Levitiko 14:1-57
14 Yehova a bvela phanḓa a tshi amba na Mushe, a ri:
2 “Hoyu ndi mulayo une wa tea u tevhelwa musi muthu e na mapele nga ḓuvha ḽa u kunakiswa hawe musi a tshi ḓiswa ha tshifhe.+
3 Tshifhe u ḓo bvela nnḓa ha madennde uri a mu ṱole. Arali vhulwadze ha mapele ho fhola kha onoyo muthu,
4 tshifhe u ḓo mu vhudza uri a ḓise zwiṋoni zwivhili zwo kunaho zwi tshi kha ḓi tshila, thanda ya muṱaululo, labi ḽitswuku na muhisopo u itela u kunakiswa hawe.+
5 Tshifhe u ḓo laedza uri tshiṅwe tsha zwenezwo zwiṋoni tshi ṱhavhelwe khalini i re na maḓi a tshisima.
6 Fhedzi a dzhie tshiṋoni tshine tsha kha ḓi tshila khathihi na thanda ya muṱaululo, labi ḽitswuku na muhisopo, a zwi mbwandamedze kha malofha a tshiṋoni tshe tsha ṱhavhelwa kha maḓi a tshisima.
7 U hashe malofha lwa sumbe kha muthu ane a khou ḓikunakisa kha mapele, u ambe uri onoyo muthu o kuna, a fhufhise itsho tshiṋoni tshi tshilaho uri tshi ye ḓakani.+
8 “Ane a khou ḓikunakisa u fanela u kuvha zwiambaro zwawe na u vheula mavhudzi awe oṱhe na u ṱamba nga maḓi, u ḓo vha o kuna. Nga murahu ha zwenezwo, u ḓo kona u dzhena madenndeni, fhedzi u ḓo dzula nnḓa ha dennde ḽawe maḓuvha a sumbe.
9 Nga ḓuvha ḽa vhusumbe, a vheule mavhudzi oṱhe a re ṱhohoni yawe, kha tshiṱefu na tsie. Musi o no vheula mavhudzi awe oṱhe, a kuvhe zwiambaro zwawe, a ṱambe nga maḓi, u ḓo vha o kuna.
10 “Nga ḓuvha ḽa vhumalo a dzhie ngwana dza nduna mbili dzi sa lwaliho, ngwana ya tsadzi+ nthihi i sa lwaliho ya ṅwaha muthihi, zwipiḓa zwiraru kha zwa fumi zwa tshikalo tsha efa* ya fuḽauru tsekene sa tshifhiwa tsha thoro+ tsho ṱanganyiswaho na mapfura, na mapfura a logo* nthihi;+
11 tshifhe ane a amba uri onoyo muthu o kuna, a ḓise onoyo muthu ane a khou ḓikunakisa khathihi na zwifhiwa phanḓa ha Yehova muṋangoni wa dennde ḽa muṱangano.
12 Tshifhe u ḓo dzhia thutha a i ṋekedza u itela tshifhiwa tsha u pfumelela mulandu+ khathihi na mapfura a logo* nthihi, u ḓo a dzungudzela phanḓa na murahu sa tshifhiwa tsha u dzungudzwa phanḓa ha Yehova.+
13 U ḓo ṱhavha thutha fhethu hune ha anzela u ṱhavhiwa+ tshifhiwa tsha u pfumelela tshivhi na tshifhiwa tsha u fhiswa, fhethu hukhethwa, ngauri tshifhiwa tsha u pfumelela mulandu ndi tsha tshifhe u fana na tshifhiwa tsha u pfumelela tshivhi.+ Ndi tshikhethwa-khethwa.+
14 “Tshifhe u ḓo dzhia maṅwe a malofha a tshifhiwa tsha u pfumelela mulandu, tshifhe u ḓo a ḓodza kha ṱhodzi ya nḓevhe ya tsha u ḽa ya ane a khou ḓikunakisa na kha gunwe ḽa tshanḓa tshawe tsha u ḽa na kha gunwe ḽa mulenzhe wawe wa tsha u ḽa.
