Evangeli Ya Luka 23:1-56
23 Vhoṱhe vha takuwa, vha mu isa kha Pilato.+
2 Vha mu pomoka+ vha ri: “Hoyu munna ro mu wana a tshi khou xedza lushaka lwashu, u thivhela vhathu uri vha si badele Kesare muthelo;+ u ri ndi ene Kristo ane a vha khosi.”+
3 Pilato a mu vhudzisa a ri: “Naa u Khosi ya Vhayuda?” Yesu a ri: “Ndi iwe ane a khou zwi amba.”+
4 Pilato a amba na vhahulwane vha vhotshifhe na gogo a ri: “Hoyu munna a thi mu vhoni mulandu.”+
5 Fhedzi vha khwaṱhisa kha ḽa uri: “Zwine a funza zwone vhathu kha ḽoṱhe ḽa Yudea, u bva ngei Galilea u swika na fhano, zwi ita uri vhathu vha vuse khakhathi.”
6 Pilato a tshi pfa zwenezwo, a vhudzisa arali Yesu o vha e Mugalilea.
7 Musi a tshi pfa uri Yesu u bva shangoni ḽa Herode,+ a mu rumela kha Herode, we a vha e Yerusalema nga tshenetsho tshifhinga.
8 Musi Herode a tshi vhona Yesu, a takala nga maanḓa. Ngauri ho vha hu kale a tshi ṱoḓa u mu vhona, ngauri o vha o pfa zwithu zwinzhi nga hae,+ o vha a tshi ṱoḓa u mu vhona a tshi ita vhuṱolo.
9 Nga zwenezwo, a vhudzisa Yesu mbudziso nnzhi, fhedzi a si mu fhindule.+
10 Naho zwo ralo, vhahulwane vha vhotshifhe na vhamaṅwalo vha sokou ima vha mu pomoka vho sinyuwa.
11 Herode na maswole awe vha mu fara nga nḓila i sumbedzaho lunyadzo,+ vha mu goḓa+ nga u mu ambadza tshiambaro tshavhuḓi vha mu humisela kha Pilato.
12 Herode na Pilato vha vha dzikhonani nga ḽeneḽo ḓuvha, ngauri vho vha vhe maswina musi zwenezwi zwi sa athu u itea.
13 Pilato a kuvhanganya vhahulwane vha vhotshifhe, vhavhusi na vhaṅwe vhathu,
14 a amba navho a ri: “No ḓisa hoyu munna kha nṋe ni tshi ri u khou ṱuṱuwedza vhathu uri vha lwe na muvhuso. Zwino ndo mu sengisa phanḓa haṋu, fhedzi a tho ngo mu vhona mulandu kha zwe na mu pomoka.+
15 Na Herode ho ngo mu vhona mulandu, ngauri o dovha a mu vhuisa kha riṋe, a hu na mulandu we a u ita une wa nga ita uri a vhulawe.
16 Ndi ḓo mu rwa+ nda mu vhofholola.”
17 * ——
18 Fhedzi gogo ḽoṱhe ḽa ṱavha mukosi ḽa ri: “Kha vhulawe, hu vhofhololwe Baraba!”+
19 (Onoyu munna o vha o valelwa dzhele ngauri o lwa na muvhuso na u vhulaya vhathu.)
20 Pilato a dovha a amba navho, ngauri o vha a tshi ṱoḓa u vhofholola Yesu.+
21 Vha ṱavha mukosi vha ri: “Kha ombelwe kha danda! Kha ombelwe kha danda!”*+
22 A amba navho lwa vhuraru a ri: “Ndi ngani? O tshinya mini? A tho ngo wana e na mulandu une wa nga ita uri a vhulawe; nga zwenezwo, ndi ḓo mu rwa nda mu vhofholola.”
23 Vha tou ṋaṋa u ṱavha mukosi, vha tshi ṱoḓa uri a ombelwe, lwe Pilato a vhuya a neta.+
24 Pilato a amba uri vha ṋewe zwine vha khou zwi ṱoḓa.
25 A vhofholola uḽa munna we vha mu humbela we a vha o valelwa dzhele nge a lwa na muvhuso na u vhulaya, fhedzi a vha kumedzela Yesu uri vha mu ite zwine vha funa.
26 Musi vha tshi khou ṱuwa nae, vha fara Simoni wa Kirene, we a vha a tshi khou bva tsimuni, vha mu hwalisa danda* ḽa Yesu uri a mu tevhele.+
27 O vha a tshi khou tevhelwa nga gogo na vhafumakadzi vho ṱungufhalaho vha tshi khou mu lilela.
28 Yesu a rembuluwa a amba na vhenevho vhafumakadzi a ri: “Inwi vhananyana vha Yerusalema, litshani u nndilela. Hone ḓilileleni ni lilele na vhana vhaṋu,+
29 ngauri hu ḓa maḓuvha ane vhathu vha ḓo ri, ‘Hu takala vhafumakadzi vha sa bebi na vha songo mamisaho!’+
