Luimbo Lwa Salomo 4:1-16
4 “Mufunwa wanga, wo naka.
Wo naka.
Naho maṱo au o tsirwa nga labi ḽau a nga a maivha.
Mavhudzi au a nga sambi ḽa mbudzi
Ḽi tshi tsa thavhani dza Giḽiada.+
2 Maṋo au a nga sambi ḽa nngu dzine dza kha ḓi bva u vheulwa
Dzi tshi bva u ṱanzwiwa,
Dzoṱhe dzo dzwala mafhaṱa,*
A hu na na nthihi ye ya fholodza.*
3 Mulomo wau u nga harane tswuku,
Zwine wa amba zwi a takadza.
Marama* au naho o tsirwa nga labi ḽau
A nga zwipiḓa zwa phomagraneithi.
4 Mutsinga wau+ u nga mutsheṱo wa Davida wa u ingamela,+
Wo fhaṱiwaho nga matombo o itaho muduba
We wa kungelwa zwiṱangu zwa tshigidi,
Zwiṱangu zwoṱhe zwa vhahali.+
5 Maḓamu au a nga ntsana mbili,
A nga a phala dza mafhaṱa,*+
Dzine dza fula vhukati ha maluvha a mavolenga.”*
6 “Musi hu tshi vho vhudzula lumuya, hu si tshee na murunzi,
Ndi ḓo ya thavhani i re na mira
Na tshikwarani tsha zwioro zwitshena.”+
7 “Wo naka nga maanḓa iwe mufunwa wanga,+
A u na tshine tsha solisea.
8 Kha ri bve Libanoni, muselwa wanga,
Kha ri bve Libanoni.+
Itsa ṱhodzini ya thavha ya Amana,
Ṱhodzini ya thavha ya Siniri, ṱhodzini ya thavha ya Herimoni,+
U bva mabakoni a ndau, u bva thavhani dza nngwe.
9 Wo tswa mbilu yanga,+ khaladzi anga, muselwa wanga,
Wo tswa mbilu yanga nga u tou ntsedza luthihi fhedzi,
Nga u tou vhona tshipiḓa tshithihi tsha vhulungu hau.
10 Lufuno lwau lu ntakadza lungafhani,+ khaladzi anga, muselwa wanga!
Lufuno lwau lu khwine vhukuma u fhira waini,+
Tshiḓolo tshau tshi nukhelela u fhira zwilungi* zwoṱhe.+
11 Muselwa wanga, milomo yau i rotha mutoli.+
Nga fhasi ha lulimi lwau hu na mutoli na mafhi,+
Zwiambaro zwau zwi nukhelela sa munukhelelo wa Libanoni.
12 Khaladzi anga, muselwa wanga, u nga tsimu yo valeaho,*
U nga tshisima tsho shatelwaho.
13 Zwi melaho kha iwe zwi nga tsimu ya miphomagraneithi
Ya mitshelo yavhuḓi, i re na zwimela zwi nukhelelaho khathihi na zwiṱaka zwa henna,
14 Zwimela zwi nukhelelaho zwavhuḓi+ na luvha ḽa safuroni, ṱhanga*+ na sinamoni,+
Na mifuda yoṱhe ya miri ya zwioro zwitshena, mira na zwikhopha,+
Khathihi na zwiḓolo zwoṱhe zwavhuḓi.+
15 U tshisima tshi sheledzaho tsimu, tshisima tsha maḓi avhuḓi,
Na milambwana i elelaho i tshi bva Libanoni.+
16 Iwe muya wa devhula, vuwa;
Iwe muya wa tshipembe, iḓa.
Vhudzula zwavhuḓi tsimuni yanga.
Munukhelelo wayo u phaḓalale.”
“Mufunwa wanga nga a ḓe tsimuni yawe
A ḽe mitshelo yayo yavhuḓisa.”
Ṱhaluso dzi re magumoni a siaṱari
^ Kana “malwelavanḓa.”
^ Kana “felwa.”
^ Kana “Khumba-khumbane.”
^ Kana “malwelavanḓa.”
^ Kana “ḽiḽi.”
^ Kana “zwipaisisi.”
^ Kana “vhielwaho.”
^ Luṱanga lu nukhelelaho zwavhuḓi.
