Mika 1:1-16
1 Yehova o vhudza Mika*+ wa Moresethe kha bono nga ha zwe zwa vha zwi tshi ḓo itea Samaria na Yerusalema, misini ya Yothamu,+ Ahasi+ na Hiskia+ vhane vha vha mahosi a Yuda,+ a ri:
2 “Ipfani inwi vhathu vhoṱhe!
Thetshelesani inwi ḽifhasi na zwi re khaḽo,Yehova u thembeleni yawe khethwa.
Yehova Murena Muvhusahoṱhe nga a ni haṱule.+
3 Yehova u khou bva vhudzuloni hawe;U ḓo tsela kha ḽifhasi a tshimbila nṱha ha thavha.
4 Thavha dzi ḓo ṋoka nga fhasi ha milenzhe yawe,+Magovha a ḓo fhanduwaU fana na phula* i tshi ṋoka muliloni,U fana na maḓi a tshi shuluwa tshivhangani.
5 Zwenezwi zwoṱhe zwi khou itiswa nga vhushandukwa ha Yakobo,Nga nṱhani ha zwivhi zwa vha nnḓu ya Isiraele.+
Ndi nnyi we a ṱuṱuwedza Yakobo uri a vhe ḽishandukwa?
Naa a si Samaria?+
Ndi nnyi we a ita uri hu vhe na fhethu ha vhurabeli ngei Yuda?+
Naa a si Yerusalema?
6 Ndi ḓo ita uri Samaria a vhe fhethu ho tshinyadzwaho,Fhethu hune ha ṱavhiwa minḓirivhe;Ndi ḓo posa matombo awe govhani,Nda ita uri mitheo yawe i sale i khagala.
7 Zwifanyiso zwawe zwoṱhe zwo vhaḓiwaho zwi ḓo kwashekanywa,+Hu ḓo fhiswa zwoṱhe zwe a zwi wana nga u rengisa hawe muvhili.+
Ndi ḓo fhelisa midzimu yawe yoṱhe ya zwifanyiso.
Samaria o wana zwenezwi zwoṱhe nga tshelede ye a i wana nga u rengisa hawe muvhili,Zwenezwi zwoṱhe zwi ḓo dzhiiwa zwa shumiswa u badela vhaṅwe vhane vha rengisa muvhili.”
8 Zwenezwi zwi ḓo ita uri ndi lile na u ṱavha mukosi;+Ndi ḓo tshimbila ndi fhedzi, ndi songo ambara zwienda.+
Ndi ḓo lila sa phunguwe,Nda ṱungufhala sa mphwe.
9 Ngauri tshilonda tshawe a tshi fholi;+Tsho pfukela na ngei Yuda.+
Tsha swika na khoroni ya vhathu vhanga ngei Yerusalema.+
10 “Ni songo zwi ḓivhadza ngei Gathi;Ni songo lila na luthihi.
Inwi vha dzulaho Bethe-afura,* vhumbuluwani buseni.
11 Inwi vha dzulaho Shafira, fhirani ni na ṱhoni, ni fhedzi.
Vha dzulaho Tsanani a vho ngo bvela nnḓa.
Bethetsele ho vha hu fhethu hune na dzumbama hone, fhedzi hu ḓo vha fhethu hune ha liliwa hone.
12 Ngauri vha dzulaho Marothe vho lindela zwivhuya,Fhedzi Yehova o ḓisa zwithu zwivhi khoroni ya Yerusalema.
13 Inwi vha dzulaho Laxisi,+ panani bere kha gariki.
Ndi inwi no itisaho ṅwananyana wa Tsioni tshivhi,Ndi inwi we na ita uri Isiraele a vhe ḽishandukwa.+
14 Ni ḓo ṋea Moresethe-gathi zwifhiwa zwa u mu onesa.
Nnḓu dza Akhatsibi+ dzo vha dzi dza vhufhura kha mahosi a Isiraele.
15 Inwi vha dzulaho Maresha,+ ndi ḓo ni ḓisela mukundi.+
Vhugala ha Isiraele vhu ḓo swika na Adulamu.+
16 Vheulani mavhudzi ngauri vhana vhaṋu vha ḓo welwa nga khombo.
Ni ḓi vheule ni nge goni,Ngauri vhana vhaṋu vho iswa vhuthubwani.”+
Ṱhaluso dzi re magumoni a siaṱari
^ Ḽo fhelela ndi Mikaele kana Mikaya, zwine zwa amba uri “Ndi Nnyi Ane A Fana Na Yehova?”
^ Zwi vhonala uri phula yo vha i tshi itwa nga mazhana a ṋotshi ngauri a a ṱavhanya u ṋoka.
^ Kana “nḓuni ya Afura.”
