Evangeli Ya Luka 4:1-44
4 Yesu a ṱuwa Yorodane o ḓala muya mukhethwa, wa mu isa sogani.+
2 A fhedza maḓuvha a 40 a tshi khou lingwa nga Diabolo+ a sa ḽi tshithu. Musi eneo maḓuvha a tshi fhela, a farwa nga nḓala.
3 Diabolo a amba nae a ri: “Arali u murwa wa Mudzimu, amba na heḽi tombo ḽi shanduke ḽi vhe zwiḽiwa.”*
4 Yesu a ri: “Ho ṅwaliwa u pfi, ‘Muthu ha tshili nga zwiḽiwa* fhedzi.’”+
5 Diabolo a isa Yesu nṱha ha thavha, nga u ṱavhanya a mu sumbedza mivhuso yoṱhe ya ḽifhasi.+
6 Diabolo a amba nae a ri: “Ndi ḓo u ṋea maanḓa a u langa yeneyi mivhuso yoṱhe na vhugala hayo, ngauri yeneyi mivhuso ndi yanga,+ ndi ṋea ane nda funa.
7 Arali wa nthabela, zwoṱhe zwi ḓo vha zwau.”
8 Yesu a ri: “Ho ṅwaliwa u pfi, ‘U tea u rabela Yehova* Mudzimu wau, u shumele ene fhedzi.’”+
9 A mu isa Yerusalema, a mu imisa kha ṱhanga* ya thembele a amba nae a ri: “Arali u murwa wa Mudzimu, ḓipose fhasi,+
10 ngauri ho ṅwaliwa u pfi, ‘Mudzimu u ḓo vhudza vharuṅwa vhawe uri vha ḓe vha u tsireledze,
11 vha u takule nga zwanḓa zwavho, uri u si khukhulwe nga tombo.’”+
12 Yesu a ri: “Ho ṅwaliwa u pfi, ‘U songo linga Yehova* Mudzimu wau.’”+
13 Musi Diabolo o no fhedza u mu linga, a mu ṱutshela, a lindela tshiṅwe tshifhinga tsho teaho.+
14 Yesu a vhuyelela Galilea+ e na muya wa Mudzimu. Vhathu vha amba zwavhuḓi nga hae u mona na ḽeneḽo shango.
15 A funza sinagogoni dzavho, a tshi huliswa nga vhoṱhe.
16 A ya Nazaretha+ he a alutshela hone, a dzhena sinagogoni+ nga Savhatha sa nga misi, a ima uri a vhale.
17 Vha mu ṋea mupombo wa muporofita Yesaya, a u vula a wana he ha vha ho ṅwaliwa u pfi:
18 “Muya wa Yehova* u kha nṋe, ngauri o nḓodza uri ndi ḓivhadze vhashai mafhungo maḓifha. O nthuma uri ndi ye ndi huwelele kha vho thubiwaho uri vha ḓo vhofhololwa, vha sa vhoni vha ḓo vhona, na u vhofholola vho tsikeledzeaho,+
19 u itela u huwelela nga ha tshifhinga tsha Yehova* tshi ṱanganedzeaho.”+
20 A tshi tou fhedza, a peta mupombo, a u ṋea muḓinḓa a dzula fhasi; vhoṱhe vha re sinagogoni vho vha vho mu lavhelesa.
21 A amba navho a ri: “Ṋamusi ho itea zwo ṅwaliwaho kha luṅwalo lune na kha ḓi tou bva u lu pfa.”+
22 Vhoṱhe vha thoma u amba zwavhuḓi nga hae na u mangala maipfi a vhulenda e a vha a tshi a amba,+ vha ri: “Naa uyu a si murwa wa Yosefa?”+
23 A tshi pfa zwenezwo, a ri: “Ndi a zwi ḓivha uri ni ḓo mmbudza uri, ‘Dokotela ḓialafhe. Zwithu zwe ra pfa uri wo zwi ita Kapernaume,+ zwi ite na fhano muḓini wa hau.’”
