Levitiko 10:1-20
10 Nga murahu Nadaba na Abihu+ vharwa vha Aroni vha dzhia zwithu zwa u oka mulilo, vha okela mulilo khazwo, vha fhisa zwioro+ khazwo. Vha ḓisela Yehova mulilo u songo tendelwaho,+ we a vha a songo vha laya uri vha u vhase.
2 Ha wa mulilo u tshi bva ha Yehova wa vha fhisa+ vha fela phanḓa ha Yehova.+
3 Nga zwenezwo, Mushe a amba na Aroni a ri: “Yehova o ri: ‘Ndi ḓo itwa mukhethwa kha vhane vha vha tsini na nṋe,+ ndi ḓo ṋewa vhugala phanḓa ha vhathu vhoṱhe.’” Aroni a sokou fhumula.
4 Mushe a vhidza Misaele na Eletsafani, vharwa vha Usiele,+ khotsimunene wa Aroni, a amba navho a ri: “Iḓani ni hwale mashaka aṋu ni a bvise fhethu hukhethwa ni a ise nnḓa ha madennde.”
5 Vha ḓa vha hwala zwitumbu zwavho zwi tshee zwo ambara zwiambaro zwazwo vha zwi isa nnḓa ha madennde, sa zwe Mushe a vha vhudza zwone.
6 Nga zwenezwo, Mushe a amba na Aroni na vhaṅwe vharwa vhawe, Eliasara na Ithamara a ri: “Ni songo litsha u gama mavhudzi aṋu kana na kherukanya zwiambaro zwaṋu+ uri ni sa ḓo fa na uri Mudzimu a si sinyutshele tshitshavha tshoṱhe. Vhahaṋu vha nnḓu yoṱhe ya Isiraele vha ḓo lilela vhe Yehova a vha vhulaya nga mulilo.
7 Ni songo bva nga muṋango wa dennde ḽa muṱangano uri ni sa ḓo fa, ngauri ni kha ḓi vha na mapfura a u ḓodza a Yehova.”+ Vha tevhedza zwe Mushe a amba.
8 Yehova a amba na Aroni a ri:
9 “Iwe na vharwa vhau ni songo nwa waini kana halwa, musi ni tshi dzhena denndeni ḽa muṱangano+ uri ni sa ḓo fa. Ndi mulayo wa lini na lini kha mirafho yaṋu.
10 Hezwi ndi u itela u fhambanya zwikhethwa na zwi re na tshika, zwi songo kunaho na zwo kunaho,+
11 na u funza Vhaisiraele maitele oṱhe e Yehova a a amba a tshi shumisa Mushe.”+
12 Mushe a amba na Aroni na vharwa vhawe vho salaho, Eliasara na Ithamara a ri: “Dzhiani tshifhiwa tsha thoro tsho salaho kha zwifhiwa zwa Yehova zwa u fhiswa, ni tshi ḽe sa vhurotho vhu si na mbiliso tsini na aḽeṱare,+ ngauri ndi vhukhethwa-khethwa.+
13 Ni tshi ḽe fhethu hukhethwa,+ ngauri ndi mukovhe waṋu na wa vharwa vhaṋu u bvaho kha zwifhiwa zwo fhiselwaho Yehova, ngauri hezwi ndi zwe nda laiwa.
14 Ni ḓo dovha na ḽa tshiakha tsha tshifhiwa tshi dzungudzwaho na mulenzhe wa mukovhe mukhethwa+ ni fhethu ho kunaho, inwi na vharwa vhaṋu na vhananyana vhaṋu,+ ngauri no ṋewa zwenezwi zwithu sa mukovhe waṋu na mukovhe wa vharwa vhaṋu zwi tshi bva kha zwifhiwa zwa u pfumedzana zwa Vhaisiraele.
15 Vha ḓo ḓisa mulenzhe wa mukovhe mukhethwa na tshiakha tsha tshifhiwa tsha u dzungudzwa khathihi na zwifhiwa zwa mapfura zwo fhiswaho nga mulilo, u itela u dzungudzela phanḓa na murahu tshifhiwa tsha u dzungudza phanḓa ha Yehova; tshi ḓo vha mukovhe waṋu na wa vharwa vhaṋu+ lini na lini, sa zwe Yehova a laya.”
16 Mushe a ṱoḓa mbudzi ya tshifhiwa tsha u pfumelela tshivhi+ nga vhuronwane, a wana uri yo fhiswa. Nga zwenezwo, a sinyutshela Eliasara na Ithamara, vharwa vha Aroni vho salaho, a ri:
17 “Ndi ngani ni songo ḽa tshifhiwa tsha u pfumelela tshivhi ni fhethu hukhethwa,+ samusi tshi tshikhethwa-khethwa, o ni ṋea tshone uri ni vhe na vhuḓifhinduleli kha vhukhakhi ha tshitshavha na u vha pfumelela phanḓa ha Yehova?
18 Malofha ayo ho ngo ḓiswa fhethu hukhethwa.+ No vha no fanela no i ḽela fhethu hukhethwa, samusi ndo laedzwa.”
19 Aroni a amba na Mushe a ri: “Ṋamusi vho ṋekedza tshifhiwa tshavho tsha u pfumelela tshivhi na tshifhiwa tshavho tsha u fhiswa phanḓa ha Yehova,+ hu sa londwi hezwi zwithu zwe zwa itea kha nṋe. Arali ndo vha ndo ḽa tshifhiwa tsha u pfumelela tshivhi ṋamusi, naa zwenezwo zwo vha zwi tshi ḓo takadza Yehova?”
20 Musi Mushe a tshi pfa zwenezwo, a fushea.
