Evangeli Ya Luka 15:1-32
15 Vhathelisi vhoṱhe na vhaitazwivhi vha kuvhanganela Yesu uri vha mu thetshelese.+
2 Vhafarisei na vhamaṅwalo vha thoma u gungula, vha ri: “Hoyu munna u konana na vhaitazwivhi na u ḽa navho.”
3 A vha vhudza tshiṅwe tshifanyiso a ri:
4 “Ndi nnyi ane a vha na nngu dza 100, ane a tshi xelelwa nga nthihi, a si sie dza 99 sogani, a ya a ṱoḓa yo xelaho u swika a tshi i wana?+
5 Musi o no i wana, a i vhea kha mahaḓa o takala.
6 Musi a tshi swika hayani, u kuvhanganya khonani dzawe na vhahura vhawe, a ri, ‘Takalani na nṋe, ngauri ndo wana nngu yanga ye ya vha yo xela.’+
7 Ndi a ni vhudza ndi ri, musi muitazwivhi muthihi a tshi rembuluwa u ḓo takalelwa ngei ṱaḓulu+ u fhira vha 99 vho lugaho vhane zwa si ṱoḓee uri vha rembuluwe.
8 “Kana ndi ufhio mufumakadzi a re na tshelede ya dirakima* dza fumi, ane musi o xedza dirakima* nthihi, a si funge luvhone a swiela nnḓu yawe, a sedza hoṱhe u swikela a tshi i wana?
9 Musi o no i wana, u kuvhanganya khonani dzawe* na vhahura, a ri, ‘Takalani na nṋe, ngauri ndo wana dirakima* ye ya vha yo xela.’
10 Ndi a ni vhudza ndi ri, na vharuṅwa vha Mudzimu vha a takala zwihulu musi muitazwivhi muthihi a tshi rembuluwa.”+
11 A dovha a ri: “Muṅwe munna o vha e na vharwa vhavhili.
12 Murathu a amba na khotsi awe a ri, ‘Khotsi anga, nkovhele thundu yanga.’ Khotsi a kovhela vharwa vhawe thundu.
13 Nga murahu ha maḓuvha a si gathi, murathu a kuvhanganya thundu yawe yoṱhe a ya shangoni ḽa kule, e henefho a phusukanya thundu yawe nga u tshila nga nḓila ya vhuhwarahwara.
14 Musi o no phusukanya thundu yawe yoṱhe, ha vha na nḓala khulu shangoni ḽeneḽo, a thoma u tambula.
15 A ya a tholiwa nga muṅwe wa vhadzulapo vha ḽeneḽo shango, we a mu rumela masimuni awe uri a ye u lisa nguluvhe.+
16 O vha a tshi tama na u ḽa zwiḽiwa zwa nguluvhe, fhedzi ho vha hu si na ane a mu ṋea zwa u ḽa.
17 “Musi a tshi vhona uri zwe a ita zwo khakhea, a ri, ‘Khotsi anga u na vhashumi vhanzhi vhane vha ḽa vha fura, ngeno nṋe ndi tshi khou fa nga nḓala.
18 Ndi ḓo ya kha khotsi anga, nda ri: “Khotsi anga, ndo tshinya phanḓa ha Mudzimu wa ṱaḓulu na phanḓa hau.
19 A thi tsha fanelea u vha ṅwana wau. Nnyite muṅwe wa vhashumi vhau.”’
20 A takuwa a ya kha khotsi awe. Musi khotsi awe a tshi mu vhona a tshi kha ḓi vha kule, a mu pfela vhuṱungu, a mu gidimela a mu kuvhatedza, a mu khisa.
21 Onoyo ṅwana a amba na khotsi awe a ri, ‘Khotsi anga, ndo tshinya phanḓa ha Mudzimu wa ṱaḓulu na phanḓa hau.+ A thi tsha fanelea u vha ṅwana wau.’
22 Fhedzi khotsi awe a amba na vhalanda vhawe a ri, ‘Ṱavhanyani ni ḓise zwiambaro zwavhuḓi ni mu ambadze, ni mu ambadze na rinngi tshanḓani na thovho.*
23 Ni ḓise na ṋamana yo nonaho, ni i ṱhavhe, ri ḽe ri pembele,
24 ngauri ṅwananga o vha o fa, zwino u khou tshila;+ o vha o xela, zwino o wanala.’ Vha thoma u ḓiphiṋa.
25 “Mukomana wawe o vha e tsimuni. Musi a tshi swika tsini na nnḓu, a pfa hu tshi khou imbiwa na u tshiniwa.
26 A vhidza muṅwe wa vhashumeli, a mu vhudzisa uri hu khou itea mini.
27 A mu fhindula a ri, ‘Murathu wau o vhuya o tsireledzea, ndi ngazwo khotsi au o mu ṱhavhela ṋamana yo nonaho.’
28 Mukomana a sinyuwa a hana na u dzhena nḓuni. Fhedzi khotsi awe a ya a amba nae.
29 Mukomana a amba na khotsi awe a ri, ‘Ndi kale ndi tshi khou u shumela, a thi athu u vhuya nda pfuka milayo yau, fhedzi a u athu u vhuya wa mpha na kubudzana zwakwo uri ndi takale na khonani dzanga.
30 Fhedzi musi ṅwana wau a tshi tou vhuya, wo mu ṱhavhela ṋamana yo nonaho, naho o phusukanya thundu yau na vhane vha rengisa muvhili.’
31 Khotsi a ri, ‘Ṅwananga, wo vha u na nṋe misi yoṱhe, zwoṱhe zwine zwa vha zwanga ndi zwau.
32 Fhedzi ri fanela u pembela na u takala, ngauri murathu wau o vha o fa, zwino u khou tshila, o vha o xela, zwino o wanala.’”
Ṱhaluso dzi re magumoni a siaṱari
^ Sedzani Ṱhume. B14.
^ Sedzani Ṱhume. B14.
^ Kana “khonani dzawe dza vhafumakadzi.”
^ Sedzani Ṱhume. B14.
^ Kana “phashane, navhula.”
