Levitiko 2:1-16
-
Tshifhiwa tsha thoro (1-16)
2 “‘Arali muthu a ḓisa tshifhiwa tsha thoro+ kha Yehova, tshifhiwa tshawe tshi fanela u vha tsha fuḽauru tsekene, u shele mapfura khatsho u dovhe u shele na zwioro zwitshena khatsho.+
2 A tshi ise kha vharwa vha Aroni vhane vha vha vhotshifhe, tshifhe a dzhie fuḽauru tsekene yo ḓadzaho tshanḓa na mapfura atsho, zwioro zwoṱhe zwitshena, u ḓo zwi fhisa sa tshifhiwa tsha tshihumbudzi+ kha aḽeṱare, tshine tsha nukhelela kha Yehova.
3 Zwoṱhe zwo salaho kha tshifhiwa tsha thoro ndi zwa Aroni na vharwa vhawe,+ sa zwine zwa vha zwikhethwa-khethwa+ zwi bvaho kha zwifhiwa zwo fhiselwaho Yehova.
4 “‘Arali wa ḓisa tshifhiwa tsha thoro tsho bakwaho honndoni, tshi fanela u vha tsha fuḽauru tsekene, ḽofo* dzi si na mbiliso dzo ṱanganyiswaho na mapfura kana makokisi o ḓodzwaho mapfura.+
5 “‘Arali tshifhiwa tshau tshi tsha thoro tshi bvaho kha pani,+ tshi fanela u vha tsha fuḽauru tsekene, i si na mbiliso yo ṱanganyiswaho na mapfura.
6 Tshi fanela u ṅwatekanywa, u tshi shele mapfura.+ Ndi tshifhiwa tsha thoro.
7 “‘Arali tshifhiwa tshau tshi tsha thoro tsho bakiwa nga pani, tshi fanela u vha tsho bakiwa nga fuḽauru tsekene na mapfura.
8 U ḓise tshifhiwa tsha thoro tshe tsha itwa nga zwenezwi zwithu kha Yehova, tshi ḓo ṋewa tshifhe ane a ḓo tshi ḓisa tsini na aḽeṱare.
9 Tshifhe u fanela u ṱusa tshiṅwe tsha tshifhiwa tsha thoro uri tshi vhe tshifhiwa tsha tshihumbudzi,+ a tshi fhise aḽeṱareni, uri zwi vhe zwi nukhelelaho kha Yehova.+
10 Zwo salaho kha tshifhiwa tsha thoro ndi zwa Aroni na vharwa vhawe, sa zwine zwa vha zwikhethwa-khethwa zwi bvaho kha tshifhiwa tsho fhiselwaho Yehova.+
11 “‘Tshifhiwa tsha thoro tshine na ḓo tshi ṋekedza Yehova a tsho ngo fanela u shelwa mbiliso,+ ngauri a no ngo tea u fhisa suko ḽi re na mbiliso kana mutoli sa tshifhiwa tshi dubiselwaho Yehova.
12 “‘Ni nga zwi ṋekedza Yehova sa tshifhiwa tsha zwiranzhe,+ fhedzi a zwo ngo tea u ḓiswa aḽeṱareni uri tshi vhe tshifhiwa tshi nukhelelaho.
13 “‘Tshifhiwa tshiṅwe na tshiṅwe tsha thoro tshine wa tshi ṋekedza u tshi shele muṋo; u songo hangwa u shela muṋo wa mulanga wa Mudzimu wau kha tshifhiwa tsha thoro. U shele muṋo+ kha tshifhiwa tshiṅwe na tshiṅwe tshine wa ḓo tshi ḓisa.
14 “‘Arali wa ḓisa tshifhiwa tsha thoro tsha zwiranzhe kha Yehova, u ḓise thoro dzo vhibvaho dzine dza kha ḓi vha thethe, dzo hadzingwaho, thoro ntswa dzo ṱoholwaho, sa tshifhiwa tshau tsha thoro tsha zwiranzhe.+
15 U tshi shele mapfura na zwioro zwitshena. Ndi tshifhiwa tsha thoro.
16 Tshifhe u ḓo tshi dubisa sa tshifhiwa tsha tshihumbudzi,+ dzenedzo ndi dziṅwe dza thoro dzo ṱoholwaho na mapfura, u katela na zwioro zwazwo zwoṱhe zwitshena, sa tshifhiwa tshi fhiselwaho Yehova.
Ṱhaluso dzi re magumoni a siaṱari
^ Dzenedzi ḽofo dzo vha dzi na buli vhukati.
