Mishumo Ya Vhaapostola 11:1-30
11 Vhaapostola na vhatendi* vha Yudea vha pfa uri vhathu vha dzitshaka vho ṱanganedza ipfi ḽa Mudzimu.
2 Musi Petro a tshi ya Yerusalema, vhane vha tikedza zwa u fumba+ vha mu sasaladza,*
3 vha ri: “Wo ya nḓuni ya vhanna vha songo fumbaho, wa ḽa navho.”
4 Ndi hone Petro a tshi vha ṱalutshedza nga vhuḓalo, a ri:
5 “Ndo vha ndi muḓini wa Yope ndi tshi khou rabela, nda vhona bono. Nda vhona hu tshi tsa tshithu tshi ngaho labi ḽihulu tsho farwa thungo dzoṱhe nṋa tshi tshi bva ṱaḓulu, tsha ḓa kha nṋe.+
6 Musi ndi tshi lavhelesa, nda vhona hu na zwipuka zwi re na milenzhe miṋa, zwivhanda, zwikokovhi na zwiṋoni.
7 Nda pfa na ipfi ḽi tshi ri: ‘Petro, takuwa u ṱhavhe u ḽe!’
8 Nṋe nda ri: ‘Na khathihi Murena, ngauri a thi athu u ḽa tshithu tshi songo kunaho kana tshi re na tshika.’
9 Ha pfala ipfi lwa vhuvhili ḽi bvaho ṱaḓulu ḽi tshi ri: ‘Litsha uri zwithu zwo kunakiswaho nga Mudzimu zwi na tshika.’
10 Ha pfala ipfi lwa vhuraru, zwithu zwoṱhe zwa humiselwa ṱaḓulu.
11 Nga tshenetsho tshifhinga ha swika vhanna vhararu nḓuni ye ra vha ri khayo, vho rumiwa kha nṋe vha tshi bva Kesarea.+
12 Muya mukhethwa wa mmbudza uri ndi ṱuwe navho, ndi songo timatima. Vhenevha vhahashu vha rathi vho ṱuwa na nṋe, ra dzhena nḓuni ya onoyo munna.
13 “O ri vhudza nga ha musi a tshi vhona muruṅwa o ima nḓuni yawe, a tshi ri: ‘Ruma vhanna ngei Yope uri vha ye u vhidza Simoni ane a pfi Petro,+
14 u ḓo u vhudza zwithu zwine zwa ḓo ita uri iwe na vha muṱa wau woṱhe ni tshidzwe.’
15 Musi ndi tshi thoma u amba, vha wana muya mukhethwa nga nḓila ye ra u wana ngayo mathomoni.+
16 Zwenezwo zwa ita uri ndi humbule zwe Murena a vha a tshi zwi amba, a tshi ri: ‘Yohane o lovhedza nga maḓi,+ fhedzi inwi ni ḓo lovhedzwa nga muya mukhethwa.’+
17 Arali Mudzimu o vha ṋea tshifhiwa tshi fanaho na tshe a ṋea riṋe musi ri tshi tenda Murena Yesu Kristo, nṋe ndi nnyi ane nda nga thivhela Mudzimu u ita zwine a funa?”*+
18 Musi vha tshi pfa zwenezwo, vha si tsha hanedza Petro,* vha renda Mudzimu vha ri: “Mudzimu o tendela vha dzitshaka uri vha rembuluwe uri vha wane vhutshilo.”+
19 Vhe vha balangana+ tshifhingani tsha u tovholwa nga murahu ha lufu lwa Stefano, vha tshimbila vha swika Fenikia, Kipiro na Antiokia. Vha ḓivhadza mafhungo maḓifha kha Vhayuda fhedzi.+
20 Naho zwo ralo, vhaṅwe vhavho vha bvaho Kipiro na Kirene vha ḓa Antiokia, vha ḓivhadza mafhungo maḓifha a Murena Yesu kha vhathu vha ambaho Tshigerika.
21 Zwiṅwe hafhu, Yehova* o vha a tshi khou vha tikedza, vhathu vhanzhi vha vha vhatendi, vha rembulutshela kha Murena.+
22 Mafhungo avho a pfala tshivhidzoni tsha Yerusalema, vha ruma Baranaba+ uri a ye Antiokia.
23 Musi a tshi swika a vhona vhuthu vhuhulu ha Mudzimu, a takala, a vha ṱuṱuwedza vhoṱhe uri vha dzule vha tshi thetshelesa Murena nga mbilu yoṱhe;+
24 ngauri o vha o luga, o ḓala muya mukhethwa na lutendo. Vhathu vhanzhi vha tenda Murena.+
25 A ya Tariso u ṱoḓa Saulo.+
26 Musi o no mu wana, a mu isa Antiokia. Vha fhedza ṅwaha woṱhe vha tshi kuvhangana na tshivhidzo, vha tshi funza vhathu vhanzhi. Ndi henefho Antiokia he Mudzimu a livhisa vhafunziwa uri vha vhidzwe Vhakriste.+
27 Misini yeneyo, vhaporofita+ vha bvaho Yerusalema vha ḓa Antiokia.
28 Muṅwe wavho we a vha a tshi pfi Agabo,+ a amba a tshi thuswa nga muya mukhethwa uri hu ḓo vha na nḓala khulu ḽifhasini ḽoṱhe,+ yeneyo nḓala yo vha hone misini ya Klaudio.
29 Vhafunziwa vhoṱhe vha ḓiimisela u thusa+ vhatendi vha dzulaho ngei Yudea nga zwine vha vha nazwo;+
30 vha ruma Baranaba na Saulo+ uri vha zwi ise kha vhahulwane.
Ṱhaluso dzi re magumoni a siaṱari
^ Thevhedz., “vhahavho.”
^ Kana “vha lwa nae.”
^ Kana “nda nga ima phanḓa ha Mudzimu?”
^ Thevhedz., “vha fhumula.”
