Levitiko 13:1-59
13 Yehova a bvela phanḓa a tshi amba na Mushe na Aroni, a ri:
2 “Arali muthu a zwimba, lukanda lwawe lwa vha na tshilonda kana mavhala, zwi tshi nga ita uri a vhe na vhulwadze ha mapele*+ kha lukanda lwawe, a ḓiswe ha tshifhe Aroni kana muṅwe wa vharwa vhawe vhane vha vha vhotshifhe.+
3 Tshifhe u ḓo ṱola tshenetsho tshilonda tshi re kha lukanda lwawe. Musi mahaha a re henefho fhethu o no vha matshena na tshenetsho tshilonda tsho no bovhea, ndi vhulwadze ha mapele. Tshifhe u ḓo tshi ṱola a amba uri onoyo muthu u na tshika.
4 Fhedzi arali mavhala a re kha lukanda lwawe e matshena, hu songo bovhea nga maanḓa kha lukanda na mahaha a songo shanduka a vha matshena, tshifhe u ḓo dzudza onoyo muthu a re na tshilonda e eṱhe maḓuvha a sumbe.+
5 Nga ḓuvha ḽa vhusumbe tshifhe u ḓo mu ṱola, arali a vhona hu si na tshanduko kha tshilonda, tshi songo phaḓalala na lukanda, tshifhe u ḓo dovha a mu dzudza thungo maṅwe maḓuvha a sumbe.
6 “Tshifhe u fanela u dovha a mu ṱola nga ḓuvha ḽa vhusumbe, arali tshilonda tshi khwine tshi songo phaḓalala na lukanda, tshifhe u ḓo amba uri ha na tshika;+ ho vha hu tshi sokou vha gwati fhedzi. Nga zwenezwo, u ḓo kuvha zwiambaro zwawe a vha o kunaho.
7 Arali tshilonda tsha phaḓalala na lukanda musi o no ṱolwa nga tshifhe, o no amba uri o kuna, u ḓo dovha a ḓivhonadza lwa vhuvhili phanḓa ha tshifhe.
8 Tshifhe u ḓo tshi ṱola, arali tshilonda tsho phaḓalala na lukanda, tshifhe u ḓo amba uri u na tshika. Ndi mapele.+
9 “Arali muthu a vha na vhulwadze ha mapele u fanela u ḓiswa ha tshifhe,
10 tshifhe u ḓo mu ṱola.+ Arali lukanda lwawe lwo zwimba lu lutshena, mahaha alwo e matshena, henefho ho zwimbaho ho vulea,+
11 ndi mapele a sa fholi a re kha lukanda lwawe, tshifhe u ḓo ri onoyo muthu u na tshika. A songo tsha mu dzudza thungo,+ ngauri u na tshika.
12 Arali mapele o phaḓalala na lukanda lwoṱhe u bva ṱhohoni u swika milenzheni, lune tshifhe a kona u zwi vhona,
13 tshifhe o mu ṱola a vhona uri mapele o bva kha lukanda lwawe lwoṱhe, u ḓo amba uri o kuna. Arali lukanda lwoṱhe lu lutshena, o kuna.*
14 Fhedzi arali hu tshi vhonala tshilonda tsho vulea kha lukanda, u ḓo vha na tshika.
15 Musi tshifhe a tshi vhona tshilonda tsho vulea, u ḓo amba uri u na tshika.+ Tshilonda tsho vuleaho ndi tshika. Ndi mapele.+
16 Kana arali tshilonda tsho vuleaho tsha dovha tsha vha tshitshena, u ḓo dovha a ḓa ha tshifhe.
17 Tshifhe u ḓo mu ṱola,+ arali tshilonda tsho shanduka tsha vha tshitshena, tshifhe u ḓo amba uri onoyo mulwadze o kuna. Ha na tshika.
18 “Arali muthu o bva tshilonda tsha fhola,
19 fhedzi fhethu he ha vha hu na tshilonda ha vhonala ho zwimba hu hutshena kana ho zwimba ha vha na kuvhala kutswuku ku re na vhutshena, a ye ha tshifhe.
20 Tshifhe u ḓo tshi ṱola,+ arali tshi tshi vhonala tsho bovhea, mahaha e matshena, tshifhe u ḓo amba uri u na tshika. Ndi vhulwadze ha mapele ho bvaho kha tshilonda.
