Luimbo Lwa Salomo 5:1-16
5 “Iwe khaladzi anga, iwe muselwa wanga,
Ndo dzhena tsimuni yanga.+
Nda ka mira yanga na zwilungi* zwanga.+
Nda ḽa tshigili tshanga tsha ṋotshi na mutoli wanga;
Nda nwa waini yanga na mafhi anga.”+
“Iḽani, inwi khonani dzanga dza tsini!
Inwani ni kambiwe nga lufuno!”+
2 “Ndo eḓela, fhedzi mbilu yanga yo fhaṱuwa.+
Nda pfa mufunwa wanga a tshi khou khokhonya!
A ri: ‘Mmvulele, iwe khaladzi anga, mufunwa wanga,
Ḽiivha ḽanga, muthu wanga a sa solisei!
Ngauri ṱhoho yanga yo ṋukala nga ṅwando,
Mavhudzi anga o ṋukala nga marotha a vhusiku.’+
3 Ndo no bvula tshiambaro tshanga.
Ndi nga dovha hani nda tshi ambara?
Ndo no ṱamba milenzhe yanga.
Ndi nga dovha hani nda i tswukadza?
4 Mufunwa wanga a humisa tshanḓa tshawe kha buli ḽa vothi,
A karusa maḓipfele anga.
5 Nda takuwa uri ndi vulele mufunwa wanga;
Zwanḓa zwanga zwo vha zwi tshi rotha mapfura a mira,
Na minwe yanga i tshi rotha mapfura a mira,
I tshi rothela kha mukungelo wa vothi.*
6 Nda vulela mufunwa wanga,
Fhedzi o vha o no rembuluwa, o ṱuwa.
Nda pfa ndi si tshee na fhulufhelo musi o ṱuwa.
Nda mu ṱoḓa, fhedzi ndi si mu wane.+
Nda mu vhidzelela, fhedzi a si aravhe.
7 Ndo waniwa nga vhalindi vhane vha mona-mona na muḓi.
Vha nthwa vha nkhuvhadza.
Vhalindi vha mitsheṱo vha ndzhiela sholo* yanga.
8 Inwi vhananyana vha Yerusalema, ndi a ni anisa, ndi ri:
Arali na wana mufunwa wanga,
Ni mu vhudze uri lufuno lu khou nndwadza.”
9 “Mufunwa wau u khwine u fhira vhaṅwe nga nḓila-ḓe,
Iwe wo nakaho u fhira vhafumakadzi vhoṱhe?
Mufunwa wau u khwine u fhira vhaṅwe nga nḓila-ḓe,
Musi u tshi ri anisa wonoyu muano?”
10 “Mufunwa wanga u na tshivhumbeo tshavhuḓi;
U fhira vha zwigidi zwa fumi.*
11 Ṱhoho yawe ndi ya musuku, une wa vha musuku vhukuma.
Mavhudzi awe a nga maṱari a mutshevho,
O swifhala sa funguvhu.
12 Maṱo awe a nga a maivha e tsini na milambwana,
A tshi khou ṱamba nga mafhi,
O dzula tsini na mativha o ḓalaho.
13 Marama awe a nga tshiraba tsha zwilungi,*+
Thulwi ya zwimela zwi nukhelelaho.
Milomo yawe ndi maluvha a mavolenga,* i rotha mapfura a mira.+
14 Zwanḓa zwawe ndi zwa musuku, wo vanganywaho na matombo a khirisoḽaithi.
Thumbu yawe ndi luṋanga lwa nḓou lu penyaho lwo nambatedzwaho matombo a safire.
15 Milenzhe yawe ndi phuphu dza mavhuḽu dzo imaho kha musuku vhukuma.
O naka sa shango ḽa Libanoni, o lapfa u nga miṱaululo.+
16 Mulomo wawe u ḓifha sa mutoli,
Zwoṱhe zwine a vha zwone zwi a tamisa.+
Hoyu ndi mufunwa wanga, inwi vhananyana vha Yerusalema.”
Ṱhaluso dzi re magumoni a siaṱari
^ Kana “zwipaisisi.”
^ Kana “kha tsha u vula vothi.”
^ Kana “labi.”
^ Kana “vha 10 000.”
^ Kana “zwipaisisi.”
^ Kana “ḽiḽi.”