.+
15 Tshifhe u ḓo a ḓisa aḽeṱareni a a tshea mikulo a a fhisa kha aḽeṱare, fhedzi malofha a tea u shululwa nga thungo ha aḽeṱare.
16 A a bvise dyelo na mithenga a zwi laṱe tsini ha aḽeṱare, thungo ya vhubvaḓuvha, fhethu ha miḽora.*+
17 A ḽi fhandule kha phapha dzaḽo, fhedzi a songo ḽi tumukanya ḽa bva zwipiḓa zwivhili. Tshifhe u ḓo ḽi fhisa kha aḽeṱare nṱha ha khuni muliloni. Ndi tshifhiwa tsha u fhiswa, tshine tsha nukhelela kha Yehova.
Ṱhaluso dzi re magumoni a siaṱari
^ Thevhedz., “vharwa vha Isiraele.”
^ Kana “mapfura a re kha tswio.”
^ Kana “mapfura a re kha tswio.”
^ Kana “miḽora i re na mapfura,” zwine zwa vha miḽora yo lovhewaho kha mapfura a zwiṱhavhelo.
