Evangeli Ya Luka 5:1-39
5 Ḽiṅwe ḓuvha musi gogo ḽo thetshelesa Yesu a tshi khou funza ipfi ḽa Mudzimu, tsini na dzivha ḽa Genetsareta,*+ ḽa thoma u mu kwanyeledza.
2 A vhona zwikepe zwivhili zwo ima khunzi-khunzini ya dzivha, fhedzi vharei vha khovhe vho vha vho tsa khazwo vha tshi khou ṱanzwa mambule avho.+
3 A ṋamela tshiṅwe tshikepe tshe tsha vha tshi tsha Simoni, a mu humbela uri a tshi sendedzele kule na khunzi-khunzi. A dzula tshikepeni a thoma u funza gogo.
4 Musi o no fhedza u funza, a amba na Simoni a ri: “Isani tshikepe hu re na tivha, ni ṱharamudze mambule aṋu uri ni kone u fasha.”
5 Simoni a fhindula a ri: “Mufunzi, ro rea khovhe vhusiku hoṱhe ri si fashe tshithu,+ fhedzi ri ḓo ṱharamudza mambule samusi wo amba.”
6 Musi vha tshi ita zwenezwo, vha fasha khovhe nnzhi. Mambule avho a thoma u kheruwa.+
7 Vha vhidza vhashumisani navho vha re kha tshiṅwe tshikepe uri vha ḓe vha vha thuse, musi vha tshi swika, vha ḓadza izwo zwikepe vhuvhili hazwo, zwa thoma u ṋupela.
8 Simoni Petro a tshi vhona zwenezwi, a gwadama phanḓa ha Yesu a ri: “Murena, a thi fanelei u vha tsini hau, ngauri ndi muitazwivhi.”
9 Ngauri ene na vhe a vha e navho vho mangadzwa nga khovhe dze vha dzi fasha,
10 zwa mangadza na Yakobo na Yohane vharwa vha Sebedeo,+ vhane vha shumisana na Simoni. Fhedzi Yesu a amba na Simoni a ri: “U songo ofha. U bva zwino u ḓo vha murei wa vhathu.”+
11 Vha vhuisela zwikepe khunzi-khunzini, vha ṱutshela zwithu zwoṱhe vha mu tevhela.+
12 Ḽiṅwe ḓuvha musi e kha muṅwe muḓi, ha ḓa muṅwe munna we a vha o ḓala mapele! Musi a tshi vhona Yesu, a gwadama a mu humbela a ri: “Murena, arali u tshi funa, u nga mphodza.”+
13 Yesu a isa tshanḓa a mu kwama, a ri: “Ndi a funa, fhola.” Mapele a fhola nga u ṱavhanya.+
14 A vhudza onoyo munna uri a songo vhudza muthu, a ri: “Tshimbila u ye kha tshifhe a u vhone, u ṋekedze tshifhiwa tshe Mushe a ri tshi ṋekedzwe+ u itela u sumbedza uri wo kuna.”+
15 Vhathu vha amba nga ha Yesu hoṱhe, vhathu vhanzhi vha ḓa uri vha mu thetshelese na uri vha fhodzwe.+
16 Fhedzi o vha a tshi ya fhethu hu re kule na miḓi uri a rabele.
17 Ḽiṅwe ḓuvha musi a tshi khou funza, Vhafarisei na vhafunzi vha Mulayo vha bvaho miḓanani yoṱhe ya Galilea, Yudea na Yerusalema vho vha vho dzula henefho; Yehova* o mu ṋea maanḓa a u fhodza.+
18 Ho vha hu na vhanna vho hwalaho munna o omaho lurumbu o lala kha vhulalo, vha tshi ṱoḓa nḓila ya u mu isa kha Yesu.+
19 Nge vha vha vha sa koni u mu isa he Yesu a vha e hone ngauri ho vha ho ḓala, vha ṋamela ṱhanga, vha i phula buli vha tsitsa vhulalo hawe, vha vhu vhea tsini na vhathu vha re phanḓa ha Yesu.
