Luimbo Lwa Salomo 3:1-11
3 “Vhusiku, ndi mmbeteni wanga,
Ndo ṱoḓa mufunwa wanga.+
Ndo mu ṱoḓa, fhedzi ndi si mu wane.+
2 Ndi ḓo vuwa nda mona-mona na muḓi;
Nda ya nḓilani na khoroni,
Nda ṱoḓa mufunwa wanga.
Ndo mu ṱoḓa, fhedzi ndi si mu wane.
3 Ndo waniwa nga vhalindi vhane vha mona-mona na muḓi,+ nda ri:
‘Mufunwa wanga no mu vhona ngafhi?’
4 Ndi tshi kha ḓi bva u vha fhira
Nda wana mufunwa wanga.
Nda mu nambatela, ndi si tende a tshi ṱuwa
U swika ndi tshi vhuya nae nḓuni ya mme anga,+
Nḓuni ya we a mbeba.
5 Inwi vhananyana vha Yerusalema, ndi a ni anisa,
Nga phala na nga ntsa dza ḓaka ndi ri:
Ni songo karusa kana u vusa lufuno kha nṋe u swika lu tshi vuwa nga lwoṱhe.”+
6 “Ndi mini itsho tshine tsha bva sogani tshine tsha fana na buluvhutsi,
Tshi nukhelelaho mira na zwioro zwitshena,
Tshi re na luphuse lu nukhelelaho lwa murengisi?”+
7 “Ndi sofa ḽa Salomo.
Ḽo tangiwaho nga vhanna vha maanḓa vha furathi,*
Vha bvaho kha vhanna vha maanḓa vha Isiraele,+
8 Vhoṱhe vho ḓiṱama nga mabanga,
Vhoṱhe vho gudiswa u lwa,
Muṅwe na muṅwe o kungela banga ḽawe kha khundu
Uri a ḓilinde kha zwi ofhisaho vhusiku.”
9 “Ndi khuluṋoni* ya Khosi Salomo
Ye a ḓiitela nga miri ya Libanoni.+
10 Milenzhe yayo yo vha yo itwa nga siḽiva,
Zwa u ḓitika zwanḓa zwo vha zwi zwa musuku.
Ha u dzula ho vha ho itwa nga wuḽu ya phephulu;
Nga ngomu ho vha ho khavhiswa zwavhuḓi
Nga vhananyana vha Yerusalema.”
11 “Inwi vhananyana vha Tsioni, ibvani
Ni vhone Khosi Salomo
O ambara khare ya munyanya ye mme awe+ a mu itela yone
Nga ḓuvha ḽawe ḽa mbingano,
Nga ḓuvha ḽe mbilu yawe ya vha yo takala.”
Ṱhaluso dzi re magumoni a siaṱari
^ Kana “60.”
^ Tshidulo tsho valeaho nga nṱha tshine tsha shumiswa u hwala muthu wa vhuimo ha nṱha.
