Levitiko 17:1-16
17 Yehova a amba na Mushe a ri:
2 “Amba na Aroni na vharwa vhawe na Vhaisiraele vhoṱhe u ri: ‘Hezwi ndi zwe Yehova a laya:
3 “‘“Arali muthu naho e ufhio wa Isiraele a ṱhavha mboho kana thutha kana mbudzi madenndeni kana a i ṱhavhela nnḓa ha madennde,
4 a si i ḓise muṋangoni wa dennde ḽikhethwa* ḽa muṱangano u itela u i ṋekedza sa tshifhiwa tsha Yehova phanḓa ha Yehova, onoyo muthu u ḓo dzhiiwa e na mulandu wa malofha. O shulula malofha, onoyo muthu u tea u vhulawa.
5 Hezwi ndi u itela uri Vhaisiraele vha ḓise zwiṱhavhelo zwe vha vha vha tshi zwi itela ḓakani, vha zwi ḓisele Yehova muṋangoni wa dennde ḽa muṱangano, vha zwi ṋee tshifhe. Vha ṋekedze Yehova zwenezwi zwiṱhavhelo sa zwiṱhavhelo zwa u pfumedzana.+
6 Tshifhe u ḓo shasha malofha kha aḽeṱare ya Yehova muṋangoni wa dennde ḽa muṱangano, a dubisa mapfura uri a nukhelele kha Yehova.+
7 A vho ngo tsha tea u ṋekedza zwiṱhavhelo kha madimoni+ ane a fana na mbudzi ane vha khou ita vhupombwe nao.+ Wonoyu u ḓo vha mulayo waṋu wa lini na lini kha mirafho yaṋu yoṱhe.”’
8 “U vha vhudze uri: ‘Muthu naho e ufhio wa Isiraele kana mutsinda naho e ufhio ane a dzula na iwe ane a ṋekedza tshifhiwa tsha u fhiswa kana tshiṱhavhelo,
9 a si tshi ḓise muṋangoni wa dennde ḽa muṱangano u itela u tshi ṋekedza Yehova u tea u vhulawa.+
10 “‘Arali muthu naho e ufhio wa Isiraele kana mutsinda naho e ufhio ane a dzula na inwi a ḽa malofha naho e afhio,+ a thi nga mu ṱanganedzi, ndi ḓo mu vhulaya.
11 Ngauri vhutshilo ha tshiṅwe na tshiṅwe tshi tshilaho vhu kha malofha,+ nṋe ndo laya uri malofha oṱhe a shululelwe kha aḽeṱare+ uri a vhe tshipfumelelo tsha vhutshilo haṋu, ngauri ndi malofha ane a ita tshipfumelelo+ nga nṱhani ha vhutshilo vhu re khao.
12 Ndi ngazwo ndo amba na Vhaisiraele uri: “Hu songo vha na ane a ḽa malofha, hu songo vha na mutsinda ane a dzula na inwi+ ane a ḽa malofha.”+
13 “‘Arali muṅwe wa Vhaisiraele kana muṅwe mutsinda ane a dzula na inwi a zwima, a fara phukha kana tshiṋoni tshine tsha nga ḽiwa, u tea u shulula malofha atsho,+ a a fukedze nga mavu.
14 Ngauri vhutshilo ha tshithu tshi tshilaho vhu kha malofha atsho. Ndi ngazwo ndo amba na Vhaisiraele nda ri: “A no ngo tea u ḽa malofha a tshithu na tshithihi ngauri vhutshilo ha tshithu tshi tshilaho vhu malofhani atsho. Ane a ḽa malofha u ḓo vhulawa.”+
15 Naho e nnyi, hu sa londwi uri ndi mudzulapo kana ndi mutsinda, a ḽa tshipuka tsho wanalaho tsho fa kana tsho ṱhukhukanywaho nga tshivhanda,+ a kuvhe zwiambaro zwawe, a ṱambe nga maḓi, a vhe wa tshika u swika ḽi tshi kovhela;+ ndi hone a tshi ḓo vha o kuna.
16 Fhedzi arali a sa zwi kuvha a si ṱambe, u ḓo ḓifhindulela kha vhukhakhi hawe.’”+
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