20 Musi a tshi vhona uri vha na lutendo, a ri: “Wo hangwelwa zwivhi.”+
21 Vhamaṅwalo na Vhafarisei vha elekanya vha ri: “Ndi nnyi onoyu ane a semana? Ndi Mudzimu fhedzi ane a hangwela zwivhi.”+
22 Nge Yesu a vha a tshi ḓivha zwine vha khou zwi humbula, a vha fhindula a ri: “Ndi ngani ni tshi khou humbula zwithu zwo raliho?
23 Ndi zwifhio zwo leluwaho, naa ndi uri, ‘Wo hangwelwa zwivhi,’ kana ndi uri, ‘Takuwa u tshimbile’?
24 Fhedzi uri ni ḓivhe uri Murwa muthu u na maanḓa a u hangwela zwivhi kha ḽifhasi—” a amba na onoyo munna a ri: “Ndi a u vhudza uri, takuwa u hwale vhulalo hau, u ye hayani.”+
25 Nga u ṱavhanya a takuwa vha tshi zwi vhona, a hwala vhulalo a ya hayani, a tshi khou renda Mudzimu.
26 Vhathu vhoṱhe vha mangala, vha renda Mudzimu, vha tshuwa vha ri: “Ṋamusi ro vhona zwithu zwi mangadzaho.”
27 Nga murahu ha zwenezwi, a ṱuwa, a vhona muthelisi ane a pfi Levi o dzula ofisini ya vhathelisi, a amba nae a ri: “Ntevhele.”+
28 A sia zwithu zwoṱhe, a takuwa a mu tevhela.
29 Levi a itela Yesu tshimima tshihulu nḓuni yawe, ho vha hu na vhathelisi vhanzhi na vhaṅwe vho dzulaho navho vha tshi khou ḽa.+
30 Vhafarisei na vhamaṅwalo vha tshi vhona zwenezwo, vha gungulela vhafunziwa vhawe vha ri: “Ndi ngani ni tshi ḽa na u nwa na vhathelisi na vhaitazwivhi?”+
31 Yesu a ri: “Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho.+
32 Ndo ḓela u vhidza vhaitazwivhi, hu si vho lugaho.”+
33 Vha amba nae vha ri: “Vhafunziwa vha Yohane vha a ḓidzima zwiḽiwa tshifhinga tshoṱhe na u rabela, na vhafunziwa vha Vhafarisei vha ita zwi fanaho, fhedzi vhau vha a ḽa na u nwa.”+
34 Yesu a amba navho a ri: “Naa ni nga ita uri khonani dza mukwasha dzi ḓidzime zwiḽiwa musi mukwasha a tshi kha ḓi vha navho?
35 Hu khou ḓa maḓuvha ane vha ḓo dzhielwa mukwasha;+ ndi hone vha tshi ḓo ḓidzima nga eneo maḓuvha.”+
36 A vha vhudza tshiṅwe tshifanyiso a ri: “A hu na ane a nga kherula labi kha tshiambaro tshiswa a ḽi rungelela kha tshiambaro tsha kale. Arali a ita zwenezwo, labi ḽiswa ḽi a kheruwa ngauri a ḽi fani na tshiambaro tsha kale.+
37 Zwiṅwe hafhu, a hu na ane a nga shela waini ntswa kha zwikumbu zwa kale zwa mukumba.* Arali a ita zwenezwo, zwi ḓo phamuwa waini ya tevhuwa, zwikumbu zwa tshinyala.
38 Fhedzi waini ntswa i shelwa kha zwikumbu zwiswa.
39 A hu na ane a ṱoḓa u nwa waini ntswa arali o no nwa ya kale, ngauri u ri, ‘Ya kale i a ḓifha.’”
Ṱhaluso dzi re magumoni a siaṱari
^ Ndi Lwanzhe lwa Galilea.
^ Sedzani “Zwikumbu zwa mukumba” kha Mutevhe Wa Ṱhalutshedzo Ya Maipfi.