21 Fhedzi arali tshifhe a tshi ṱola a vhona uri a hu na mahaha matshena khatsho, a tsho ngo bovhea, tshi tshi vhonala tshi khwine, tshifhe u ḓo mu dzudza thungo maḓuvha a sumbe.+
22 Fhedzi arali tsho phaḓalala na lukanda, tshifhe u ḓo amba uri u na tshika. Ndi vhulwadze.
23 Arali tshilonda tshi songo phaḓalala, tsho sokou zwimba fhedzi, tshifhe u ḓo amba uri o kuna.+
24 “Kana arali muthu e na vhadzi ḽa u swa nga mulilo, ḽeneḽo vhadzi ḽa vha na vhutswuku vhu re na vhutshena kana ḽa tshenuluwa,
25 tshifhe u ḓo ḽi ṱola. Arali mahaha a re kha mavhala a shanduka a vha matshena, lukanda lwa bovhea, ndi mapele o bvaho kha vhadzi, tshifhe u ḓo amba uri onoyo muthu u na tshika. Ndi vhulwadze ha mapele.
26 Arali tshifhe a ṱola vhadzi, a vhona hu si na mahaha matshena kha tshilonda tshi songo bovhea, tshi tshi khou fhola, tshifhe u ḓo mu dzudza thungo maḓuvha a sumbe.+
27 Tshifhe u ḓo mu ṱola nga ḓuvha ḽa vhusumbe, arali tsho phaḓalala na lukanda, tshifhe u ḓo amba uri u na tshika. Ndi vhulwadze ha mapele.
28 Fhedzi arali mavhala a dzula o ralo a songo phaḓalala na lukanda a si tsha vhonala, hu u zwimba fhedzi ha vhadzi, tshifhe u ḓo amba uri o kuna, ngauri ndi u zwimba ha vhadzi.
29 “Arali munna kana mufumakadzi a bva tshilonda kha ṱhoho kana kha tshiṱefu,
30 tshifhe u ḓo ṱola tshenetsho tshilonda.+ Arali tshi tshi vhonala tsho bovhea kha lukanda, mahaha e a muvhala wa ṱaḓa o sekena, tshifhe u ḓo amba uri onoyo muthu u na tshika; ndi tshilonda tshi re kha lukanda lwa kha ṱhoho kana kha ndebvu. Ndi mapele a re ṱhohoni kana kha tshiṱefu.
31 Fhedzi arali tshifhe a vhona uri tshilonda a tsho ngo bovhea kha lukanda, hu si na mavhudzi matswu khatsho, tshifhe u fanela u dzudza thungo onoyo muthu a re na tshilonda maḓuvha a sumbe.+
32 Tshifhe u ḓo ṱola tshilonda nga ḓuvha ḽa vhusumbe, arali tshilonda tshi songo phaḓalala, hu si na mavhudzi a muvhala wa ṱaḓa khatsho, fhethu hu re na tshilonda hu sa bovhei,
33 onoyo muthu nga a vheulwe, fhedzi ha nga vheulwi fhethu hu re na tshilonda. Tshifhe u ḓo dzudza thungo onoyo muthu a re na tshilonda maḓuvha a sumbe.
34 “Tshifhe u ḓo dovha a ṱola fhethu hu re na tshilonda nga ḓuvha ḽa vhusumbe, arali tshilonda tshi songo phaḓalala na lukanda hu tshi vhonala hu songo bovhea, tshifhe u tea u amba uri onoyo muthu o kuna, u fanela u kuvha zwiambaro zwawe uri a vhe o kunaho.
35 Fhedzi arali tshilonda tsha vhonala tsho phaḓalala nga murahu ha musi ho no ambiwa uri o kuna,
36 tshifhe u ḓo mu ṱola, arali tshilonda tsho phaḓalala na lukanda, a zwi ṱoḓei uri tshifhe a sedze arali e na mavhudzi a muvhala wa ṱaḓa; u na tshika.
37 Fhedzi arali a tshi ṱola a vhona uri tshilonda a tsho ngo phaḓalala na uri hu na mavhudzi matswu khatsho, tshilonda tshenetsho tsho fhola. O kuna, tshifhe u ḓo amba uri ha na tshika.+
38 “Arali munna kana mufumakadzi o bva mavhala kha lukanda, eneo mavhala e matshena,
39 tshifhe u ḓo a ṱola.+ Arali eneo mavhala a re kha lukanda o tshenuluwa zwenezwo ndi vhupundu vhu si na khombo ho bvaho kha lukanda. Onoyo muthu o kuna.
40 “Arali munna a guvhuwa mavhudzi kha ṱhoho yawe, a bva phanḓa, o kuna.
41 Arali a guvhuwa mavhudzi kha phanḓa, a bva phanḓa henefho, o kuna.
42 Fhedzi arali a bva tshilonda tshitswuku tshi re na vhutshena kha lukanda lwa kha ṱhoho kana kha phanḓa yawe, ndi mapele o bvaho kha lukanda lwa kha ṱhoho yawe kana kha phanḓa yawe.