15 Tshifhe u ḓo dzhia maṅwe a mapfura a logo*+ nthihi a a shela nga ngomu ha tshanḓa tshawe tsha monde.
16 Tshifhe u ḓo dzhenisa munwe wawe wa tsha u ḽa kha mapfura ane a vha nga ngomu ha tshanḓa tshawe tsha monde, a hasha maṅwe a mapfura nga munwe wawe lwa sumbe phanḓa ha Yehova.
17 Tshifhe u ḓo ḓodza maṅwe a mapfura o salaho kha tshanḓa tshawe na kha ṱhodzi ya nḓevhe ya tsha u ḽa ya ane a khou ḓikunakisa na kha gunwe ḽa tshanḓa tshawe tsha u ḽa na kha gunwe ḽa mulenzhe wawe wa tsha u ḽa, henefho he ha ḓodzwa malofha a tshifhiwa tsha u pfumelela mulandu.
18 Mapfura o salaho a re nga ngomu ha tshanḓa tsha tshifhe u ḓo a shela kha ṱhoho ya muthu ane a khou ḓikunakisa, tshifhe u ḓo mu pfumelela phanḓa ha Yehova.+
19 “Tshifhe u ḓo ṋekedza tshifhiwa tsha u pfumelela tshivhi,+ a pfumelela muthu ane a khou ḓikunakisa tshika, nga murahu ha zwenezwo u ḓo ṱhavha tshifhiwa tsha u fhiswa.
20 Tshifhe u ḓo ṋekedza tshifhiwa tsha u fhiswa na tshifhiwa tsha thoro+ kha aḽeṱare, tshifhe u ḓo mu pfumelela,+ u ḓo vha o kuna.+
21 “Naho zwo ralo, arali e mushai a si na zwo eḓanaho, u ḓo dzhia thutha nthihi uri i vhe tshifhiwa tsha u pfumelela mulandu uri a ite tshifhiwa tsha u dzungudzwa u itela u mu pfumelela, khathihi na tshipiḓa tshithihi kha zwa fumi tsha tshikalo tsha efa* tsha fuḽauru tsekene yo ṱanganyiswaho na mapfura sa tshifhiwa tsha thoro, mapfura a logo* nthihi,
22 na maivha-muronzhe mavhili kana mafhondo mavhili a maivha, u ya nga hune a kona ngaho. Ḽiṅwe ḽi ḓo vha ḽa tshifhiwa tsha u pfumelela tshivhi, ḽiṅwe ḽa vha ḽa tshifhiwa tsha u fhiswa.+
23 Nga ḓuvha ḽa vhumalo+ u ḓo a ḓisa kha tshifhe muṋangoni wa dennde ḽa muṱangano u itela u ḓikunakisa phanḓa ha Yehova.+
24 “Tshifhe u ḓo dzhia thutha ya tshifhiwa tsha u pfumelela mulandu+ na mapfura a logo* nthihi, tshifhe u ḓo a dzungudzela phanḓa na murahu sa tshifhiwa tsha u dzungudzwa phanḓa ha Yehova.+
25 U ḓo ṱhavha thutha ya tshifhiwa tsha u pfumelela mulandu, tshifhe u ḓo dzhia maṅwe a malofha a tshifhiwa tsha u pfumelela mulandu a a ḓodza kha ṱhodzi ya nḓevhe ya tsha u ḽa ya ane a khou ḓikunakisa na kha gunwe ḽa tshanḓa tshawe tsha u ḽa na kha gunwe ḽa mulenzhe wawe wa tsha u ḽa.+
26 Tshifhe u ḓo shela maṅwe a mapfura nga ngomu ha tshanḓa tshawe tsha monde,+
27 u ḓo hasha nga munwe wawe wa tsha u ḽa maṅwe a mapfura ane a vha nga ngomu ha tshanḓa tshawe tsha monde lwa sumbe phanḓa ha Yehova.
