Evangeli Ya Marko 13:1-37
13 Musi a tshi bva thembeleni, muṅwe wa vhafunziwa vhawe a amba nae a ri: “Mufunzi, vhona uri aya matombo na hezwi zwifhaṱo zwo naka hani!”+
2 Fhedzi Yesu a ri: “Naa u khou zwi vhona izwi zwifhaṱo zwihulu? A hu na tombo ḽine ḽa ḓo sala nṱha ha ḽiṅwe, oṱhe a ḓo wiselwa fhasi.”+
3 Musi Yesu o dzula Thavhani ya Miṱwari o lavhelesa thembele, Petro, Yakobo, Yohane na Andrea vha mu vhudzisa vhe nga tshavho, vha ri:
4 “Ri vhudze uri izwi zwithu zwi ḓo itea lini, na uri tshiga tshi ḓo vha tshifhio tsha uri zwenezwi zwoṱhe zwi tsini na u fhela?”+
5 Yesu a ri: “Ni ṱhogomele uri hu si vhe na ane a ni xedza.+
6 Vhanzhi vha ḓo ḓa nga dzina ḽanga, vha ri, ‘Ndi nṋe,’ vha xedza vhanzhi.
7 Zwiṅwe hafhu, musi ni tshi pfa nga ha dzinndwa na nga ha mivhigo ya dzinndwa; ni songo tshuwa; zwenezwi zwithu zwi fanela u itea, fhedzi vhufhelo a vhu athu u swika.+
8 “Lushaka lu ḓo lwa na luṅwe lushaka na muvhuso wa lwa na muṅwe muvhuso;+ hu ḓo vha na midzinginyo fhethu hunzhi; ha vha na nḓala.+ Zwenezwi ndi u thoma ha maṱungu.*+
9 “Ni dzule no fhaṱuwa. Vhathu vha ḓo ni isa khothe,+ na rwiwa sinagogoni,+ na imiswa phanḓa ha vhavhusi na mahosi ngauri ni vhatevheli vhanga, uri ni kone u ṱanziela khavho.+
10 Zwiṅwe hafhu, mafhungo maḓifha a ḓo thoma a ḓivhadzwa kha tshaka dzoṱhe.+
11 Musi vha tshi ni fara uri vha ni ise khothe, ni songo vhilaela nga zwine na ḓo zwi amba, fhedzi ni ambe zwine na ḓo vhudzwa nga tshenetsho tshifhinga, ngauri a si inwi ni ambaho, fhedzi ndi muya mukhethwa.+
12 Zwiṅwe hafhu, mukomana u ḓo vhulayisa murathu, khotsi a vhulayisa ṅwana, vhana vha ḓo lwa na vhabebi vha vha vhulayisa.+
13 Ni ḓo vhengiwa nga vhathu vhoṱhe nga nṱhani ha dzina ḽanga.+ Fhedzi we a konḓelela* u swika vhufheloni+ u ḓo tshidzwa.+
14 “Naho zwo ralo, musi ni tshi vhona tshithu tshi nengisaho tshine tsha tshinyadza,+ tshi fhethu hu songo teaho (muvhali nga a shumise ṱhalukanyo), a re Yudea a shavhele thavhani.+
15 A re kha ṱhanga a songo tsa kana a dzhena nḓuni uri a dzhie tshiṅwe tshithu tshi re nḓuni yawe;
16 a re tsimuni a songo tsha humela kha zwithu zwi re murahu uri a dzhie tshiambaro tshawe.
17 Khombo kha vho vhifhaho muvhilini na vha mamisaho misini yeneyo!+
18 Dzulani ni tshi rabela uri zwi si itee vhuria;
19 ngauri misini yeneyo hu ḓo vha na maṱungu+ a sa athu u vhuya a vha hone u bva mathomoni a tsiko ya Mudzimu, u swika nga tshenetsho tshifhinga, ha tsha ḓo dovha a vha hone.+
20 Zwi re zwone ndi uri arali Yehova* a sa fhungudza eneo maḓuvha, a hu na ane a ḓo tshidzwa. Fhedzi u ḓo fhungudza eneo maḓuvha a tshi itela vhe a vha nanga.+
21 “Arali muthu a amba na inwi a ri, ‘Vhonani! Kristo khoyu,’ kana, ‘Vhonani! Khouḽaa,’ ni songo zwi tenda.+
22 Ngauri hu ḓo vha na Vhokristo vha mazwifhi na vhaporofita vha mazwifhi,+ vha ḓo ita zwiga na zwithu zwi mangadzaho uri vha xedze vho nangiwaho arali zwi tshi konadzea.
23 Ngauralo, fhaṱuwani.+ Ndo ni vhudza zwithu zwoṱhe hu tshee nga phanḓa.
24 “Fhedzi misini yeneyo musi eneo maṱungu o no fhira, ḓuvha ḽi ḓo swifhala, ṅwedzi u si tsha vhonetshela,+
25 ṋaledzi dza wa dzi tshi bva ṱaḓulu, ḽiṱaḓulu ḽa dzinginyea.
26 Ndi hone vha tshi ḓo vhona Murwa muthu+ a tshi ḓa e kha makole e na maanḓa mahulu na vhugala.+
27 U ḓo ruma vharuṅwa uri vha kuvhanganye vhanangiwa vhawe vha bvaho thungo dzoṱhe, u bva magumoni a ḽifhasi u swika magumoni a ḽiṱaḓulu.+
28 “Gudani kha muhuyu. Musi hu tshi bva luṅwe lutavhi, maṱari a a mela, na kona u zwi ḓivha uri tshilimo tshi tsini.+
29 Na inwi ni tshi vhona zwenezwi zwithu, ni zwi ḓivhe uri u tsini, u muṋangoni.+
30 Ngoho ndi a ni vhudza ndi ri, hoyu murafho u nga si lovhe hezwi zwithu zwoṱhe zwi sa athu u itea.+
31 Ḽiṱaḓulu na ḽifhasi zwi ḓo lovha,+ fhedzi maipfi anga ha nga lovhi.+
32 “A hu na ane a ḓivha ḽeneḽo ḓuvha kana tshifhinga, na vharuṅwa vha re ṱaḓulu na Murwa a vha zwi ḓivhi, fhedzi zwi ḓivhiwa nga Khotsi.+
33 Dzulani no fhaṱuwa+ ngauri a ni ḓivhi uri tshifhinga tsho vhewaho tshi lini.+
34 Zwi fana na muthu ane a khou fara lwendo lwa u ya shangoni ḽa kule ane a sia nnḓu yawe, o ṋea vhalanda vhawe maanḓa,+ muṅwe na muṅwe o mu ṋea mushumo wawe, a laya mulindi wa muṋango uri a dzule o fhaṱuwa.+
35 Ngauralo, dzulani no fhaṱuwa, ngauri a ni ḓivhi arali muṋe wa nnḓu a tshi ḓo vhuya+ nga madekwana kana vhukati ha vhusiku kana ḽi sa athu u tsha.*+
36 Arali na sa fhaṱuwa, u ḓo ni wana no eḓela musi a tshi vhuya ni songo zwi lavhelela.+
37 Fhedzi zwine nda ni vhudza, ndi vhudza vhoṱhe uri: Dzulani no fhaṱuwa.”+
Ṱhaluso dzi re magumoni a siaṱari
^ Thevhedz., “vhuṱungu ha u beba.”
^ Kana “ane a konḓelela.”
^ Thevhedz., “musi mukukulume u tshi lila.”
