Levitiko 15:1-33
-
Vhulwadze ha u rothisa luḓi nga tshiraḓo tsha mbeu (1-33)
15 Yehova a bvela phanḓa a tshi amba na Mushe na Aroni a ri:
2 “Amba na Vhaisiraele u ri: ‘Arali munna e na vhulwadze ha u rothisa luḓi nga tshiraḓo tshawe tsha mbeu,* luḓi lune lwa khou bva khae lu ita uri a vhe na tshika.+
3 U na tshika nga nṱhani ha lwonolwo luḓi, hu sa londwi uri lwonolwo luḓi lu khou bvela phanḓa lu tshi rotha kha tshiraḓo tshawe tsha mbeu kana a lu tsha rotha, u vha a tshi kha ḓi vha na tshika.
4 “‘Mmbete muṅwe na muṅwe une muthu ane a khou rothisa luḓi a eḓela khawo u ḓo vha na tshika, tshithu tshiṅwe na tshiṅwe tshine a dzula khatsho tshi ḓo vha na tshika.
5 Muthu ane a kwama mmbete wa onoyo munna u fanela u kuvha zwiambaro zwawe, u fanela u ṱamba nga maḓi, a vhe wa tshika u swika ḽi tshi kovhela.+
6 Ane a dzula kha tshithu tsho dzulaho muthu ane a rothisa luḓi. A kuvhe zwiambaro zwawe, a ṱambe nga maḓi, a vhe wa tshika u swika ḽi tshi kovhela.
7 Ane a kwama muthu ane a khou rothisa luḓi u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
8 Arali muthu ane a khou rothisa luḓi a pfela mare muṅwe muthu a si na tshika, onoyo muthu u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
9 Sale iṅwe na iṅwe ine ya dzulwa nga muthu ane a rothisa luḓi i ḓo vha na tshika.
10 Muthu ane a kwama tshithu tshe a vha o dzula khatsho u ḓo vha na tshika u swika ḽi tshi kovhela; na ane a hwala zwithu zwenezwo u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
11 Arali muthu ane a rothisa luḓi+ a songo ṱamba zwanḓa zwawe nga maḓi, a kwama muṅwe muthu, o kwamiho u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
12 Mudzio wa vumba une wa kwamiwa nga muthu ane a khou rothisa luḓi u fanela u kwashiwa, mudzio we wa tou vhaḓwa u fanela u ṱanzwiwa nga maḓi.+
13 “‘Musi luḓi lu si tsha rotha na ane a khou lwala o no kuna, u ḓo vhalela maḓuvha a sumbe a u kunakiswa hawe, a kuvhe zwiambaro zwawe, a ṱambe maḓini a tshisima, u ḓo vha o kuna.+
14 Nga ḓuvha ḽa vhumalo a dzhie maivha-muronzhe mavhili kana mafhondo mavhili a maivha,+ a ḓe phanḓa ha Yehova muṋangoni wa dennde ḽa muṱangano a a ṋee tshifhe.
15 Tshifhe u ḓo a ṋekedza, ḽiṅwe ḽi ḓo vha ḽa tshifhiwa tsha u pfumelela tshivhi, ḽiṅwe ḽa vha ḽa tshifhiwa tsha u fhiswa, tshifhe u ḓo mu pfumelela phanḓa ha Yehova nga ha vhulwadze hawe ha u rothisa luḓi.
16 “‘Arali munna a tshi rothisa mbeu, u fanela u ṱamba muvhili woṱhe nga maḓi, a vhe wa tshika u swika ḽi tshi kovhela.+
17 A kuvhe tshiambaro naho tshi tshifhio nga maḓi na tshithu tshiṅwe na tshiṅwe tsho itwaho nga mukumba tshe tsha rothela mbeu, tshi ḓo vha na tshika u swika ḽi tshi kovhela.