28 Tshifhe u ḓo ḓodza maṅwe a mapfura o salaho kha tshanḓa tshawe na kha ṱhodzi ya nḓevhe ya tsha u ḽa ya ane a khou ḓikunakisa na kha gunwe ḽa tshanḓa tshawe tsha u ḽa na kha gunwe ḽa mulenzhe wawe wa tsha u ḽa fhethu huthihi he a shela hone malofha a tshifhiwa tsha u pfumelela mulandu.
29 Mapfura o salaho a re nga ngomu ha tshanḓa tsha tshifhe u ḓo a shela kha ṱhoho ya muthu ane a khou ḓikunakisa, u itela u mu pfumelela phanḓa ha Yehova.
30 “U ḓo ṋekedza ḽiṅwe ḽa maivha-muronzhe kana ḽiṅwe ḽa mafhondo a maivha u ya nga hune a kona ngaho,+
31 ḽiṅwe ḽi ḓo vha ḽa tshifhiwa tsha u pfumelela tshivhi, ḽiṅwe ḽa vha ḽa tshifhiwa tsha u fhiswa+ khathihi na tshifhiwa tsha thoro u ya nga hune a nga kona ngaho; tshifhe u ḓo pfumelela ane a khou ḓikunakisa phanḓa ha Yehova.+
32 “Wonoyu ndi mulayo wa muthu we a vha e na vhulwadze ha mapele, fhedzi a si na zwo eḓanaho musi a tshi kunakiswa.”
33 Yehova a amba na Mushe na Aroni a ri:
34 “Musi ni tshi swika shangoni ḽa Kanana,+ ḽine nda khou ni ṋea ḽone uri ḽi vhe ḽaṋu,+ nda ḓisa vhulwadze ha mapele nḓuni shangoni ḽaṋu,+
35 muthu ane yeneyo nnḓu ya vha yawe u fanela u ḓa a vhudza tshifhe uri: ‘Hu na zwithu zwine zwa nga vhulwadze nḓuni yanga.’
36 Tshifhe u ḓo laedza uri hu bviswe zwithu zwoṱhe zwi re nga ngomu nḓuni musi a sa athu u ḓa u itela u sedza eneo mapele uri a sa ḓo amba uri zwoṱhe zwi re nga ngomu nḓuni zwi na tshika; nga murahu ha zwenezwo, tshifhe u ḓo dzhena nga ngomu u itela u ṱola nnḓu.
37 U ḓo ṱola henefho fhethu hune ha vha na vhulwadze, arali mbondo dza yeneyo nnḓu dzi na tshika ya muvhala wa ṱaḓa kana zwithu zwitswuku zwine zwa khou ṱahadza luvhondo, zwo bovhela kha luvhondo,
38 tshifhe u ḓo bvela nnḓa a vala yeneyo nnḓu lwa maḓuvha a sumbe uri hu si dzhene muthu.+
39 “Nga ḓuvha ḽa vhusumbe tshifhe u ḓo vhuyelela kha yeneyo nnḓu a i ṱola. Arali dzenedzo tshika dzo phaḓalala na mbondo dza nnḓu,
40 tshifhe u ḓo laedza uri vha bvise matombo a re na tshika, a laṱwe nnḓa ha muḓi fhethu hu re na tshika.
41 U ite uri nnḓu i fhalwe zwavhuḓi nga ngomu, zwo penndaho* nnḓu na daka zwo bviswaho zwi laṱwe nnḓa fhethu hu re na tshika.
42 Vha ḓo i shatela nga maṅwe matombo he vha bvisa maṅwe matombo, u ḓo shumisa ḽiṅwe daka, a dovha a pennda* yeneyo nnḓu.