24 A dovha a ri: “Ngoho ndi a ni vhudza uri, a hu na muporofita ane a ṱanganedzwa muḓini wa hawe.+
25 Ngoho ndi a ni vhudza uri: Ho vha hu na tshilikadzi nnzhi ngei Isiraele misini ya Elia musi ḽiṱaḓulu ḽo valea miṅwaha miraru na miṅwedzi ya rathi, ha vha na nḓala khulu kha ḽeneḽo shango.+
26 Fhedzi Elia o rumiwa kha tshilikadzi ya ngei Tsarepata shangoni ḽa Sidoni,+ hu si kha vhafumakadzi vha Isiraele.
27 Zwiṅwe hafhu, ho vha hu na vhanzhi vha re na mapele ngei Isiraele tshifhingani tsha muporofita Elisha; fhedzi a hu na we a fhodzwa nga nnḓa ha Naemani wa Musiria.”+
28 Vhoṱhe vhe vha pfa zwenezwo zwithu ngei sinagogoni vha sinyuwa.+
29 Vha takuwa vha mu sukumedzela nnḓa ha muḓi, vha mu isa luwani lwa thavha ye muḓi wavho wa fhaṱiwa khayo, vha tshi ṱoḓa u mu posa nga ṱhoho.
30 Fhedzi a ponyoka a shavha.+
31 A tsela Kapernaume, muḓini wa Galilea. A funza nga Savhatha,+
32 vha mangadzwa nga nḓila ye a vha a tshi funza ngayo,+ ngauri musi a tshi vha funza zwo vha zwi tshi pfala uri o ṋewa maanḓa.
33 Henefho sinagogoni ho vha hu na munna we a vha e na dimoni, a ṱavha mukosi+ a ri:
34 “Wo ḓela mini iwe Yesu wa Nazaretha?+ Naa wo ḓela u ri fhelisa? Ndi a zwi ḓivha uri u Mukhethwa wa Mudzimu.”+
35 Fhedzi Yesu a kaidza dimoni a ri: “Fhumula u bve khae.” Musi dimoni ḽo no mu wisela fhasi, ḽa bva khae ḽi songo mu huvhadza.
36 Vhathu vhoṱhe vha mangala, vha amba nga tshavho, vha ri: “Ndi mini izwi? Hoyu munna u na maanḓa a u pandela madimoni a bva.”
37 Vha amba nga hae u mona na ḽeneḽo shango ḽoṱhe.
38 A tshi bva sinagogoni, a ya muḓini wa Simoni. Mme a mufumakadzi wa Simoni o vha a tshi khou lwala zwihulu o farwa nga mukhushwane, vhafunziwa vha humbela Yesu uri a mu thuse.+
39 A ima tsini nae a mu fhodza. A vuwa nga u ṱavhanya a vha itela zwiḽiwa.
40 Musi ḽi tshi vho kovhela, vhoṱhe vha re na vhathu vha lwalaho malwadze o fhambanaho vha vha ḓisa khae. A vha fhodza nga u vha vhea zwanḓa.+
41 Madimoni o bva kha vhathu vhanzhi, a tshi ṱavha mukosi a tshi ri: “U Murwa wa Mudzimu.”+ Fhedzi a a kaidza, a si a tendele a tshi amba,+ ngauri o vha a tshi ḓivha uri ndi ene Kristo.+
42 Nga ḓuvha ḽi tevhelaho a ya fhethu hu re kule na miḓi.+ Fhedzi vhathu vha mu ṱoḓa, vha vhuya vha swika he a vha e hone, vha lingedza u mu thivhela uri a si ṱuwe.
43 A amba navho a ri: “Ndi fanela u ya u ḓivhadza mafhungo maḓifha a Muvhuso wa Mudzimu na kha miṅwe miḓi, ngauri ndo rumelwa zwone.”+
44 A ya a huwelela sinagogoni dza Yudea.
Ṱhaluso dzi re magumoni a siaṱari
^ Thevhedz., “vhurotho.”
^ Thevhedz., “vhurotho.”
^ Kana “fhethu hu re nṱhesa.”