43 Tshifhe u ḓo mu ṱola, arali tshilonda tsho zwimbaho tshi tshitswuku tshi na mavhala kha ṱhoho kana kha phanḓa yawe, a tshi vhonala e na mapele kha lukanda lwawe,
44 u na mapele. U na tshika, tshifhe u fanela u amba uri u na tshika nga nṱhani ha vhulwadze vhu re kha ṱhoho yawe.
45 Zwiambaro zwa muthu a re na mapele zwi fanela u kherukanywa, ṱhoho yawe a yo ngo fanela u gamiwa, a fukedze ndebvu dzawe dzi re nṱha ha mulomo, a vhidzelele a ri: ‘Ndi na tshika, ndi na tshika!’
46 U ḓo vha na tshika maḓuvha oṱhe musi e na honoho vhulwadze. Samusi e na tshika, a dzule thungo. U ḓo dzudzwa nnḓa ha madennde.+
47 “Arali vhulwadze ha mapele ho tshikafhadza tshiambaro, hu sa londwi uri ndi tshiambaro tsha wuḽu kana tsha ḽinene,
48 kana kha murungo wa labi ḽa ḽinene kana wa wuḽu kana kha mukumba kana tshithu tshiṅwe na tshiṅwe tsho itwaho nga mukumba,
49 dondo ḽa tshilonda ḽa muvhala wa ṱaḓa kana mudala kana mutswuku ḽa tshikafhadza tshiambaro tshawe, murungo kana tshithu naho tshi tshifhio tsha mukumba, dondo ḽeneḽo ḽi fanela u sumbedzwa tshifhe.
50 Tshifhe u ḓo ṱola ḽeneḽo dondo, tshenetsho tshiambaro u ḓo tshi vhetshela thungo maḓuvha a sumbe.+
51 Musi a tshi ṱola ḽeneḽo dondo nga ḓuvha ḽa vhusumbe, a vhona uri ḽo pfukela kha tshiambaro, kha murungo kana kha mukumba (hu sa londwi uri mukumba u shumiselwa mini), ḽeneḽo dondo ndi mapele, tshenetsho tshiambaro tshi na tshika.+
52 A fhise tshenetsho tshiambaro kana murungo u re kha wuḽu kana kha ḽinene, tshithu naho tshi tshifhio tsha mukumba hune ha vha na dondo, ngauri ndi mapele. Tshi fanela u fhiswa nga mulilo.
53 “Fhedzi arali tshifhe a ri a tshi tshi sedza a wana dondo ḽi songo pfukela kha tshiambaro kana kha murungo kana kha tshithu naho tshi tshifhio tsha mukumba,
54 tshifhe u ḓo laedza uri hu kuvhiwe tshithu tsho tshikafhadzwaho, u ḓo tshi vhetshela thungo maṅwe maḓuvha a sumbe.
55 Tshifhe u ḓo sedza tshithu tsho tshikafhadzwaho musi tsho no kuvhiwa zwavhuḓi. Arali fhethu ho tshikafhadzwaho hu songo shanduka, naho vhulwadze vhu songo phaḓalala, ndi tshika. Ni tshi fhise muliloni, samusi tsho sina, hu sa londwi uri ndi nga ngomu kana ndi nga nnḓa hatsho.
56 “Fhedzi arali tshifhe a tshi tshi sedza, a vhona tshipiḓa tsho tshikafhadzwaho tshi si tsheeho nga murahu ha u kuvhiwa zwavhuḓi, u ḓo kherula tshipiḓa tshenetsho kana mukumba kana murungo.
57 Naho zwo ralo, arali ḽeneḽo dondo ḽa dovha ḽa vhonala kha tshiṅwe tshipiḓa tsha tshiambaro kana murungo kana kha tshithu naho tshi tshifhio tsha mukumba, tshi tshi khou phaḓalala, ni fanela u fhisa nga mulilo tshithu naho tshi tshifhio tsho tshikafhadzwaho.+
58 Fhedzi honoho u tshikafhadzwa arali ha fhela kha tshiambaro kana murungo kana tshithu naho tshi tshifhio tsha mukumba we na u kuvha, tshi fanela u kuvhiwa lwa vhuvhili, tshi ḓo vha tsho kunaho.
59 “Hoyu ndi mulayo wa vhulwadze ha mapele a re kha tshiambaro tsha wuḽu kana tsha ḽinene kana kha murungo kana kha tshithu naho tshi tshifhio tsha mukumba, u itela u amba uri tsho kuna kana tshi na tshika.”
Ṱhaluso dzi re magumoni a siaṱari
^ Ipfi ḽa Tshihevheru ḽo ṱalutshedzelwaho sa “mapele” ḽi angaredza zwithu zwinzhi zwine zwa katela malwadze a lukanda o fhambanaho ane a pfukela. Ḽi nga dovha ḽa katela mubvuḓu wa kha zwiambaro na mugugumela wa kha nnḓu.
^ Kana “mapele awe ha pfukeli.”