43 “Arali nnḓu yeneyi ya dovha ya tshikafhadzwa musi ho no bviswa matombo, nnḓu yo no fhalwa na u penndwa,*
44 tshifhe u ḓo dzhena a i ṱola. Arali tshika yeneyo yo phaḓalala na nnḓu, ndi mapele+ a re nḓuni. I na tshika.
45 A ite uri yeneyo nnḓu i thuthwe, matombo ayo, thanda dzayo, hoṱhe he ya penndwa* na daka ḽa yeneyo nnḓu, zwi hwalelwe nnḓa ha muḓi fhethu hu re na tshika.+
46 Fhedzi ane a dzhena kha yeneyo nnḓu nga maḓuvha ane ya ḓo vha yo valwa+ uri hu si dzhene muthu u ḓo vha na tshika u swika ḽi tshi kovhela;+
47 ane a eḓela henefho nḓuni u fanela u kuvha zwiambaro zwawe na ane a ḽela kha yeneyo nnḓu u fanela u kuvha zwiambaro zwawe.
48 “Naho zwo ralo, arali tshifhe a ḓa a vhona uri yeneyo tshika a yo ngo phaḓalala na nnḓu musi yeneyo nnḓu yo no penndwa,* tshifhe u fanela u amba uri yeneyo nnḓu yo kuna, ngauri yeneyo tshika yo bviswa.
49 Uri a kunakise nnḓu kha yeneyo tshika,* u ḓo dzhia zwiṋoni zwivhili, thanda ya muṱaululo, labi ḽitswuku na muhisopo.+
50 U ḓo vhulayela tshiṋoni tshithihi nga ngomu ha mudzio wa vumba maḓini a tshisima.
51 U ḓo dzhia thanda ya muṱaululo, muhisopo, labi ḽitswuku na tshiṋoni tshine tsha khou tshila a zwi mbwandamedza kha malofha a tshiṋoni tsho ṱhavhiwaho na kha maḓi a tshisima, u a hashe kha nnḓu lwa sumbe.+
52 U ḓo kunakisa nnḓu kha dzenedzo tshika* nga malofha a tshiṋoni, maḓi a tshisima, tshiṋoni tshi tshilaho, thanda ya muṱaululo, muhisopo na labi ḽitswuku.
53 A fhufhisele tshiṋoni tshenetsho nnḓa ha muḓi uri tshi ye ḓakani, a pfumelele yeneyo nnḓu, yeneyo nnḓu i ḓo kuna.
54 “Wonoyu ndi mulayo u ambaho nga ha vhulwadze naho vhu vhufhio ha mapele, mapele a kha lukanda lwa kha ṱhoho kana ndebvu,+
55 mapele a re kha tshiambaro+ kana kha nnḓu,+
56 u zwimba, magwati a zwilonda na mavhala matshena,+
57 u itela u vhona arali tshithu tshi na tshika kana tsho kuna.+ Wonoyu ndi mulayo wa mapele.”+
Ṱhaluso dzi re magumoni a siaṱari
^ Zwipiḓa zwiraru kha zwa fumi zwa efa zwi lingana na ḽithara dza 6,6. Sedzani Ṱhume. B14.
^ Logo i lingana na ḽithara dza 0,31. Sedzani Ṱhume. B14.
^ Logo i lingana na ḽithara dza 0,31. Sedzani Ṱhume. B14.
^ Logo i lingana na ḽithara dza 0,31. Sedzani Ṱhume. B14.
^ Tshipiḓa tshithihi kha zwa fumi tsha efa tshi lingana na ḽithara dza 2,2. Sedzani Ṱhume. B14.
^ Logo i lingana na ḽithara dza 0,31. Sedzani Ṱhume. B14.
^ Logo i lingana na ḽithara dza 0,31. Sedzani Ṱhume. B14.
^ Kana “hulungaho.”
^ Kana “hulunga.”
^ Kana “hulungwa.”
^ Kana “hulungwa.”
^ Kana “hulungwa.”
^ Thevhedz., “tshivhi.”
^ Thevhedz., “tshivhi.”
