Evangeli Ya Luka 13:1-35
-
Rembuluwani kana ni fheliswe (1-5)
-
Tshifanyiso tshi ambaho nga ha muri wa muhuyu u sa aṋwi (6-9)
-
Mufumakadzi o holefhalaho u a fhodzwa nga Savhatha (10-17)
-
Tshifanyiso tshi ambaho nga ha thoro ya luṋonya na mbiliso (18-21)
-
Ilwani nga nungo dzoṱhe uri ni dzhene nga muṋango muṱuku (22-30)
-
Herode ndi “phunguwe” (31-33)
-
Yesu u lilela Yerusalema (34, 35)
13 Vhaṅwe vhathu vha re henefho nga tshenetsho tshifhinga, vha vhudza Yesu nga ha Vhagalilea vhe Pilato a vha vhulaya musi vha tshi khou ṋekedza zwiṱhavhelo.
2 Yesu a ri: “Naa ni vhona u nga vhenevho Vhagalilea vho vhulawa ngauri vho vha vhe vhavhi u fhira Vhagalilea vhoṱhe?
3 Hai, ndi a ni vhudza ndi ri, arali na sa rembuluwa ni ḓo fheliswa u fana navho.+
4 Ni ri mini nga vhaḽa vhathu vha 18 vhe vha welwa nga mutsheṱo wa Silomu wa vha vhulaya? Naa ni vhona u nga vho vha vhe vhavhi u fhira vhathu vhoṱhe vha Yerusalema?
5 Hai, ndi a ni vhudza ndi ri, arali na sa rembuluwa ni ḓo fheliswa u fana navho.”
6 A kona u vha vhudza tshifanyiso a ri: “Muṅwe munna o vha e na muhuyu wo ṱavhiwaho tsimuni yawe ya minḓirivhe, a ya u ṱoḓa mahuyu, a wana u songo aṋwa.+
7 A amba na mushumi wawe a ri, ‘Ho no fhela miṅwaha miraru ndi tshi ḓa u ṱoḓa mahuyu kha wonoyu muhuyu, fhedzi ndi wana u songo aṋwa. U reme! Ndi ngani u tshi u litsha u tshi vhivha tsimu?’
8 Mushumi a ri, ‘Muṋe wanga, u litshe wonoyu ṅwaha ndi thome ndi bwe u mona nawo ndi u shele manyoro.
9 Arali wa aṋwa, zwi ḓo vha zwavhuḓi; fhedzi wa sa aṋwa, u u reme.’”+
10 Yesu o vha a tshi khou funza kha iṅwe sinagogo nga Savhatha.
11 Henefho ho vha hu na mufumakadzi we a fhedza miṅwaha ya 18 e na dimoni ḽe ḽa vha ḽi tshi ita uri a dzule o kwatama, a sa koni u onyolowa.
12 Yesu a tshi mu vhona a ri: “Vhulwadze hau ho fhola.”+
13 A mu vhea zwanḓa, mufumakadzi a onyolowa nga u ṱavhanya, a renda Mudzimu.
14 Fhedzi muhulwane wa sinagogo a sinyuwa ngauri Yesu o fhodza muthu nga Savhatha. Onoyo muhulwane a amba na gogo a ri: “Hu na maḓuvha a u shuma a rathi;+ iḓani ni fhodzwe nga eneo maḓuvha, hu si nga ḓuvha ḽa Savhatha.”+
15 Murena a ri: “Inwi vha re na muhoyo,+ naa a ni vhofhololi kholomo kana donngi yaṋu nga Savhatha uri i ye u nwa maḓi?+
16 Hoyu mufumakadzi ndi ṅwana wa Abrahamu, we a vha a tshi khou tambudzwa nga Saṱhane lwa miṅwaha ya 18, naa zwo khakhea u mu fhodza nga ḽeneḽi ḓuvha ḽa Savhatha?”
