Mishumo Ya Vhaapostola 18:1-28
18 Nga murahu ha zwenezwo, Paulo a ṱuwa Athene a ya Korinta.
2 A wana muṅwe Muyuda ane a pfi Akwila,+ o bebelwaho ngei Ponto, we a vha a tshi kha ḓi bva u swika a tshi bva kha ḽa Italia e na Prisila mufumakadzi wawe, ngauri Klaudio o vhudza Vhayuda vhoṱhe uri vha pfuluwe Roma. A ya khavho
3 a dzula navho na u shuma navho, ngauri o vha a tshi shuma mushumo+ u fanaho na wavho wa u runga madennde.
4 O vha a tshi funza* nga savhatha+ iṅwe na iṅwe sinagogoni,+ a tshi ṱuṱuwedza Vhayuda na Vhagerika uri vha tende.
5 Musi Silasi+ na Timotheo+ vha tshi ḓa vha tshi bva Makedonia, Paulo a farekanea vhukuma nga u huwelela ipfi ḽa Mudzimu, a tshi sumbedza Vhayuda uri Yesu ndi Kristo.+
6 Fhedzi musi vho no mu hanedza na u mu sema, a fhufhura buse ḽi re kha zwiambaro+ zwawe a ri: “Malofha aṋu nga a vhe kha ṱhoho dzaṋu.+ Nṋe a thi na mulandu.+ U bva zwino ndi ḓo ya kha vhathu vha dzitshaka.”+
7 A ṱuwa henefho* a ya nḓuni ya munna ane a pfi Titiosi Yusto, a gwadamelaho Mudzimu, we nnḓu yawe ya vha i tsini na sinagogo.
8 Krisipo,+ muhulwane wa sinagogo, a tenda Murena na vha muṱa wawe woṱhe. Na Vhakorinta vhanzhi vhe vha thetshelesa vha tenda vha lovhedzwa.
9 Paulo a vhona bono vhusiku a pfa Murena a tshi ri: “U songo ofha, bvela phanḓa u tshi amba, u songo fhumula,
10 ngauri ndi na iwe,+ a hu na ane a ḓo u huvhadza; ngauri ndi kha ḓi vha na vhathu vhanzhi kha wonoyu muḓi.”
11 A dzula henefho ṅwaha woṱhe na miṅwedzi ya rathi, a tshi khou vha funza ipfi ḽa Mudzimu.
12 Musi Galioni e muvhusi wa vundu* ḽa Axaya, Vhayuda vha langana vha ṱhasela Paulo, vha mu isa hune ha sengiselwa hone,
13 vha ri: “Hoyu munna u khou ṱuṱuwedza vhathu uri vha gwadamele Mudzimu nga nḓila ine ya lwisana na mulayo.”
14 Paulo a tshi ri u a amba, Galioni a amba na Vhayuda a ri: “Inwi Vhayuda, ndo vha ndi tshi ḓo ni thetshelesa arali hoyu munna a vhe o khakha kana o tshinya.
15 Fhedzi arali ni tshi khou lwiswa nga zwine na zwi amba, nga madzina na nga mulayo waṋu,+ zwi dzudzanyeni nga tshaṋu. A thi ṱoḓi u vha muhaṱuli wa zwenezwi zwithu.”
16 A tshi fhedza u amba zwenezwo a vha pandela henefho hune ha sengiselwa hone.
17 Vhoṱhe vha fara Sostene+ muhulwane wa sinagogo, vha mu rwa henefho hune ha sengiselwa hone. Fhedzi Galioni a si vhuye a zwi dzhena.
18 Musi o no dzula maḓuvha manzhi, Paulo a onesana na vhahawe a ṱuwa na Prisila na Akwila nga tshikepe vha ya Siria. A fhungudza mavhudzi awe musi e ngei Kenkrea,+ ngauri o vha o ita muano.
19 Vha swika Efesa, a sia Prisila na Akwila henefho; fhedzi ene a ya sinagogoni a ambedzana na Vhayuda nga Maṅwalo.+
20 Naho vho mu humbela lunzhi uri a dzule navho tshifhinga tshilapfu, a si tende
21 fhedzi a vha onesa a ri: “Ndi ḓo dovha nda vhuya, arali Yehova* o zwi funa.” A bva Efesa nga tshikepe
22 a ya Kesarea. A ya Yerusalema a lumelisa tshivhidzo, a kona u ya Antiokia.+
23 Musi o no fhedza tshifhinga tshilapfu e henefho, a ṱuwa, a fhira nga shangoni ḽa Galata na ḽa Firigia,+ a tshi khwaṱhisa vhafunziwa vhoṱhe.+
24 Muḓini wa Efesa ha swika muṅwe munna wa Muyuda ane a pfi Apolo,+ o bebelwaho ngei Alekzandria; o vha e muambi makone, a tshi ḓivha Maṅwalo.
25 Onoyu munna o vha o funzwa nḓila ya Yehova,* a tshi fhisea nga nṱhani ha muya mukhethwa, o vha a tshi amba na u funza zwithu zwo teaho nga ha Yesu, a tshi ḓivha ndovhedzo ya Yohane fhedzi.
26 A funza sinagogoni nga tshivhindi, musi Prisila na Akwila+ vha tshi mu pfa, vha mu vhidzela thungo vha mu ṱalutshedza nḓila ya Mudzimu zwavhuḓi.
27 Musi a tshi ṱoḓa u ya Axaya, vhahashu vha Efesa vha ṅwalela vha Axaya uri vha mu ṱanganedze. A tshi swika henefho, a thusa zwihulu vha re vhatendi nga nṱhani ha vhuthu vhuhulu ha Mudzimu;
28 a amba phanḓa ha vhathu uri zwe Vhayuda vha zwi funza zwo vha zwo khakhea, a vha sumbedza Maṅwaloni uri Yesu ndi Kristo.+
Ṱhaluso dzi re magumoni a siaṱari
^ Kana “O vha a tshi ambedzana navho.”
^ Ndi sinagogoni.
^ Sedzani Mutevhe Wa Ṱhalutshedzo Ya Maipfi.