18 “‘Arali munna na mufumakadzi vha ita zwa vhudzekani vhoṱhe, vha fanela u ṱamba nga maḓi, vha vhe na tshika u swika ḽi tshi kovhela.+
19 “‘Arali mufumakadzi e maḓuvhani, u fanela u dzula e wa tshika maḓuvha a sumbe.+ Muthu ane a mu kwama u ḓo vha wa tshika u swika ḽi tshi kovhela.+
20 Tshiṅwe na tshiṅwe tshine a eḓela khatsho musi e maḓuvhani tshi ḓo vha na tshika, tshiṅwe na tshiṅwe tshine a dzula khatsho tshi ḓo vha na tshika.+
21 Muthu ane a kwama mmbete wawe u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
22 Muthu ane a kwama tshithu tshe a vha o dzula khatsho u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.
23 Arali muthu a kwama mmbete kana tshiṅwe tshithu tshe a vha o dzula khatsho, u ḓo vha wa tshika u swika ḽi tshi kovhela.+
24 Arali munna a ita zwa vhudzekani nae, tshika dza onoyo mufumakadzi dza bvela khae,+ u ḓo vha wa tshika lwa maḓuvha a sumbe, mmbete muṅwe na muṅwe une a eḓela khawo u ḓo vha na tshika.
25 “‘Musi mufumakadzi a tshi khou rothisa malofha a sa imi lwa maḓuvha manzhi+ tshi si tshifhinga tshawe tsha nga misi tsha u vha maḓuvhani+ kana arali a tshi khou rothisa malofha u fhirisa tshifhinga tsho ḓoweleaho tsha u vha maḓuvhani, u ḓo vha na tshika maḓuvha oṱhe musi a tshi khou rothisa malofha, u fana na musi e maḓuvhani.
26 Mmbete une a ḓo eḓela khawo musi a tshi khou rothisa malofha u ḓo fana na mmbete wa musi e maḓuvhani,+ tshithu tshiṅwe na tshiṅwe tshine a ḓo dzula khatsho tshi ḓo vha na tshika u fana na tshika dza musi e maḓuvhani.
27 Muthu ane a zwi kwama u ḓo vha na tshika, u fanela u kuvha zwiambaro zwawe, a ṱambe nga maḓi, a vhe wa tshika u swika ḽi tshi kovhela.+
28 “‘Naho zwo ralo, musi o no kuna a si tsha rothisa malofha, u ḓo vhalela maḓuvha a sumbe, nga murahu u ḓo vha o kuna.+
29 Nga ḓuvha ḽa vhumalo u fanela u dzhia maivha-muronzhe mavhili kana mafhondo mavhili a maivha,+ a a ḓise kha tshifhe muṋangoni wa dennde ḽa muṱangano.+
30 Tshifhe u ḓo ita uri ḽiṅwe ḽi vhe ḽa tshifhiwa tsha u pfumelela tshivhi, ḽiṅwe ḽi vhe ḽa tshifhiwa tsha u fhiswa, tshifhe u ḓo mu itela tshipfumelelo phanḓa ha Yehova nga ha vhulwadze hawe ha u shuluwa malofha.+
31 “‘Nga zwenezwo, ni tea u ita uri Vhaisiraele vha vhe kule na zwithu zwine zwa nga vha tshikafhadza uri vha sa ḓo fela u sa kuna havho nga u tshikafhadza dennde ḽanga ḽikhethwa,* ḽi re vhukati havho.+
32 “‘Wonoyu ndi mulayo wa munna ane a vha na vhulwadze ha u rothisa luḓi, munna ane a vha na tshika nga nṱhani ha u rothisa mbeu,+
33 mufumakadzi musi e maḓuvhani,+ munna kana mufumakadzi ane a vha na vhulwadze ha u rothisa+ na munna ane a ita zwa vhudzekani na mufumakadzi ane a vha na tshika.’”
Ṱhaluso dzi re magumoni a siaṱari
^ Thevhedz., “ṋamani yawe.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