17 Musi o no amba zwenezwo zwithu, vhoṱhe vhane vha mu hanedza vha shona, fhedzi vhathu vhoṱhe vha takalela zwoṱhe zwe a zwi ita.+
18 Yesu a ri: “Muvhuso wa Mudzimu u fana na mini, ndi nga u vhambedza na mini?
19 U fana na thoro ya luṋonya ye muthu a i dzhia a i zwala tsimuni yawe, ya mela ya vha muri, zwiṋoni zwa ḓa zwa dzula matavhini awo.”+
20 A dovha a ri: “Muvhuso wa Mudzimu ndi nga u vhambedza na mini?
21 U nga mbiliso ine mufumakadzi a i suka na fuḽauru ya mielo mihulu* miraru, u swika fuḽauru yoṱhe i tshi kukumuwa.”+
22 Musi Yesu e nḓilani ya u ya Yerusalema, o tshimbila a tshi funza miḓini na miḓanani.
23 Muṅwe munna a amba nae a ri: “Murena, naa hu ḓo tshidzwa vhathu vha si gathi fhedzi?” Yesu a ri:
24 “Ilwani nga nungo dzoṱhe uri ni dzhene nga muṋango muṱuku,+ ngauri ndi a ni vhudza ndi ri, vhanzhi vha ḓo ṱoḓa u dzhena, fhedzi a vha nga koni.
25 Musi muṋe wa nnḓu o no vala vothi, ndi hone ni tshi ḓo ḓa na khokhonya na ri, ‘Murena, ri vulele.’+ Ene u ḓo ri: ‘A thi ni ḓivhi.’
26 Ndi hone ni tshi ḓo ri, ‘Ro ḽa ra nwa na iwe, wa funza na nḓilani dzashu.’+
27 Fhedzi ene u ḓo ri, ‘A thi ni ḓivhi. Nṱutsheleni inwi vhaitazwivhi!’
28 Henefho ndi hune na ḓo lila na u shenganya maṋo, musi ni tshi vhona Abrahamu, Isaka, Yakobo na vhaporofita vhoṱhe vhe Muvhusoni wa Mudzimu, fhedzi inwi no poselwa nnḓa.+
29 Zwiṅwe hafhu, vhathu vha ḓo ḓa vha ḽa zwiḽiwa Muvhusoni wa Mudzimu vha tshi bva vhubvaḓuvha, vhukovhela, devhula na tshipembe.
30 Vhaṅwe vha u fhedza vha ḓo vha vha u thoma, na vhaṅwe vha u thoma vha vha vha u fhedza.”+
31 Nga tshenetsho tshifhinga, vhaṅwe Vhafarisei vha ḓa khae vha ri: “Ṱuwa fhano, ngauri Herode u khou ṱoḓa u u vhulaya.”
32 Yesu a ri: “Tshimbilani ni vhudze heiḽa phunguwe ni ri, ‘Ndi khou pandela madimoni na u fhodza ṋamusi na matshelo, ndi ḓo fhedza mbamatshelo.’
33 Naho zwo ralo, ndi fanela u shuma ṋamusi na matshelo na mbamatshelo, ngauri muporofita a nga si vhulayelwe huṅwe fhethu nga nnḓa ha Yerusalema.+
34 Hee Yerusalema, iwe Yerusalema, iwe muvhulayi wa vhaporofita na ane a kanḓa nga matombo vho rumiwaho kha iwe,+ ndi kale ndi tshi ṱoḓa u kuvhanganya vhana vhau sa khuhu i tshi kuvhanganya zwikukwana zwayo fhasi ha phapha dzayo! Fhedzi iwe wa hana.+
35 Mudzimu o ṱutshela nnḓu yau.+ Ndi a u vhudza ndi ri, a u tsha ḓo dovha wa mmbona u bva zwino u swika u tshi ri: ‘Nga hu fhaṱutshedzwe a ḓaho nga dzina ḽa Yehova!’”*+
Ṱhaluso dzi re magumoni a siaṱari
^ Thevhedz., “mielo ya siha.” Siha nthihi i lingana na ḽithara dza 7,33. Sedzani Ṱhume. B14.