30 Vha ḓo amba na thavha vha ri, ‘Ri tibeni!’ vha amba na zwikwara vha ri, ‘Ri weleni!’+
31 Ngauri arali vha tshi ita zwenezwi zwithu musi muri u tshee muṋu, hu ḓo itea mini musi wo no oma?”
32 Ho vha hu na vhanna vhavhili vha mavemu, vhane vha khou ya u vhulawa nae.+
33 Musi vha tshi swika fhethu hune ha pfi Dethele,+ vha mu ombela kha danda tsini na mavemu, ḽiṅwe ḽi kha tshanḓa tsha u ḽa, ḽiṅwe ḽi kha tsha monde.+
34 Fhedzi Yesu o vha a tshi khou ri: “Khotsi, vha hangwele, ngauri a vha ḓivhi zwine vha khou ita.” Zwiṅwe hafhu, vha kovhekana zwiambaro zwawe nga u ita madeṅwa.+
35 Vhathu vha ima vho mu lavhelesa. Fhedzi vhavhusi vha sinyuwa vha ri: “O tshidza vhaṅwe; mu litsheni a ḓitshidze arali e ene Kristo we a nangiwa nga Mudzimu.”+
36 Na maswole o vha a tshi khou mu goḓa, a tshi ḓa a tshi mu ṋea waini i dungaho,+
37 a tshi ri: “Arali u Khosi ya Vhayuda, ḓitshidze.”
38 Nga nṱha ha ṱhoho yawe ho vha ho ombelwa luṅwalo lune lwa ri: “Heyi ndi Khosi ya Vhayuda.”+
39 Fhedzi muṅwe wa mavemu we a vha o ombelwa henefho a mu sema+ a ri: “Naa a si iwe Kristo? Ḓitshidze, u tshidze na riṋe.”
40 Muṅwe a mu kaidza a ri: “Naa a u ofhi Mudzimu, huufha na iwe wo haṱulwa nga nḓila i fanaho?
41 Riṋe ro tewa nga u haṱulwa, ngauri ri khou wana zwo ri fanelaho nga nṱhani ha zwe ra ita; fhedzi hoyu munna a hu na tshe a tshinya.”
42 Ngauralo a ri: “Yesu, u nkhumbule musi u tshi dzhena Muvhusoni wau.”+
43 Yesu a amba nae a ri: “Ngoho ndi a u vhudza ṋamusi ndi ri, u ḓo vha na nṋe Pharadisoni.”+
44 Nga tshenetsho tshifhinga ho vha hu tshi vho ṱoḓou vha awara ya vhurathi,* fhedzi ha vha na swiswi ḽihulu kha ḽeneḽo shango, u swika nga awara ya vhuṱahe,*+
45 ngauri a ho ngo tsha vha na tshedza tsha ḓuvha; nga zwenezwo khetheni ḽe ḽa vha ḽi nḓuni khethwa+ ḽa kheruwa nga vhukati.+
46 Yesu a vhidzelela a ri: “Khotsi, ndi kumedzela vhutshilo hanga zwanḓani zwau.”+ Musi o no amba zwenezwo, a fa.+
47 Muhulwane wa maswole a tshi vhona zwe zwa itea, a renda Mudzimu a ri: “Ngangoho hoyu munna o vha o luga.”+
48 Musi vhathu vho kuvhanganaho henefho, vha tshi vhona zwithu zwe zwa itea, vha ṱuwa vha tshi khou ḓisola.
49 Vhoṱhe vha ḓivhaho Yesu vho vha vho ima kule. Na vhafumakadzi vhe vha bva nae Galilea, vho vha vhe henefho vha tshi khou vhona zwenezwi zwithu zwoṱhe.+
50 Ho vha hu na muṅwe munna ane a pfi Yosefa, muraḓo wa Khothe Khulwane ya Vhayuda, we a vha e munna muvhuya.+
51 (Onoyu munna ho ngo tikedza vhukwila havho na zwiito zwavho.) O vha a tshi bva Arimathia, muḓini wa Vhayuda, o vha o lindela Muvhuso wa Mudzimu.
52 Onoyo munna o ya kha Pilato a humbela tshitumbu tsha Yesu.
53 A tsitsa tshenetsho tshitumbu+ a tshi putela nga labi ḽavhuḓi ḽa ḽinene, a tshi vhulunga vhiḓani ḽe ḽa vha ḽo koriwa kha tombo,+ ḽe ha vha hu sa athu u vhulungelwa muthu khaḽo.
54 Ho vha hu ḓuvha ḽa u Lugiselela+ Savhatha. Savhatha+ yo vha i tsini na u thoma.
55 Fhedzi vhafumakadzi vhe vha bva nae Galilea, vha tevhela u itela u vhona vhiḓa na nḓila ye tshitumbu tsha vhulungwa ngayo,+
56 vha humela murahu u lugiselela mishonga na mapfura a nukhelelaho. Fhedzi, vha awela nga Savhatha+ vha tshi tevhedza mulayo.
Ṱhaluso dzi re magumoni a siaṱari
^ Kana “Kha vhulayelwe kha danda! Kha vhulayelwe kha danda!”
^ Sedzani Mutevhe Wa Ṱhalutshedzo Ya Maipfi.
^ Hu ṱoḓaho u vha nga 12 nga masiari.
^ Hu ṱoḓaho u vha nga 3 nga masiari.
